Hoseya 6 - ALLALA KUMƐ

Tubi-Koe Foninyɛ La

¹ Mɔgɛnu bi anu da le fɔla ko, “Ma sɛgi wona Mari ma. Mari le wara ma tanban, ale le ye ma dandanna tun. Ale le ya tɛlɛ sigi ma ma, ale le ye mala tɛlɛnu makirila.

² Tele fila, sawa wa tenbi tumɛ min, ma si fisaya. Wo kɔma, ma si taran ma kɛndɛ la Mari fɛ.

³ Ma ni ma sɛbɛ don Mari lɔn-koe ma alako a ni to sɛgila ma ma tun iko sun-tele-tiyi ye nala sɔgɔma-wo-sɔgɔma nya min. A si to sɛgila ma ma tun iko samɛ min bi donna san-bo-san.”

⁴ Kɔnɔ Mari ko, “N si nfen ma wole, Isirɛla mɔgɛnu na? Wola keninteyɛ ti mɛ bɔla wo burɔ iko duri ti mɛ tɛgɛla nya min sɔgɔma.

⁵ Wo le ya a ma, n ya nɛbinu kilaya wo ma alako wonu ni kiti tɛgɛ anubɛ kasarɛ wara-koe fɔ wo ye. N bi nyinina min ma wo bolo, wo gbɛnɛ feufeu!

⁶ N bi nyinina hinɛ le ma wo bolo, saraka ma de! Yanni nna mɔgɛnu ni sarakɛnu mintan n ye, a fisa, anu ni nde lɔn a kila-bɛrɛbɛrɛ fɛ.

⁷ “Sarama-kan min bi wole anubɛ nde, Mari tɛma, wo ya wo tinya tiriya iko ma benba Hadama ya a ma nya min.

⁸ Kaliyadi soe lafanɛ wunduyogenu anubɛ mɔgɔ-fagalɛnu denu na.

⁹ Wole saraka-masɔlɛnu mani de iko kankan-kurɔn minnu siginɛ kilɛ la. Wo ye mɔgɔ-lapɛran la. Hali kilɛ min bi tala a labilala Sɛkɛmta kan-tina-sɛnimɛ ma, wo ye mɔgɛnu fagala wo fɛ. Wo ye karagbɛlɛyɛ wo dama lawulila a ma le bihin!

¹⁰ N bara koe min tayen Isirɛla nyamanɛ rɔ, wo ma daga. Wole nna mɔgɛnu, wo ara wo nyɛrɛ latinya bɛsi-kɔ-koe fɛ. A ma bɛn defan, wo ni a bato.

¹¹ “Wole Yuda mɔgɛnu, ka a tɛgɛ wo ara min ma, n bara wo tɔrɔya-lɔgɔ latɛgɛ.”