Hoseya 4 - ALLALA KUMƐ

Isirɛla Mɔgɛnu Sɔn-Yira-Koe Anu Na

¹ Mari ko a ye Isirɛla mɔgɛnu sɔn fɛrɛnna anu na. Wole Isirɛla mɔgɛnu, wo ni wo tole masɔ a la. A ko telenbagayɛ anubɛ keninteya fenfen sa wola nyamanɛ rɔ tun. Min sanɛ wo kuma, a ko mɔgɔ-wo-mɔgɔ ma ale lɔn Alla la tun.

² A ko wo ye mɔgɛnu dankala. Wo sa wola lanyirinu natɔnbagayala. Wo ye mɔgɔ-fagɛ kɛla, wo ye kankanyɛ kɛla, wo ye yɛlɛnyɛ kɛla. Wo ara wunduyogoyɛ dan-natenbi. Yanni do ni kimɛ, wo ara do faga.

³ Woletɔ a ko wola dugi ra ye gbalala le todo! Fan min bɛɛ ye a rɔ, wo bɛɛ si faga. A sogo wo, a koni wo, a yɛgɛ wo, a ko wo bɛɛ la si to dogbe!

Saraka-Masɔlɛnu Sɔn-Fɛrɛn-Koe Anu Na

⁴ Mari ko, “Wole saraka-masɔlɛnu kana wo bole telen wo sigi-nyɔgɔnnu na bawo kɛlɛ ye mabɛ saraka-masɔlɛnu denu tɛma.

⁵ Wo ye buila hakɛ rɔ su-ni-tele, ado wole, nɛbinu ma tenbi wo la nya-wo-nya. N si wole, Isirɛla mɔgɛnu nato.

⁶ Gbalo ye nta mɔgɛnu kuma bawo anu ma nde, Alla lɔn wole, saraka-masɔlɛnu bolo. N lɔn-sɔgɔ sa wole, saraka-masɔlɛnu na. Wo ara wo kan-kɔ sɔ nta karan la. Woletɔ wo ye wo banna a la. Hali wota dannu, n ti wonu yatɛ saraka-masɔla la.

⁷ “Wole saraka-masɔlɛnu bi tola siyayala nya min, wo ye tola hakɛ kɛla wo nya na le. A bɛnta, wo ni gbiliyɛ min sɔrɔn, n si wo yɛlɛma wo bolo miliyɛ la.

⁸ Wo ye tɔnɛ sɔrɔnna ka a tɛgɛ nta mɔgɛnuna hakɛ-kɛ-koe ma. Woletɔ wo ye tola anu natuntunna hakɛ rɔ tolon!

⁹ Mɔgɛ wonu bi tɔrɔya sufa min sɔrɔnna, wole saraka-masɔlɛnu bi wo le su sɔrɔnna. N si wo tɔrɔ ka wola ko-yogomɛ bɛɛ yili sara wo la.

¹⁰ Hali wo ye wo niyi sɔrɔnna sarakɛnu tɔ, kɔnkɛ ti bɔ wo la. Hali wo kira dan nyinina wo kun-da-filɛ bɛɛ la, wo ti a sɔrɔn bawo wo ara nde, Mari boloka ka bila bɛsɛnu fɛ.”

Alla Ban-Koe Bɛsi-Kɔ-Koe Ma

¹¹ Mari ko, “Baan-feremɛ ye a mala, wole nta mɔgɛnu bi kuntanya-koenu mala.

¹² Wo ye kɔlɔma-malɛsɛnɛnu mala wola nya-nyini-kɛ-fannu na. Kɔlɔma-fuyi le wonu na dɔrɔn. Wo si min ma, wonu denu bi wo labilala wonu na. Wo ara wo kan-kɔ don nde, Mari la feufeu! Wo ara nde, Mari boloka iko musu-yɛlan si ala kei boloka nya min ka ta yɛlɛnya-kɛ-tinɛ.

¹³ Wo ye bɛsɛnu kɔla kan-tina-mayɛlɛnɛnu tɔ kɔnkɛnu kuma kɔlɔma-kuru-wɛnu kɔrɔ bawo nyɔ-ninɛ di wo ye. “Wo ara kɛ-nya-yogomɛnu bi min kɛ, wola dunmusinu anubɛ wo mamani-nyaganɛnu bara anu nyɛrɛ don yɛlɛnyɛ rɔ.

¹⁴ N ti wola dunmusinu tɔrɔ bawo wole keinu denu bi yɛlɛn-musi kɛnu makila ka anuna bɛsɛnu kɔ anuna bɛsi-kɔ-tinɛnu tɔ. Wole ko-nya-yenbɛlɛnu bara-koe ti ta yarɔ ma mumɛ!

¹⁵ “Hali wole, Isirɛla mɔgɛnu ma telen n ye kɔnɔ Yuda mɔgɛnu kana anuta kɛ-nyanu bi. Wo kana batoli-kɛ Kiligali soe anubɛ Bɛti-Efɛn soe burɔ. Wo kana lanyiri kiri nyɔ nde, Mari-nimɛ tɔgɛ rɔ.

¹⁶ Wole, nta mɔgɛnu tengberenyanɛ iko sofɛlɛ. N ti ke wole, sofɛlɛnu nagbengbenna binyɛ ma iko saga-dannu.

¹⁷ Wole Isirɛla mɔgɛnu bara wo nyɛrɛ to bɛsi-kɔ-koe ma. Mɔgɛnu kana bila wo fɛ.

¹⁸ Ni wo ara ban wo yɛ lafinna, fenfen ma di wo ye fɔ yɛlɛnyɛ. Yarabiyi di wo ye gbiliyɛ ko.

¹⁹ Fɔnyɔ si ta wo la. Wo si miliya kɔgɔrɔyɔlɔ ka a tɛgɛ wola bɛsi-kɔɛ ma.