Hoseya 13 - ALLALA KUMƐ

Isirɛla Mɔgɛnuna Kiti Laban Mari Bolo

¹ Fɔlɔ nun, ni Ifɛrɛm bɔnsɔn-mɔgɛnu kumara, wole Isirɛla bɔnsɔn-mɔgɛ toenu si kilan. Wo ya wo yɛ bɛn Ifɛrɛm bɔnsɔn-mɔgɛnu ma. Kɔnɔ bawo anu bara don Beyali kɔ-koe rɔ, wo le ya a ma, anu halaki-koe tɛgɛra.

² Hali wo, anu tora wodi-gbɛ laleela ka anu ma bɛsɛ la. Hadama-den-hɛnkili le ya wodi-gbɛ kɛ lalee, ado hadama-dan le ya a ladan. Anu ban a ladanna, anu ko, “Wo ni sarakɛ bɔ a ye de!” Min tenbira wo la, fan min nadannɛ turɛla muninyɛ la dɔrɔn, mɔgɛnu bi wonu sunbula tagbayi!

³ Ka a tɛgɛ wo ma, anu si tunu yen, iko duri. Anu si ma iko fɔrɔn, fɔnyɔ ye tala min na. Anu mani de iko ta-sisi min bi bɔla nyandan-bɔn kuma.

⁴ Mari ya a fɔ Isirɛla mɔgɛnu ye ko, “Wota Mari Alla le nde la min nara wo la ka bɔ Iyipiti nyamanɛ rɔ. Alla-gbɛrɛkɛ fenfen sa wo bolo nde kɔma, ado wola kisilɛ le nde kelan la.

⁵ Nde le ya wo fɛ-bira wula-magbalanɛ rɔ.

⁶ Wo kenɛ nyamani-hakikɛ kɛ rɔ, wo makoe bɛɛ nyinyara ha wo wasara. Wo kɔma, wo wasira ka nyina nde, Mari ko.

⁷ Woletɔ n si kɛ wo ma iko yarɛ. N si wo makɔni kilɛ la iko kuli.

⁸ N si kɛ wo ma iko sogo-ferema-yuwan, ala dan wa tunu a ma. A si wo buyi laka. A ye kɛla wo ma kan min, a ye wo dɔnna nyɔ le sa! N si wo rafarafara iko sogo-dalamɛ si a ma nya min.

⁹ “N si wole, Isirɛla mɔgɛnu kasara pɔ! Wo wa ma, yon si wo dɛnbɛ gbɛ?

¹⁰ Wo ya a fɔ nun ko wo ye nyinina mansɛ anubɛ kun-tiginu ma kɔnɔ wonu si ke wo lakisila kama?

¹¹ Hali n kɔrɔtɔnɛ, n sɔnta wola mansaya-koe ma. Wo kɔma, n ya mansaya-koe bɔ wo tɛma fanan nta kɔrɔtɔ kelan wo la.

¹² “Wo sɔn anubɛ wo hakɛ ara sɛbɛ nun, bi ko ma. A bɛɛ lamaranɛ kan tinɛ do rɔ, yanba ti yalan anu ma kan min.

¹³ Wole Isirɛla mɔgɛnu, fɛrɛ ye wo bolo, wo ni to wo niyi la kɔnɔ wo sa sɔnna fɛrɛ wo la. Wo mani de iko dan min sɔrɔn-wati ara ke kɔnɔ a ni a ban bɔ-koe ma fɔnyɔ la.

¹⁴ Nde, Mari ti wo kunyɛ bɔ lakira bonda-dɛ la, ni wo ma, ka wo bɔ sayɛ sɛnbɛ kɔrɔ tun! Ile sayɛ, i ni na ila fitinɛ la i bolo. Ile lakira, na ila kasarɛ la. Nde, Mari ti kinikini wo ma.

¹⁵ Hali wo sabatira iko binyɛ, n si fɔn-kalamɛ lana ka bɔ tele-bɔɛ wara la min si wola kɔlɔnnu anubɛ wola tenkenu tagbala todo! Wola fen-kolomɛnu namara tinɛnu ta si kolonya filili!

¹⁶ Wola Samariya so-karantan si tɔrɔ ka a tɛgɛ ala murutiyɛ ma nde, Alla ma. Wole Samariya kɛnu kunyɛ si to kɛlɛ rɔ ka wola dannu gbesi dugi la ka wola musu-kolomɛnu buyi laka faan la.”