Hoseya 12 - ALLALA KUMƐ

¹ “Ka a bi sɔgɔmɛ ma ha wurɛ la, wole Isirɛla mɔgɛnu sa ko-wo-ko kun na fɔ ko-fuyinu anubɛ tinyalɛ. Karagbɛlɛyɛ ara wara wo tɛma. Wo ara dogonta-fannu di Iyipiti kɛnu anubɛ Asiriyanu ma wo dɛnbɛn-koe la.”

² Mari ya Yuda sɔn fɔ a ye. A ko a si wole Yakoba kegeyɛ fanan tɔrɔ ka a tɛgɛ wola ko-ladan-nya ma, ado a si wo bira wo yili la.

³ Wo benba Yakoba anubɛ a fɛrɛn-nyɔgɛ Isɔ ya kɛlɛ dabira anu na burɔ le fɔlɔn. Ale Yakoba koloyanɛ, a ya Alla ma a kɛlɛ-nyɔgɛ la

⁴ bawo anubɛ melika ya turunɛ kɛ. A ya melika wo nɔ. Wo kɔma, a dira ka wo madiya alako wo ni duwa a ye. San-dande tenbinɛ, Alla ya ale Yakoba taran Bɛtɛli soe burɔ ka ala kumɛ mabalan nyɔ,

⁵ ado Mari Alla Sɛnbɛ-Bɛɛ-Tigi nyɛrɛ-nyɛrɛ le wo la. Ma ye batoli kɛla a tɔgɔ kelan wo le la.

⁶ Woletɔ wole Yakoba kegeyɛnu, wo ni la wota Alla la ka sɛgi a ma. Wo ni lanayɛ kɛ ka keninteyɛ yira wota Alla la. Wo ni wo muin ha Alla ni ata wɔlɛ kɛ.

Kiti-Lagbɛlɛya-Koe Isirɛla Mɔgɛnu Kuma

⁷ Mari ko, “Wole Isirɛla mɔgɛnu telenni ma ha wo mara iko Kenan kɛnu. Minnu bi nala feri kɛla wo ma, wonu kensɔn di wo ye fen-suman-tinɛ.

⁸ Wo ye a fɔla ko, ‘Ma ara ma nɔnfulu-tiginu na, ado mɔgɔ-den-kelen ti ke a fɔla ma ma ko ma ara kɛ sɔrɔn kensunyɛ le tɔ.’

⁹ Kɔnɔ nde, wota Mari Alla min ya wo labɔ Iyipiti nyamanɛ rɔ, n ko n si a ma, wo ni wo sigi fani-bɔnnu na tun iko n ya a ma wo benbanu ye wula-da-rakolɔn rɔ nya min.

¹⁰ “N kumara nɛbinu ye nun ka ko-rayirɛ kɛ anu ye. N ya wole nta mɔgɛnu makawandili-kumɛnu don nɛbinu kara tɔ.

¹¹ Hali wo, wo ye bɛsɛnu kɔla Kaliyadi nyamanɛ rɔ. Min bɛɛ ye wo kun na, n si wo bɛɛ faga tɛrr! Wo ye turɛnu mala sarakɛnu na wola bɛsɛnu ye Kiligali soe burɔ kɔnɔ wola saraka-mintan-tinɛ wonu si ma kuru-ladɛnnɛnu na gbɛkole ma tala.”

¹² Ma benba Yakoba ya a buri tala Mɛsopotemiya nyamanɛ rɔ. A ye nyɔ tumɛ min, yanni a ni musi sɔrɔn, a wɔlita kei do kɔrɔ ka wola sagɛnu kandan a ye.

¹³ Mari ya ala nɛbi do sɔ ka ta wole, ala mɔgɛnu kunka Iyipiti nyamanɛ rɔ ka wo fɛ-bira.

¹⁴ Kɔnɔ wole Isirɛla mɔgɛnu ya a ma, Mari fonde bɔra wo kan ma dɔgɔma-ma-de! A ko a bɛnta nun, wo dama ni faga ka a tɛgɛ wola karagbɛlɛyɛla ko ma. Mari ko a si wo tɔrɔ a kilɛ fɛ bawo wo ara a lamiliya.