Hoseya 10 - ALLALA KUMƐ

¹ Wole Isirɛla mɔgɛnu bara sabati nun iko kɔn wa gbɔ tisikiri! Wo ye tɔnɛ sɔrɔnna nya min, wo ye tola saraka-mintan-tinɛnu nadanna bɛsɛnu ye wo nya na le. Ki-fannu bi tola sabatila wola dugi rɔ nya min, wo ye tola wola kuru-malɛsɛnɛnu makirila wo nya na le.

² Yanfante-kɔrɛnu de wole la. Fɔ wo wa tɔrɔ wo hakɛla ko la. Mari si wola saraka-mintan-tinɛnu anubɛ kuru-malɛsɛnɛnu tinya feufeu!

³ Wole hakɛ-tiginu si na a fɔ ko, “Mansa sa ma bolo bawo ma kilanni ma Mari la. Hali a taranta, mansɛ ye ma bolo nun, wo si nfen nyinya ma ma?”

⁴ Wole ye kuma-fuyinu fɔla ka foninya-lanyirinu kiri ka to wo da le fɔla kɛlɛ-makima-koe rɔ. Latelan ara a laban wo bolo ko-raduyi ma kiti-fɔ-tinɛ. Wo mani de iko mɔgɛ wa fui-fan fui, fen-gbɛrɛkɛ ma fɛrɛn nyɔ fɔ dawurɛ.

⁵ Sɛnɛ min nadannɛ ninki-danla muninyɛ la Bɛti-Efɛn soe burɔ, wole Samariya kɛnu bi kilanna ko anu kana na foo wo la. Wo yogenu ba sɛnɛ wo bɛɛ ka kɔlɔma-lɛsɛnɛ wo ma, bɛsɛ wo kɔlɛnu anubɛ a saraka-masɔlɛnu si na di bɛsɛ wola ko la bawo anu bara foo a la.

⁶ Anu si ta bɛsɛ wo la Asiriya nyamanɛ rɔ anuna mansɛ sanbayɛ la. Wole Isirɛla mɔgɛnu si miliya wo rɔ ka a tɛgɛ wola lanayɛ ma bɛsɛ wola ko la.

⁷ Anu si ta wola mansɛ la pon iko yi ye tala kɔn-fɛran la nya min.

⁸ Wola bɛsi-kɔ-tinɛ minnu bi kɔnkɛ kuma Bɛti-Efɛn soe dafɛ, wo si hakɛ kɛ kan min, wonu si kasara pɔ! Nyɔnu si ma wɔnɔ-firɛ anubɛ binyɛ la. Wo ye nala a fɔla kɔnkɛnu ma ko, “Wo ni wo keri ma kuma alako ma wara-koe ni ka-a-la.”

Isirɛla Mɔgɛnu Kiti-Koe Fɔ-Koe Mari Bolo

⁹ Mari ko, “Kebi wole, Isirɛla mɔgɛnu ya hakɛ-kɛ dabira Kibiya soe burɔ, wo ma fara a la tun! Woletɔ kɛlɛ-bole si sa wo rɔ Kibiya.

¹⁰ N si na wole hakɛ-tiginu kan ma ka wo tɔrɔ. Sibolo-gbɛrɛ-siyaman si anu kundɛn wo kan ma ka wo tɔrɔ.

¹¹ “Wole Isirɛla mɔgɛnu mani de nun iko sara-ninki-kolonɛ. A di wo ye ka to fui-fan tɛnna gbere-kole ma. Kɔnɔ tɔ-a-la, nde, Mari si dɛɛ kiri a la ka a lata dugu-rasin-tinɛ. N si dugu-wɔrɔ-dɛɛ kiri Yuda kɛnu na ka fen-tagbesi-dɛɛ kiri Isirɛla kɛnu na.

¹² Wo ni dugu-kurɛ rasin wo nyɛrɛ ye ka telenbagayɛ ki a rɔ. Tɔ-a-la, wo si duwɛ tɛgɛ a rɔ iko wo ye tɔnɛ min sɔrɔnna wo nyɛrɛ latenbi rɔ nde, Mari ma. Wo ya-lamunun-wati ara ke nde, wota Mari la. Wo kɔma, n ni to nna duwɛ labɔnna wo ma.

¹³ Kɔnɔ yanni wo ni telenbagayɛ fui nyɔ rɔ nun, wo ya wunduyogoyɛ le fui nyɔ rɔ, ado wo ma fenfen tɛgɛ nyɔ fɔ wunduyogoyɛ. Wo ara bɔ wola foninya-fɔɛ-tɔnɔ ma. “Wo lanɛ wola kirindinu anubɛ wola kɛlɛ-den-siyamɛnu na min kɛ,

¹⁴ wo si a ma, kɛlɛ ni na wo ma. Wola so-latankanɛnu si tii mɛmɛ! Soe wonu si ma iko Mansa Salama ya Bɛti-Araba daga-koro-tiyi-kɛ nya min ka a fi-koro-tiyi kɛ. Denbɛ anubɛ anuna dannu kunyɛ si to-a-rɔ bofe!

¹⁵ Wole Bɛtɛli kɛnu, n bi a mala wole fanan na wo nya na le ka a tɛgɛ wola karagbɛlɛya-yogomɛ ma. Kɛlɛ wo ye buila nya min wo, Isirɛla mansɛ wo ye fagala le.”