Hiburunu 3 - ALLALA KUMƐ

Yisa Tenbi-Koe Nɛbi Musa La

¹ N na-kelen-nyɔgɔ dɛnkɛninya-mɔgɛnu, Alla ara wole bɛrɛn kele ko wo ni ma atɛnu na. Woletɔ wo ni wo miri Yisa le ma. Alla ara a sɔ mala saraka-masɔla-kun-tigi-wayɛ la mala dɛnkɛninyɛ kun na, ma sɔnɛ min tɔ gben!

² Alla ya Yisa yabɔ ata wɔlɛla ko la, ado lanaya-mɔgɛ le ale la iko Nɛbi Musa mara lanaya-mɔgɛ la nya min Allata mɔgɛnu ye.

³ Bon-sɔlɛta gbiliyɛ kolo bɔn nyɛrɛ ko, ado gbiliya-wɛ bɛnnɛ Yisa fanan ma wo nya na le ka tenbi Nɛbi Musa la.

⁴ Bon kelen-kelennamɛ-bɛɛ sɔra mɔgɛ le bolo, ado Alla le wara fan bɛɛ dan.

⁵ Nɛbi Musa le wɔli-kɛlɛ wo la min wɔlita Allata mɔgɛnu tɛma a kilɛ fɛ. Alla ye nala min fɔla ma ye yarɔ, ale Musa mara wo misalɛ la.

⁶ Kɔnɔ Kirasiti le dan wo la min bi lanayɛ kɛla a fa Allata mɔgɛnu kuma. Ni ma tora mata yisi-latɛgɛ rɔ ka ma yigi sa ale rɔ, Allata mɔgɛnu denu bi male la worɔ.

Allala Mɔgɛnu Sulen-Koe

⁷ Iko Allata Ni-Sɛnimɛ ya a fɔ nya min, a ko, “Ni wo ya nna kuman-kan lamɔɛn bi,

⁸ wo kana ma tengberannu na iko wo benbanu murutiyara n ma nya min. Anu ya n kɔrɔbɔ wulɛ rɔ nya min, wo kana wo yisi gbɛlɛya wo nya na tun.

⁹ Hali anu mara nta kabana-koenu sere la san bi-nani kɔrɔ, wo benbanu ya a lagbɛlɛya n kuma ka n tɔrɔ.

¹⁰ Wo le ya a to, n diminyara mɔgɛ wonu ma. Anu ya n boloka ka ta anu kun fɛ! Anu ma sɔn nna kumɛ birala mumɛ!

¹¹ N yisi bɔnɛ ya n keli. N ko kɛnu ti don nyamanɛ wo rɔ anu si anu sulen kan min mumɛ!”

¹² Woletɔ n na-kelen-nyɔgɛnu, wo ni a ma wo fɛrɛma. Ni-yogoyɛ wo, dɛnkɛninyabɛlitayɛ wo, wo fenfen kana taran wo tɛma min si a ma, wo ni wo kan-kɔ sɔ Alla nimɛ la.

¹³ Fananta ma ye a fɔla bi ma ko, “Bi,” wo ni to wo nyɔgɔn dɛnbɛna tele-wo-tele alako wo fenfen kana yanfa hakɛ bolo. Wo kana ma sɔndɔma-gbɛlɛ-tiginu na.

¹⁴ Ni ma tora lanayɛ kɛla ka bi a fɔlɔtɛ ha ala ban, ma dama ye ta-nyɔgɔnyɛ kɛla Kirasiti fɛ worɔ.

¹⁵ A sɛbɛnɛ Allata kitabu rɔ ko, “Ni wo ya Alla kuman-kan lamɔɛn bi, wo kana ma tengberannu na iko wo benbanu murutiyara Alla ma nya min.”

¹⁶ Yon bi wonu na minnu ya Alla kuman-kan lamɔɛn ka murutiya a ma? Nɛbi Musa bɔra mɔgɛ minnu na ka bɔ Iyipiti nyamanɛ rɔ, wonu denu denu bi, yɔ!

¹⁷ Alla diminyara yonnu ma san bi-nani kɔrɔ? A diminyara hakɛ-tigi wonu denu ma, ado wonu suyi sanɛ tora wulɛ rɔ.

¹⁸ Alla ya a keli tumɛ min ko kɛnu ti don nyamanɛ wo rɔ anu si anu sulen kan min, a ya wo fɔ yonnuna ko la nun? Minnu murutiyara a ma nun, a ya wo fɔ wonu denuna ko la.

¹⁹ Ma ara a yen worɔ ko anu ma ke donna bawo anu ma dɛnkɛninya Allata kumɛ ma.