Hɛnkilimaya-Kumɛnu 3 - ALLALA KUMƐ

Makawandili-Kumɛnu Bira-Koe Fonikenu Bolo

¹ nna den, i kana nyina nna karan ko. I ni nna kumɛnu namara i yisi rɔ.

² Ni i ya nna kumɛ kɛnu bira, i siyi-fɛ si yanya, ado i si sabati fanani!

³ I kana i bɔ keninteyɛ rɔ, wo kɔma, i kana lanayɛ boloka. Wonu ni ma ila kan-na-fan la ka anu sɛbɛ i yisi rɔ.

⁴ Ni i ya wo ma, i wara-koe si Alla hɛnɛ anubɛ mɔgɛnu.

⁵ I ni la Mari la i yisi bɛɛ la. I kana la i nyɛrɛta hɛnkili la.

⁶ I ye ko-wo-ko mala, i ni Mari fɔlɔn gbiliya, woletɔ a si kila-telennɛ yira i la.

⁷ I kana to i mirila ko i kelan le ya ko lɔn. Mari kelen peta kumɛ bira tun. I ni i ban ko-yogomɛ kɛla.

⁸ Ni i ya wo ma, a si ma i bolo iko bɛsɛ min si tɛlɛ dandan ka i kolenu tagbɛlɛya.

⁹ I ni to kɔ-fen-nyimɛnu bila ila sɛni-hakikɛ rɔ ka Mari gbiliya wonu na.

¹⁰ Ni i ya wo ma, ila fen namara tinɛnu na si fa, ado i si minni-fan sɔrɔn ha a ni tagbaya i ma.

¹¹ nna den, Mari tenbi i latelenna tumɛ min, i ni i tole masɔ a la a kin na! I ni a lɔn ko a ye i makawandila le hali i ma i ban a la

¹² bawo mɔgɛ min di Mari ye, fɔ a wa wo latelen iko fa-nyimɛ si a diyana-dan latelen nya min.

¹³ Mɔgɔ-sewanɛ le wo tigi la min bi mala hɛnkilimɛ anubɛ ko-lɔnnɛ la.

¹⁴ Tɔnɛ ye hɛnkili-nyinɛ la ka tenbi wodi-nyinɛ la, ado a tenbira sɛnɛ-bɛrɛ fanan na.

¹⁵ Mɔgɔ ti hɛnkili-nyinɛ sanka dugu-kɔrɔ-nɔnfulinu ma. I ye nyinina fan min bɛɛsi ma duninya kɛ rɔ, hɛnkilimayɛ tenbira wonu na pirr!

¹⁶ Hɛnkilimayɛ si simayɛ anubɛ sabatiyi anubɛ gbiliyɛ di i ma.

¹⁷ A si a ma, i niyi ra ni diya ka yisi-kimɛ di i ma i siyi-tele-bɛɛ kɔrɔ.

¹⁸ Minnu bara ma hɛnkilimɛnu na, wonu bara sewa. Ni minnu ya wo sɔrɔn, a si simayɛ di wo tigi ma.

¹⁹ Mari ya dugu-kole kɛ dan hɛnkilimayɛ le tɔ. A ya san-kole sa a sa-tinɛ ata lɔnnɛ rɔ.

²⁰ Ata hɛnkili-wɛ le ya a ma, bɛnu sara anu worɔn la. Wo le ye a mala fanan, san-kole ye bandɛ layigila dugi ma.

²¹ nna den, hɛnkilimayɛ anubɛ ko-kɔrɔ-lɔn bira i bolo filɛ la. I kana sɔn, anu ni anu purukulu i bolo mumɛ!

²² A si wasinteyɛ anubɛ sewɛ di i ma iko kan-na-fan si mɔgɛ lakinya nya min.

²³ Wo si a ma, i tara kan-bo-kan, i ti nanparan sɔrɔn kilɛ la. Wo kɔma, i ti i kian latugu.

²⁴ I wa i sa suyi rɔ, i ti kilan. I si kinɔgɔ i fanbolo.

²⁵ Kasarɛ anubɛ yakɔrɔ-mamɔɛ min bi sigila karagbɛlɛnu ma, i ti kilan wonu na

²⁶ bawo Mari si i tanka alako i kian kana na bira gbɛrɛ la.

²⁷ Ni ko-nyimɛ kɛ-fɛrɛ ye i bolo, minnu makoe ye i la, i ni wo kɛ anu ye.

²⁸ Ni i sigi-nyɔgɛ dɛnbɛn-fɛrɛ taranta i ma, i ni a kɛ a ye. I kana a fɔ a ye ko, “Ta fɔlɔn, sina i ni na.”

²⁹ I kana ko-yogomɛ miri i sigi-nyɔgɛ ye, wobɛ min siginɛ, ado a lanɛ i la.

³⁰ Ni min ma baga i ma, wobɛ wo kana sɔnkɔ.

³¹ I kana karagbɛlɛnu makeliya anuna karagbɛlɛyɛla ko la, ado i kana na ma iko anu denu

³² bawo wunduyogenu sɔgɔ labɔnɛ Mari la lasi! Kɔnɔ a si a gbundi yira mɔgɔ-telennɛnu na.

³³ Mari si dankɛ ladon karagbɛlɛnuna bɔn la kɔnɔ a si duwɛ layigi mɔgɔ-telennɛnu barɛ.

³⁴ A mako sa mɔgɔ-wasinɛnu na kɔnɔ a si ata kɛ-nya-nyimɛnu yira mɔgɔ-famayiginɛnu na.

³⁵ Hɛnkilimɛnu si tɔgɔ-nyimɛ sɔrɔn kɔnɔ a si to yarabiyi sala hɛnkilibɔnɛnuna hɛnkilibɔninyɛ kuma.