Hɛnkilimaya-Kumɛnu 2 - ALLALA KUMƐ

Hɛnkilimaya-Kumɛnu Tɔnɔ-Sɔrɔn-Koe

¹ Nna den, n bara i karan min na, i ni wo bira gben! I kana nyina wo ko de!

² I tole masɔ hɛnkilimaya-kumɛ la. I ni i raya ka a kɔrɛ lɔn.

³ I ni madiyali kɛ alako i ni karan sɔrɔn ka a nya-yen.

⁴ I ni a nyini iko mɔgɛ si dugu-kɔrɔ-nɔnfuli nyini nya min. I ni to a nyinina iko mɔgɛnu bi wodi nyinina nya min.

⁵ Ni i ya wo dama ma, i si Mari-yala-kilan-kɔrɛ lɔn, wo kɔma, i si Alla lɔn bɛrɛbɛrɛ-wɛ-kɛ.

⁶ Mari le si hɛnkilimayɛ anubɛ lɔnnɛ di mɔgɛ ma. Wo kɔma, a si a ma, i ni a nya-yen.

⁷ Minnu natelennɛ, ale le ye hɛnkilimayɛ ladɛnna wo ye ka wo tanka ko-yogomɛ ma.

⁸ Minnu ti lafisayalɛ kɛ, Mari si wonu natanka. Minnu fanan bara anu nyɛrɛ di Mari ma bɛrɛbɛrɛ-wɛ-kɛ, a si wonu nakandan.

⁹ Ni i ya i tole masɔ n na, i si ko-latelennɛ anubɛ ko-nyimɛ lɔn. Koe min kin ka a ma, i si wo fanan lɔn.

¹⁰ I hɛnkili ma si to kofula. Ila karan si a ma, i ni sewa.

¹¹ Ila ko-kɔrɔ-lɔn si i kandan hɛnkilimayɛ rɔ.

¹² Hɛnkilimayɛ si a ma, i ti bila ko-yogoma-kɛlɛnuta kilɛ fɛ. A si i tanka foninya-fɔlɛnu ma.

¹³ Mɔgɛ le wonu na minnu bara telenbagayɛ boloka ka bila pinpita kilɛ fɛ.

¹⁴ Wunduyogoyɛ si a diya don anu tɔ iko pɔlɛ.

¹⁵ Yanfante le wonu na, ado mɔgɔ ti la wonu na.

¹⁶ Ni hɛnkilimɛ le ile la, i si ke le i bɔla musu-yɛlanla darɔ-diyɛ kɔrɔ

¹⁷ bawo musi wo ma telen ala kei ye. A ya lanyiri min kiri Alla ye a furu tinɛ, a ara nyina wo ko salon!

¹⁸ Ni i tara musu-sufa wola bɔn la, i ye tala kanbɛ le magbenna wo la

¹⁹ bawo ni min tara bɔla a wara, wo kɛndɛ ti sɛgi tun, ado a ti bila nimaya-kilɛ fɛ tun.

²⁰ Woletɔ nna dan, ile ni bila mɔgɔ-nyimɛnuta kilɛ fɛ ka telenbagayɛ kɛ.

²¹ Minnu natelennɛ Alla ye, wonu si taran anu diya mala nyamanɛ kɛ rɔ.

²² Kɔnɔ minnu karagbɛlɛ, Alla si wonu wurun burutu, iko mɔgɛ si binyɛ wurun nya min sɛnɛ rɔ.