Hegayi 2 - ALLALA KUMƐ

Isirɛla Mɔgɛnu Makawandi-Koe Mari Bolo

¹ San wo nyɛrɛ karɛ wɔrɔnfilɛ, a tele mogan-ni-kelan ma, Mari ya kumɛ do fɔ nde, Nɛbi Hegayi ye tun ko

² a ni a fɔ Nyamani-Tigi Sarababulu anubɛ Saraka-Masɔla-Kun-Tigi-Wɛ Yasowa anubɛ Isirɛla mɔgɛ bɛɛsi ye ko,

³ “Mɔgɛ do si taran wo tɛma min si ke ka a miri Bato-Bɔn fɔlɔtɛ sɔ-nya ma tun, wa? Fɔlɔ nun, a kin kosɛbɛ! Kɔnɔ kɛ ye wole yala kama kaka? Kɛ mani de iko fufafuyi wole yala, wa?

⁴ Ile Sarababulu, i kana hɔn. N bi i fɛ. Saraka-Masɔla-Kun-Tigi-Wɛ Yasowa, i sɛbɛ don. Wole Isirɛla mɔgɛ bɛɛsi, wo ni wo sɛbɛ don ka wo raya.

⁵ Wo bɔra Iyipiti tumɛ min, n ya a fɔ ko n bi wo fɛ, ado n bi wo fɛ wo nya na le fanan, yɔ! N ti bɔ wo fɛ. Wo kana kilan.”

⁶ Mari Sɛnbɛ-Bɛɛ-Tigi kan le kɛ la. A ko a ti mɛ tun, a si san-kole anubɛ dugu-kole layɛrɛyɛrɛn. A si kɔgɔ-yi anubɛ dugi layɛrɛyɛrɛn.

⁷ A si duninya-mɔgɛnu tamaga ka anuna fen-kolomɛnu nana Bato-Bɔn kɛ la. Ata gbiliyɛ si taran nyɔ.

⁸ Atɛ le sɛnɛ-hakikɛnu anubɛ wodi-gbɛ-hakikɛnu na.

⁹ Wati ye nala, Bato-Bɔn kɛta gbiliyɛ si tenbi a fɔlɔtɛ la. A si a ma, wo ni sabati ka yisi-kimɛ sɔrɔn Bato-Bɔn kɛ la. Mari Sɛnbɛ-Bɛɛ-Tigi ya kɛ le fɔ.

Isirɛla Mɔgɛnu Tɔrɔ-Koe Mari Bolo Anuna Tɔn-Birabɛlitayɛla Ko La

¹⁰ Dariyasila mansayɛ wo san kelen a fila nyɔgɛ, a karɛ kɔnɔntɛ tele mogan-ni-nanɛ ma, Mari Sɛnbɛ-Bɛɛ-Tigi kumara nde, Nɛbi Hegayi ye tun. A ko,

^11-12 “Saraka-masɔlɛnu manyinika tɔnla ko ma. Ni saraka-masɔlɛ ya saraka-ninki-soge do sa ala duruki-dɛ la, duruki wo fanan ni tugu dɔn-fan do la, a mara biredi la wo, a mara dɔnta tenɛ la wo, a mara tuli la wo, a mara nɔnbɔ-gbɔ-yi la wo, a mara dɔnta-sufa-wo-sufa la, ni a ye tugula wo minnu na, wo sɛninyanɛ de wo rɔ, wa?” Saraka-masɔlɛnu ko, “Ade. Wonu ti sɛninya.”

¹³ Nde, Nɛbi Hegayi ya anu manyinika tun ko, “Mɔgɛ do ya a bole tugu furi la, wo tigi sɛninyabɛlɛ si to fɔlɔn. Ni mɔgɛ wo fanan tara a bole tugu dɔn-fan do la, dɔn-fan wo ye kama?” Anu ko, “Wo ma sɛninya.”

¹⁴ Nde, Nɛbi Hegayi ya Marita kumɛ kɛ le fɔ ko, “Ka a bi Marita Bon-tinya-wati ma ha ka a sigi kaka la, wo biranɛ Mari bolo ka le. Wo mani de iko mɔgɛ kɛnu min sɛninyabɛlɛ. Wo ya fenfen fui, a ti ma-a-la. Wo ya saraka-wo-saraka bɔ, a ti wo munanfaga.

Marita Duwɛ Lanyiri Kiri-Koe

¹⁵ Mari ko, “Ha bi, wo ma a nya-yen bɛ, wa? Yanni wo ni don Mari Bato-Bɔn kɛ sɔɛ rɔ,

¹⁶ wo ye tala wola ki-fannu mafɛlɛn tinɛ nun, wo ya a lɔn ko wo si bɔrɔ fila le tɛgɛ anu tɔ nyɔ nun. Kɔnɔ wo wa ta anu tɛgɛ gbɛ, bɛɛtɛ si bɛn bɔrɔ kelen-kelen de ma. Wo wa ta wola nɔnbɔ-gbɔɛnu burun tinɛ, wo ya a lɔn ko anu yi si bara mogan bɔ nun. Kɔnɔ wo wa anu yi kɛ barɛnu tɔ tumɛ min, bɛɛtɛ si bɛn bara segin-segin de ma!

¹⁷ Mari nyɛrɛ-nyɛrɛ le ya fɔnyɔ wo lana wola ki-fannu kuma nun ka anu nagbala. Ale le fanan ya banda-kole layigi wola ki-fannu kuma ka anu tinya pɔ! Hali wo, wo ma yɛlɛma ka sɛgi a wara la.

¹⁸ Wo ara ban Marita Bato-Bɔn kurunna bi. Ka a dabira bi karɛ kɔnɔntɛ tele mogan-ni-nanɛ kɛ ma, wo si a dan-nafarɛ yen. Wo ni wo miri bi tele ma.

¹⁹ Wo ma a yen? Dɔn-fen sa wo bolo. Hali wola nɔnbɔ-kurinu anubɛ wola toro-kurinu anubɛ wola ɔlifi-kurinu sa gbɔla. Kɔnɔ ka a dabira kaka ma, Mari si ata duwɛ layigi wo kuma.”

²⁰ Wo wulɔn-tele kelan, Mari nara a fɔ nde, Nɛbi Hegayi ye tun ko,

²¹ “A fɔ Yuda Nyamani-Tigi Sarababulu ye ko n si san-kole anubɛ dugu-kole layɛrɛyɛrɛn!

²² N si sɛnbɛ bɔ duninya kun-tiginu bolo. Anuna kirindinu si yɛlɛma ala burilɛnu na. Anuna kɛlɛ-dannu anubɛ anuna soeenu si faga kɛlɛ rɔ.

²³ Wo tele wa ke tumɛ min, nta wɔli-kɛlɛ Sarababulu si ma nta mansa-yabɔnɛ la. Ale le si ma wo kun-tigi la nde, Mari ya ale min yabɔ.” Wo kɔma, Nɛbi Hegayi ya Mari kuman-kan wo latenbi Isirɛla mɔgɛnu ma.