Hegayi 1 - ALLALA KUMƐ

Mari Fonde Bɔ-Koe A Bato-Bɔn Wara-Koe Rɔ

¹ Pasiya nyamanɛ donta Mansa Dariyasi bolo, wo san kelen a fila nyɔgɛ, a karɛ wɔrɛ, tele fɔlɛ ma, Mari ya sarakanɛ kɛ don nde Nɛbi Hegayi bolo wo wati rɔ ka a fɔ Yuda nyamani-tigi anubɛ saraka-masɔla-kun-tigi-wɛ ye. Nyamani-tigi wo tɔgɛ le Sarababulu. A fa tɔgɛ le Siyalitiyɛli. Saraka-masɔla-kun-tigi-wɛ wo fanan tɔgɛ le Yasowa. A fa tɔgɛ le Yɛhosadaki.

² Mari Sɛnbɛ-Bɛɛ-Tigita sarakanɛ le kɛ la. A ko, “Mɔgɛnu bi a fɔla ko a wati nyɛrɛ ma ke wɛ fɔlɔn ka nde Mari Bato-Bɔn nyɔgɔn sɔ.”

³ Mari kuman-kan le kɛ la Nɛbi Hegayi ye ka a fɔ Isirɛla mɔgɛnu ye, a ko,

⁴ “Nta mɔgɛnu, nfen ya a to, wo siginɛ bon-hakikɛnu na kɔnɔ nde, Marita Bota-Bɔn wo ye wuyala?

⁵ Wo sa a yenna min bi mala wo la?

⁶ Wo ye fen-siyaman fuila kɔnɔ wo sa fen-kɛndɛ sɔrɔnna anu tɔ. Dɔn-fannu bi wo bolo kɔnɔ anu ti wo buyi lafa. Wo ye wo minna kɔnɔ wo kan la ti kimɛ. Kurɛnu bi wo bolo kɔnɔ anu ti kimɛ bɔ wo la. Wo si wodinu sɔrɔn kɔnɔ wola wodi ti sigi wo bole tɔ.

⁷ Ha bi, wo ma a lɔn min ya a to, kɛnu bi mala wo la, wa?

⁸ Wo ni yɛlɛ gbɔngbɔnnu kɔrɔ ka kɔlɔmanu malɛsɛ nyɔ ka na nde, Marita Bato-Bɔn sɔ. Ni wo ya wo ma, n si gbiliyɛ sɔrɔn wo bolo. Wo si a diya don n tɔ.

⁹ Wo yili-madiyanɛ ko wo si dɔn-fen-siyaman tɛgɛ kɔnɔ wo wa a tɛgɛ tumɛ min, a ma kolo. Wo wa na a la soe, a si ma iko fɔnyɔ wa sigi fen kɔrɔ. Nfen ya a to, n ya wo ma? Min ya a to, n ya wo ma kamasɔrɔn nta Bato-Bɔn wuyanɛ. Kɔnɔ wota bɔnnu, wo ye wonu nadanna a kin na wo nyɛrɛ ye.

¹⁰ Woletɔ bandɛ sa nala. Fenfen ti sabati a kilɛ fɛ!

¹¹ N ya tɛtɛgɛ ladon bandɛla nɛ rɔ nyamanɛ kɛ rɔ. N ma bandɛ lana wola kɔnkɛnu kuma anubɛ wola sɛnɛnu tɔ. N ma bandɛ lana wola nɔnbɔ-gbɔɛnu kuma anubɛ wola ɔlifi-tuli kɔlɔmanu kuma. N ma bandɛ lana wo fenfen kuma wobɛ wola kolo-fannu si min dɔn.”

Mari Bato-Bon-Nyɔgɔn Sɔ-Koe Tun

¹² Nyamani-Tigi Sarababulu anubɛ Saraka-Masɔla-Kun-Tigi-Wɛ Yasowa anubɛ Isirɛla mɔgɛ toenu damasi ya Mari gbiliya ka Nɛbi Hegayita kuman-kan bira iko Mari ya a fɔ a ye nya min.

¹³ Nde, Nɛbi Hegayi ya Marita kumɛ wo latenbi Isirɛla mɔgɛnu ma ko ata lanyiri le kɛ la ko ale si to anu fɛ.

^14-15 Mari ya nyamani-tigi anubɛ saraka-masɔla-kun-tigi-wɛ anubɛ Isirɛla mɔgɛ toe bɛɛ lakerinteya a Bato-Bon-wɔlɛ ma. Dariyasila mansayɛ san fila, a karɛ wɔrɛ, tele mogan-ni-nanɛ ma, Isirɛla mɔgɛnu ya anuta Mari Alla Sɛnbɛ-Bɛɛ-Tigita Bato-Bon-sɔɛ dabira wulɔn.