Habakuku 3 - ALLALA KUMƐ

Alla Matara-Koe Nɛbi Habakuku Bolo

¹ Nɛbi Habakukuta mataralɛ le kɛ la.

² Mari, i wara koe min bɛɛsi ma nun, n bara wonu namɔɛn. N bara kawa wonuna ko la. I taranta ko-makawanɛ minnu kɛla nun, a sɔgɛ ye n na, i ni wonu ma tun mata wati kɛ rɔ. Hali i fonde bɔnɛ, i ni kinikini ma ma.

³ Ile Alla ye nala tun ka bɔ Idɔm nyamanɛ rɔ. Ile Alla min sɛnima, ile si na ka bɔ Paran kɔnkɔ nyamanɛ rɔ. Duninya anubɛ san-kole lafanɛ ile Allata kinyɛ la min si a ma, mɔgɛ bɛɛ ni i tanto dugu-kole bɛɛ kuma.

⁴ I namatoe-mɛnsan ye tiila i ma iko san-sɛran. Ile Allata fanka-dogonnɛ i kɔɛn min tɔ, wo mɛnsan ye tiila i ma.

⁵ I si kiraya-fitinɛ lata i yarɔ. Sayɛ si ile sagaran.

⁶ Ile Alla wa dan kan min, dugu si yɛrɛyɛrɛn nyɔ rɔ. Hali i wa i kolan tɔnkɔn sɔ minnu na, wonu kun ma si kɔ. Kɔnkɛ minnu bara mɛ, wonu si tii nya-kun-kelen ka ma lɛɛ la. Hali i wara i tontɛ sɔ kɔnkɛ minnu kuma nun, wonu fanan si tii mɛmɛ!

⁷ N ya a yen nna ko-rayirɛ rɔ, Kusan-kebila-mɔgɛnu bi kilanna dɔgɔma-ma-de! Midiya kɛnu bi yɛrɛyɛrɛnna kilan bolo.

⁸ Mari, ila fondo-bɔɛ le ya a ma, i ya yinu gbesi a rɔ ka kɔgɔ-yi fara? I kɔrɔtɔnɛ anu ma, wa? Ade, i nara i mayiginɛ banda-finyɛnu kuma ka nɔlɛ di ila mɔgɛnu ma.

⁹ I ya banda-nyin-masɔgɛ rabɛn i yogenu bon-koe la. Ila yinu bara dugi rafara warr!

¹⁰ Kɔnkɛnu bara i yen tumɛ min, anu tora yɛrɛyɛrɛnna. San-kole ya a dɛ bɔ banda-yi kɔrɔ. Yi min bi dugu kɔrɔ, wo ya dugi punsɔgɔ kurɔn bolo. A tora tugula a rɔ.

¹¹ Ila banda-nyin-masɔgɛ-mɛnsan tenbi tiila a ma, ado anu bi malan-malanna, wo kɔma, tele anubɛ karɛ tora sɔni anu gbɛ rɔ.

¹² I fondo-bɔnɛ ya duninya ratɛgɛ i sako la. I fondo-bɔnɛ ya sibolo-gbɛrɛnu nunku i tontɛ la.

¹³ I tara ila mɔgɛnu nakanan-tinɛ ka ta ila mansa-yabɔnɛ kisi. Mɔgɛ minnu karagbɛlɛ, i wara wonuna kun-tigi kasara ka a gba-fɛ-bilalɛnu halaki pɔ!

¹⁴ Anuna kɛlɛ-dannu nara ma kan ma tumɛ min iko fɔnyɔ ka ma ranyɛnsɛn, anu bara anu nyɛrɛ kɔrɔbi iko minnu bi bolo-kolɔnnu tɔrɔla dogɔn tɔ kɔnɔ ila banda-nyin-masɔgɛ donta anuna kɛlɛ-den-kunyɛ rɔ pirin!

¹⁵ Ila soeenu ya kɔgɔ-yi ratɛntɛn ha a kanfara.

¹⁶ N ya kɛ damasi lamɔɛn tumɛ min, n kumakɔra. N da-gbole tora yɛrɛyɛrɛnna kumakɔɛ bolo. N kolenu mara yɔrɔyɔrɔ! N kiannu tora yɛrɛyɛrɛnna n kɔrɔ sigisigi! Kɔnɔ n si n tade ka ma yogenu tɔrɔ-tele makɔnɔ Mari bolo.

¹⁷ Hali toro-gbɔ sa a la, hali nɔnbɔ-gbɔ sa a la, hali ɔlifi-gbɔ sa a la, hali ki-fen sa mala-a-la ma bolo, hali mala sagɛ dama fagara, mala wɔrɛ ta ni kolonya

¹⁸ kɔnɔ hali wo, n si nyagalen ka sewa bawo Mari Alla le nna kisilɛ la.

¹⁹ Ma tigi Mari le n sɛnbɛ la. A ya n kian banban dugi ma iko mina ka n nakanan kɔnkɛnu kuma.