Habakuku 1 - ALLALA KUMƐ

¹ Mari ya kilayɛ min di nde, Nɛbi Habakuku ma ko-rayirɛ rɔ, wo le kɛ la.

Mari Manyinika-Koe Telenbɛlɛnuna Ko La

² E, Mari, n si to i rakelela n dɛnbɛn-koe la ha wati nyamintan? Ma ye nyinina ita dɛnbɛnɛ ma karagbɛlɛnuna ko la kɔnɔ i sa ma denkunna.

³ N nafoonɛ karagbɛlɛnu anubɛ kasara-kɛlɛnu na pito! Mɔgɛnu bi buila anu nyɔgɔn ma ka wunduyogoya-su bɛɛ sigi anu nyɔgɔn na kan-tinɛ bɛɛ rɔ. Nfenna i ye a mala, nde ye wonu tayenna n yɛ la? Nfenna Mari, ile nyɛrɛ ye ko-sufa kɛnu tayenna ka i munyu wonu kɔrɔ?

⁴ Mɔgɔ-wo-mɔgɔla ko sa tɔn wara-koe rɔ tun bawo sɛnbɛ sa a rɔ. Kiti-tɛgɛlɛnu sa kiti tɛgɛla a kilɛ fɛ tun. Tuma-wo-tuma, mɔgɔ-telenbɛlɛnu kɛnɛna mɔgɔ-telennɛnu nɔla kiti rɔ. Anu bi tonyɛ yɛlɛmana foninyɛ la.

Kuma Yabi-Koe Mari Bolo

⁵ Mari ya a fɔ ala mɔgɛnu ye ko, “Wo ni sibole doinu mafɛlɛn minnu bi wola foolɛ rɔ. Wo ye min tayenna wo yɛ la, wo si wo tɛrɛna. N bi nala koe min mala wota wati kɛ rɔ, hali wo wa wo lamɔɛn, wo ti la a la.

⁶ Babilɔn kɛ minnu karagbɛlɛ, ado anu yisi lakala kati, n bi nala sɛnbɛ dila anu ma mɔgɛnu kan ma. Anu bara wuli buila sibolo-gbɛrɛnu ma ka anuna nyamanɛnu bi anu bolo.

⁷ Mɔgɛ minnu ba anu mankan lamɔɛn, anu kun ma si kɔ kilan bolo. Babilɔn kɛnu wasinɛ. Anu denu mirinɛ ko anu ya ko-wo-ko ma, wo telennɛ anu yala.

⁸ “Anuna soeenu bi anu burila ka tenbi kuli la. Soee wonu makilannɛ ka tenbi suluku-kɔnkɔtoe la. Anuna so-laburilɛnu nara le ka bɔ wula-yan la pon! Soee wonu bi anu matɛnna buri-kɛ-koe la. So-laburilɛnu anubɛ anuna soee wonu si yigi anu yogenu kan ma fii iko tanbakɔrɔmanɛ si yigi sisi-dan kan ma nya min!

⁹ “Anuna kɛlɛ-dannu bi tala nyamanɛnu birala a la. Anu ba anu kun nabɔ kan min, bɛɛ si kilan. Anu ya minnu bira kɛlɛ rɔ, wonu siya iko ba-kɛnkɛn.

¹⁰ Anu si nyamani-tiginu nafɛya. Anu ma mɔgɔ-banu lɔn fenfen na. Ni anu ya tara-minini taran soe min ma, anu si bɔnkɛ ladɛn wo fɛ ka yigi a burɔ tiriya!

¹¹ Anu bi nala le iko fɔnyɔ ka tenbi. Anu yilikinɛ bawo anu yigi sanɛ anu fanka rɔ iko mɔgɛ doinu si a yigi sa Alla rɔ nya min.”

Mari Manyinika-Koe Tun Nɛbi Habakuku Bolo

¹² Mari, kebi fɔlɔ, Alla le ile la, ado ndeta Alla-sɛnimɛ le ile la, Habadan Alla, kɔni. Ile ye ma lakananna kɔnɔ yaga, i wara Babilɔn kɛnu fanka don alako anu ni ma tɔrɔ.

¹³ Kɔnɔ Mari, ile si ke i munyuna karagbɛlɛ wonu kɔrɔ kama? I kolan sɛnima karagbɛlɛ wonu mafɛlan ma. I ti to i kolan bɛnna karagbɛlɛ wonu ma. Anu tenbi mɔgɔ-latelennɛnu kasarala wati min, nfenna i si i made, i ti kuma? Anu bi min kasarala, wonu telenta ka tenbi anu denu na.

¹⁴ Nfenna i ye mɔgɛnu bira boloko-yogomɛ-kɛla iko mɔgɛ si yɛgɛ anubɛ mɛnɛ-mɛnɛnɛnu bira boloko-yogomɛ-kɛ nya min bawo kun-tigi sa wonu bolo min si anu kumafunfan?

¹⁵ Babilɔn kɛnu bi mɔgɛnu birala lunyɛnu na iko lun-nakɛlɛ si yɛgɛ bira nya min. Anu bi mɔgɛnu birala yalɛnu na ka sewa mɔgɔ-biranɛ wonuna ko la iko yungbun-kɛlɛ si sewa yɛgɛ biranɛnuna ko la nya min.

¹⁶ Anu ba ban wo la, anu ni don anuna yalɛ wonu batoe rɔ ka sarakɛ bɔ wonu ye bawo anu bi nyinina fan min bɛɛsi ma, anu bi wonu sɔrɔnna yalɛ wonu tɔ.

¹⁷ Anu si to anuna yalɛnu takolonyala ka to mɔgɛnu fagala tolon, kinikini sa anu tɔ, wa?