Filipai 4 - ALLALA KUMƐ

Sewa-Koe Mari Rɔ

¹ Woletɔ n na-kelen-nyɔgɛnu, wola ko di n ye dɛɛ! Wo yen-sɔgɛ ye n na bɛrɛkɛ! Wo ara n nasewa kati, ado n wasinɛ wola ko la a nya ma. N diyana na-kelen-nyɔgɛnu, wo ni wo sɔ gben Marila koe rɔ.

² Yuyodiya anubɛ Sintiki, wo yandi, n bi wo madiyala. Wo ni wo raya ka diya wo nyɔgɔn ye iko na-kelenmɛnu Mari rɔ.

³ Ile bɛrɛn Timoti, n ta-nyɔgɛ lanaya-mɔgɛ le ile la. N bi a fɛ, i ni musi wonu dɛnbɛ bawo anu bara wɔli n fɛ kati! Anubɛ Kalɛmɛnti ara kibara-nyimɛ nyɛnsɛn anubɛ n ta-nyɔgɛ minnu bɛɛ tɔgɛ sɛbɛnɛ Allata nimaya-buku rɔ.

⁴ Alamɛ Mari ya sewɛ di wo ma tumɛ bɛɛ. N bi a fɔla tun ko wo ni nyagalen dɛɛ!

⁵ Mɔgɛ bɛɛ ni a lɔn ko wo dinyanɛ, ado Mari na-tumɛ ara gbɛrɛn!

⁶ Wo kana hɔn ko-wo-ko la fɔ ka to wo makoenu fɔla Alla ye madiyalɛ rɔ. Wo ni baraka bira a ye wo yisi bɛɛ la tumɛ bɛɛ.

⁷ Nba, Allata yisi-kimɛ min tenbinɛ hadama-den-hɛnkili bɛɛ dan la, wo si wo yisi anubɛ wo hɛnkili kandan Kirasiti Yisa rɔ.

⁸ Ala ban, n na-kelen-nyɔgɛnu, tonyɛ ye koe min bɛɛ la wo, tantolɛ ye min tɔ wo, koe min bɛɛ telennɛ wo, koe min bɛɛ sɛnima wo, koe min bɛɛ kin wo, koe min bɛɛ bɛnnɛ wo, koe min bɛɛ kɛndɛ wo, gbiliyɛ ye min bɛɛ rɔ wo, wo ni wo hɛnkili to wonu denu ma tolon!

⁹ Wo ara koe minnu karan nde bolo, wo ni wonu kɛ. Ni a mara kumɛ la wo ya min namɔɛn n bolo wo, ni ko do le wo ya n yen min mala wo, alako dɔrɔn, wo ni wonu kɛ tun! Alla min bi yisi-kimɛ dila ma ma, wo si to wo fɛ.

Baraka-Birɛ Wara-Koe

¹⁰ N sewanɛ Mari rɔ kati! A ara wati-yan bɔ, wo ma wo miri n ma n dɛnbɛn-koe la kɔnɔ tɔ-a-la, nna ko-nyimɛ ye wo burɔ. N bara a lɔn ko nna hɔnya ye wo la. Wo ma fɛrɛ le sɔrɔn ka a mayira gbɛ rɔ dɔrɔn.

¹¹ N sa kɛ bɛɛ fɔla bawo n bolo-kolonyanɛ. N bara hɛnkili sɔrɔn ko min bi n bolo, wo ni n wasa.

¹² N ya bolo-kolonyɛ lɔn. N ya nɔnfulu-tigiyɛ lɔn. N bara hɛnkili sɔrɔn ko kelen de ma, n fanɛ wo, n kɔnkɔtoe wo, wo ni n wasa. Fen siyaman bi n bolo wo, ni doni dɔrɔn de n bolo wo, fɔ wo ni n wasa. N ni a ma wo nya kan tinɛ bɛɛ anubɛ wati bɛɛ.

¹³ Sɛnbɛ ye n bolo ka koe bɛɛ kɛ Kirasiti le baraka rɔ.

¹⁴ Hali wo, wo ya n dɛnbɛ nta tɔrɔyɛ rɔ min kɛ, wo bɛnta kati!

¹⁵ Wole Filipai kɛnu nyɛrɛ ya a lɔn serr, ko n wuli-san le kibara-nyima-kawandili bɔla, n bɔ-san Masidoniya tumɛ min, chɔchi-gbɛrɛ ma n dɛnbɛ fɔ wole. Wole le dɔrɔn ya tɔnɛ anubɛ bɔnɛ sɔrɔn n fɛ.

¹⁶ N bi Tɛsalonaika tumɛ min, n makoe taranta dɛnbɛnɛ la, wo ya a lata n ma le, ado a ma dan kinyama kelen dɔrɔn ma

¹⁷ A ma ma, n makoe ye kɔ-fen na wo bolo. Min fisa, n ni to wo yenna sabatila ka a tɛgɛ wota foninsereyɛ ma. Wo le di n ye,

¹⁸ ado n bara fan min bɛɛ sɔrɔn wo bolo, n si baraka bira wo ye wonuna ko la. Fan wonu bara siyaya ha ka wara! N makoe taranta min bɛɛ la, n bara wo bɛɛ sɔrɔn kaka bawo Ɛpaforodaita ara na n sanbɛnu na, wo ya minnu don a bolo n ye. Wonu manɛ Alla ye iko saraka-suma-diyamɛ minnu ya a hɛnɛ feu!

¹⁹ Nba, nta Alla si wo makoe bɛɛ nyinya iko ala nɔnfulu-waranɛ ye nya min Kirasiti Yisa rɔ.

²⁰ Gbiliyɛ ni di ma Fa Alla ma habadan! Amina!

Kɔndɔli Labannu

²¹ N bi Allala mɔgɛ bɛɛ kɔndɔnna, Kirasiti Yisala mɔgɛnu, kɔni. Wo na-kelen-nyɔgɛ minnu bi n fɛ yan, wonu bi wo kɔndɔnna.

²² Allala mɔgɛ min bɛɛ ye yan ko ka wo kɔndɔn, katarala minnu bi nyamani-tigila bɔn la.

²³ Alamɛ Mari Yisa, Allata-Mɔgɔ-Yabɔnɛla hinɛ tora wo dama fɛ.