Filipai 2 - ALLALA KUMƐ

Kirasitita Famayigi anubɛ A Mankan-Wɛ

¹ Ka a fɔ ko Kirasiti siginɛ wo yisi rɔ, kumɛ wo ti wo sɛnbɛ don, ba? Ala keninteyɛ ti wo yisi-kimɛ, wa? Wo ye ta-nyɔgɔnyɛ kɛla ata Ni-Sɛnimɛ baraka rɔ, a sa wo nya? Wo sa kinikinɛ anubɛ nyɔgɔn-keni kɛla, wa?

² Nba, ni tonyɛ le wo bɛɛ la, n bi wo madiyala ko wo ni nna sewɛ lakanbali worɔ. Miriya kelen anubɛ keninteya kelen ni taran wo tɛma. Wo sɔndɔmɛ anubɛ wo hɛnkili fanan ni ma kelen na.

³ Wo kana ko-wo-ko kɛ ka a bɛn wo nyɛrɛta nata ma. Wo kana ko ladan min si a ma, wo ni wo nyɛrɛ kɔrɔbi nya min. Wo ni wo famayigi wo nyɔgɔn ye. Wo kana ko ladan min si a yira ko wo fisa wo nyɔgɔn ko mumɛ!

⁴ Wo kana to hɔnna wo nyɛrɛ la dɔrɔn, wo ni hina doinu fanan na.

⁵ Kɛ-nya min bi Kirasiti Yisa bolo, wo ni wo le bi.

⁶ Alla kɛ-nya-nyɛrɛ ye a bolo kebi fɔlɔ kɔnɔ a ma a miri ko anubɛ Alla rakɛnyanɛ ni to wo nya fɔrɔsɛ la.

⁷ A ya wo bɛɛ boloka a nyɛrɛ sako la ka kɔrɔ-wɔli-kɛlɛ sɔn bi. A sɔrɔnta iko mɔgɛ ka bɔ gbɛ rɔ mɔgɔyɛ muninyɛ rɔ.

⁸ A ya a famayigi ka Allala kumɛ bira ha a donta sayɛ rɔ. A fagara kɔlɔma ma iko ko-yogoma-kɛlɛ.

⁹ Wola ko la, Alla ya a layɛlɛ san-kole rɔ pon! A ya tɔgɛ di a ma min si a yira ko a tenbira bɛɛ la.

¹⁰ Woletɔ min bɛɛ ye san-kole rɔ anubɛ dugu-kole kuma anubɛ minnu bi dugu-kole kɔrɔ, wonu si anu nyɛnkin Yisa kɔrɔ ka a gbiliya.

¹¹ Bɛɛ si a lawɔyɔ gbɛ rɔ ko Yisa Kirasiti, Mari le. Bɛɛ si ma Fa Alla gbiliya kumɛ wo la.

Duninyata Waan Wara-Koe

¹² Woletɔ n na-kelen-nyɔgɛnu, iko wo ara nna kumɛ bira nya min, n bi wo fɛ nyɔ tumɛ min, wo ni a bira wo nya kaka gben, hali n sa wo fɛ nyɔ. Wo ni wo raya ko wola sɔn-nyimayɛ la ni kanbali kilan anubɛ yɛrɛyɛran rɔ.

¹³ Ado nfan, Alla ye wɔlila wole rɔ wati bɛɛ alako a ni diya wo ye ka a sako kɛ, ado a ye sɛnbɛ dila wo ma ka wo ma.

¹⁴ Wo tenbi ko-wo-ko kɛla, wo kana a kɛ gbunyɛ rɔ. Wo kana sɔsɔli sa wo nyɔgɔn tɛma.

^15-16 Wo ni ma Allala den-sɛninyanɛnu na minnu telennɛ, ado fɛɛ-wo-fɛɛ sa wole la. Hali wo siginɛ duninya-mɔgɔ-radunɛnu anubɛ mɔgɔ-yogomɛnu tɛma, wo tenbi anu makawandila nimaya-kumɛ la, wole ni malan iko lolenu. Ni wo ya wo ma, Kirasiti wa na lunyɛ min, n si n nyɛrɛ-matɔgɔ-kunya sɔrɔn wola ko la worɔ, ado a si gbɛ bɛɛ yala ko nta wɔlɛ ma kɛ fu!

^17-18 Wola dɛnkɛninyɛ fanan manɛ iko sarakɛ min bi bɔla Alla ye. Tumado, n nyɛrɛ yele ye nala bonna wola sarakɛ kuma gbɛ! Wo si ma iko kɔ-fan min dinɛ Alla ma. Ni a ye wo nya le, n sewanɛ worɔ. Ma ni nyagalen ma nyɔgɔn fɛ wona.

Timoti anubɛ Ɛpaforodaita

¹⁹ Ni n Mari Yisa sɔnta, n si Timoti lata wo ma yona, woletɔ n ba wo wara-koe lamɔɛn, n yisi si kimɛ.

²⁰ Male dɛnkɛninya-mɔgɛnu tɛma, wola ko siginɛ mabɛ Timoti le dɔrɔn yisi rɔ gben!

²¹ Mɔgɔ-toe bɛɛ ye hɔnna a nyɛrɛta koenu denu dɔrɔn na, Yisa Kirasitila koenu ma de!

²² Wole nyɛrɛ ya a lɔn Timoti mara lanaya-mɔgɛ la nya min. Ale ara ma n ye iko n nyɛrɛta dan, ado a wɔlita nde fɛ kibara-nyimɛla ko la.

²³ Nba, n ba nna koenu tagbɛ tumɛ min, a sɔgɛ ye n na ka a lata wo ma yona.

²⁴ Ni Mari sɔnta, nde nyɛrɛ si na wo wara yona.

²⁵ Ma na-kelen-nyɔgɛ Ɛpaforodaita, n bara a latɛgɛ ko n ni wo lata wo ma. Ma ara wɔli ma nyɔgɔn fɛ kan kelen tɔ. Ale ara ma wola kilayɛ la n dɛnbɛn tinɛ.

²⁶ A sɔgɛ ye a la ka wo dama yen, ado a yisi sani ma bawo wo ara a lamɔɛn ko a kirayara.

²⁷ Tonyɛ le, a kirayara le. A tora doni, a ni faga kɔnɔ Alla kinikinita a ma, ado ni a lakirayara wo nya, wo si ma tɔrɔya-dan-natenbinɛ la n bolo. Alla ya n tanka wo ma ka kinikini nde fanan ma.

²⁸ Woletɔ n bara n taya nya bɛɛ ma ka a lata wo ma. Wo si a ma, wo wa a yen tumɛ min, wo si sewa tun, ado wo si a ma fanan, nde nyɛrɛ yisi ni sa.

²⁹ Wo ni ale Ɛpaforodaita rabira sewɛ bɛɛ la iko wo na-kelen-nyɔgɛ Mari rɔ. Mɔgɛ min bɛɛ ye iko ale ye nya min, wo ni wonu gbiliya

³⁰ bawo a ma a nyɛrɛ niyi lɔn fenfen na. A tora doni, a ni faga Kirasitila wɔlɛla ko la. A ya wo ma alako wota dɛnbɛnɛ dasara kan min, a ni wo dafa n ye.