Failiman 1 - ALLALA KUMƐ

¹ Nde, Pɔli min bi yele la Yisa Kirasitila ko la anubɛ ma na-kelen-nyɔgɛ Timoti, male le ye kɛdi kɛ sɛbɛla i ma. Ma ye a latala ile Failiman ma, ma diyana-mɔgɛ anubɛ ma wɔli-kɛ-nyɔgɛ, kɔni.

² Ma ye a latalala chɔchi-mɔgɛnu fanan ma minnu nadɛnnɛ ila bɔn la. Ma ye a latala ma na-kelen-nyɔgɔ-musumɛ Afiya ma, mabɛ min bi dɛnkɛninyɛ rɔ. Ma ye a latala ma wɔli-kɛ-nyɔgɛ Akipasi fanan ma.

³ Alamɛ ma Fa Alla anubɛ Mari Yisa, Allata-Mɔgɔ-Yabɔnɛla hinɛ ni to ma fɛ ka yisi-kimɛ di i ma.

Failimanna Keninteyɛ anubɛ Ala Dɛnkɛninyɛ

⁴ N na-kelen-nyɔgɛ Failiman, n ba Alla madiya tuma-wo-tuma, n bi madiyali kɛla i ye. N si baraka bira nta Alla ye

⁵ ka a tɛgɛ ila diyanayɛ Allala mɔgɛ bɛɛ ma. N bara ila dɛnkɛninya-koe fanan namɔɛn min bi Mari Yisa rɔ.

⁶ N bi Alla madiyala ko ma ye ta-nyɔgɔnyɛ min kɛla i fɛ dɛnkɛninyɛ rɔ, wo ni a ma, i ni Allata duwɛ bɛɛ nya-yen, ado Alla ya min bɛɛ ma ma ye, wo ye ma bolo Kirasiti baraka rɔ.

⁷ N diyana na-kelen-nyɔgɛ, ila keninteyɛ ara ma lasewa bɛrɛkɛ! A ara yisi-latɛgɛ-ba di n ma. I wara Allala mɔgɛ bɛɛ yisi lakuraya.

Pɔlita Madiyalɛ Onɛsimala Ko La

⁸ I na-kelen-nyɔgɛ le nde la Kirasiti rɔ min kɛ, sɛnbɛ ye n bolo ka a fɔ i ye i si min ma.

⁹ Kɔnɔ hali wo, keninteyɛ ye a mala, n bi i madiyala. Hali n bi yele la Yisa Kirasitila ko la, nde, kɛmɔgɛ Pɔli, n bi i madiyala.

¹⁰ Nba, n bi i madiyala ila yɔɔn, Onɛsimala ko la. Nna dan le ale la Kirasiti rɔ. N mara a fa la Allata Ni-Sɛnimɛ rɔ, wo tumɛ ma filɛ ye biralɛ rɔ.

¹¹ A ma ko-wo-ko nyinya i ma fɔlɔ-nun kɔnɔ kaka, a ye ko nyinyala ma dama ma, ile wo, nde wo.

¹² N bi a lasɛgila i ma kaka, ado ale di n ye kati!

¹³ N bi a fɛ nun ko n tenbi yele la kibara-nyimɛla ko la, n ni a mara n fɛ yan. Woletɔ a si n dɛnbɛ ile gbɛ rɔ.

¹⁴ N sa a fɛ ka i fɔrɔsɛ ko fɔ i ni n dɛnbɛ. N bi a fɛ ko i ni a kɛ i nyɛrɛ sako la. Woletɔ n ti ko-wo-ko kɛ fɔ i wa sɔn.

¹⁵ Onɛsima kɛ ya a buri i kɔrɔ wati-kundunɛ kɔrɔ. Tumado, wo mara alako a ni ma itɛ la tun tɛban,

¹⁶ ado yɔɔn dɔrɔn ma a la tun kaka. A ara tenbi yɔɔn la gbɛ! I na-kelen-nyɔgɛ le Kirasiti rɔ. Ale di nde ye kati, ado a si diya ile ye ko-nya filɛ bɛɛ ma bawo ila yɔɔn le anubɛ i na-kelen-nyɔgɛ Mari rɔ!

¹⁷ Woletɔ ni i wara n lɔn i ta-nyɔgɛ la, i ni ale rabira tun iko i si nde rabira nya min.

¹⁸ Ni a ya ko-yogo wo ko-yogo kɛ i la, ni ila fenfen bi a bolo, i ni i yɛ sɔ nde la.

¹⁹ N bi a sɛbɛla n nyɛrɛ bole la ko nde, Pɔli si ala yili sara tun. Nba, nna yili min bi ile la ni-kurɛla ko la, n ti i hɛnkili bila wo la.

²⁰ Woletɔ n na-kelen-nyɔgɛ, i yandi, i ni ko-kɛndɛ kelan kɛ kɛ n ye Marila ko la. I ni nde lasewa, i na-kelen-nyɔgɛ Kirasiti rɔ!

²¹ N lanɛ a la ko n bara i madiya min na, i si wo kɛ n ye. Woletɔ n bi kɛdi kɛ sɛbɛla i ma. N ya a lɔn ko i si a kɛ hali min tenbira n kuman-kan kɛ la.

²² Min sanɛ wo kuma, i ni n yiya-bɔn rabɛn n ye bawo n lanɛ a la ko Alla si wo damata madiyalɛ yabi. A si n nasɛgi wo ma tun.

Kɔndɔli Labannu

²³ Ɛpafarasi min bi yele la n fɛ Kirasiti Yisala ko la, wo ye wo kɔndɔnna.

²⁴ N wɔli-kɛ-nyɔgɛnu fanan bi wo kɔndɔnna, wo le Maraka anubɛ Aritaka anubɛ Dimasi anubɛ Luka, kɔni.

²⁵ Alamɛ Mari Yisa, Allata-Mɔgɔ-Yabɔnɛla hinɛ tora wo dama fɛ.