Ɛsira 9 - ALLALA KUMƐ

Furi-Koe anubɛ Sibolo-Gbɛrɛnu Tɛma

¹ Kɛ dama kanɛ a la, Isirɛla mɔgɔ-ba donu nara a fɔ n ye ko, “A saraka-masɔla wo, a Lifayi wo, a Isirɛla mɔgɔ wo, anu do-wo-do ma sɔn sibolo-gbɛrɛnu masangbala minnu bi mala foolɛ rɔ. Anu taranta basanna Amon kɛnu anubɛ Mohabu kɛnu anubɛ Iyipiti kɛnu na. Kenannu wo, Hɛtinu wo, Perasanu wo, Yɛbusinu wo, anubɛ Amoranu, anu taranta basanni wonu na, ado anu bi kisimiriya-koenu mala iko mɔgɛ wonu bi a mala nya min.

² Isirɛla keinu bi musinu furula sibolo-gbɛrɛ kɛnu tɔ. Anu ya wo ma min kɛ, wo le wara a ma, male Allata mɔgɛnu na ara tinya, ado kun-tiginu anubɛ mɔgɔ-banu denu fɔlɔn ya ko-yogomɛ-kɛ dabira.”

³ Kuma sufa kɛ lamɔɛn n bolo, n ya nna duruki rafara n kan na ka n kun-sigi anubɛ n buyɛ mawurun yisi-tinya bolo. N yisi-tinyanɛ ya n sigi dugi ma.

⁴ N tora sigini nyɔ ha wurala-saraka-bɔ-wati. Mɔgɛnu nara anu kinki n na, katarala minnu bara kilan ka a tɛgɛ Alla ara min fɔ mɔgɔ-birani-kɔrɛ wonuna hakɛla ko rɔ.

⁵ Wurala-saraka-bɔ-wati kenɛ, n ya n nasɔ n gbɛ rɔ, n bi dila kan min nun, ado wati wo bɛɛ ya a taran, nna duruki rafaranɛ n kan na. N ya n kunbelan gbangban dugi ma ka n bolo filɛ rasagan nta Mari Alla ye san ma.

⁶ N ya a matara, n ko, “E, nta Alla, n bara miliya n kunyɛ kɔrɔbila i ye. Ni ma ya mala hakɛnu nadɛn, wonu kun ta si yanya ma ko iko san-kole fɛ-yan ma la nya min.

⁷ Ka a bi ma benbanuta wati ma ha kaka, male, ita mɔgɛnu, ma hakɛ dan na ara tenbi. Ka a tɛgɛ ma hakɛnuna ko ma, mabɛ mala mansɛnu anubɛ mala saraka-masɔlɛnu kunyɛ ara don sibolo-gbɛrɛnu bolo. Anu bara ma mafaga ka ta mabɛ ma bolo-fannu na biralɛ rɔ pon! Anu bara ma layarabi kosɛbɛ, ado ha bi, ma ye yarabi kelan wo le kɔrɔ.

⁸ E, mata Mari Alla, i nyimayanɛ ma wara la bawo i ya a ma, donu kunyɛ ara bɔ biralɛ rɔ wati-kundunɛ kɛ kɔrɔ. I ya a ma, ma sigira lafɛrɛ rɔ kan-tina-sɛnimɛ kɛ rɔ. I wara ma kunyɛ labɔ yɔɔnyɛ rɔ ka ma hɔrɔya.

⁹ Hali ma ye yɔɔnyɛ rɔ, i ma nyina ma ko. I ya a ma, ma diyara Pasiya mansɛnu ye kɔikɔi! Anu ya ma to ma niyi la ka ma masara alako ma si ke i Bato-Bɔn sɔla nya min, ado Bɔn wo ara tii nun mɛmɛ! I ya a ma, ma sigira Yuda anubɛ Yerusalɛm ma fanbolo fanan.

^10-11 “E, Alla, male si nfen fɔ kɛ kɔma gbɛ? I ya tɔn minnu fɔ ila nɛbinu ye, ma ara wonu tinya. Nɛbinu ya a fɔ ma ye nun ko ma ye nala sigila nyamanɛ min tɔ, nyamanɛ wo bɛɛ latinyani de! Ko-yogoma-su bɛɛ ye nyɔ.

¹² Nɛbi wonu ya a fɔ ma ye ko furu-nyɔgɔnya kana don mabɛ mɔgɛ kɛnu tɛma. Anu ko, ni a sɔgɛ ye ma la, ma ni nyamanɛ kɛ diya bɔ, ma kana mɔgɛ kɛnu dɛnbɛ yarɔma-tɛ rɔ. Anu ko ni ma ma wo ma, ma ti ke nyamanɛ kɛ mala ma kegeyɛnutɛ la.

¹³ Hali tɔrɔyɛ min bɛɛ ara sigi ma la ka a tɛgɛ mala hakɛla ko ma, wo ma a bɔ iko a bɛnta, ma ni tɔrɔ nya min. I wara sɔn alako do ni to anu niyi la ma tɛma.

¹⁴ Wo rɔ, a ma bɛn, ma ni tɔn kɛnu boloka tun ka furu-nyɔgɔnyɛ ladon mabɛ mɔgɔ-yogomɛ kɛnu tɛma. Ni ma ya ma tui ka wo ma, i si ma lato dogbe! Hali mɔgɔ-den-kelan, a ti to a niyi la.

¹⁵ I yandi, Isirɛlata Mari Alla, i ti sɔn ko-radunɛ ma kɔnɔ hali wo, i wara ma to ma niyi la. Ma ara ma sɔ a la ko yo sa ma bolo. A ma bɛn ko ma ni ma sɔ i yakɔrɔ lefan!”