Ɛsira 8 - ALLALA KUMƐ

Mɔgɔ-Birani-Kɔrɛ minnu Sɛgira Ɛsira Fɛ

¹ Mansa Atasakasita wati rɔ, mɔgɔ-birani-kɔrɛ minnu sɛgira Yerusalɛm ka bɔ Babilɔn nyamanɛ rɔ, wonuna kebila-kunyɛ tɔgɛ le kɛnu na.

² Kɛrisɔn sɛgira ka bɔ Finihasi bɔnsɔn rɔ. Daniyɛli sɛgira ka bɔ Itamarayi bɔnsɔn rɔ.

³ Sɛkanayala den Hatusi sɛgira ka bɔ Mansa Dawuda bɔnsɔn rɔ. Sakaraya sɛgira ka bɔ Parɔsi bɔnsɔn rɔ. Mɔgɔ kɛmɛ ani mɔgɔ bi-loli bɔra Parɔsi bɔnsɔn wo rɔ ka bila Sakaraya fɛ.

⁴ Sɛrahayala den Ɛlihoyinayi sɛgira ka bɔ Pehati-Mohabu bɔnsɔn rɔ. Mɔgɔ kɛmɛ fila bɔra Pehati-Mohabu bɔnsɔn wo rɔ ka bila Ɛlihoyinayi fɛ.

⁵ Yahasayɛlila den Sɛkanaya sɛgira ka bɔ Satu bɔnsɔn rɔ. Mɔgɔ kɛmɛ sawa bɔra Satu bɔnsɔn wo rɔ ka bila Sɛkanaya fɛ.

⁶ Yonatanna den Ibɛdi sɛgira ka bɔ Eden bɔnsɔn rɔ. Mɔgɔ bi-loli bɔra Eden bɔnsɔn wo rɔ ka bila Ibɛdi fɛ.

⁷ Atalayala den Yɛsaya sɛgira ka bɔ Ilam bɔnsɔn rɔ. Mɔgɔ bi-wɔrɔnfila bɔra Ilam bɔnsɔn wo rɔ ka bila Yɛsaya fɛ.

⁸ Maikalila den Sebadaya sɛgira ka bɔ Sɛfataya bɔnsɔn rɔ. Mɔgɔ bi-segin bɔra Sɛfataya bɔnsɔn wo rɔ ka bila Sebadaya fɛ.

⁹ Yɛhiyɛlila den Hɔbadaya sɛgira ka bɔ Yohabu bɔnsɔn rɔ. Mɔgɔ kɛmɛ fila ani mɔgɔ tan-ni-segin bɔra Yohabu bɔnsɔn wo rɔ ka bila Hɔbadaya fɛ.

¹⁰ Yɔsefayala den Sɛlomiti sɛgira ka bɔ Bani bɔnsɔn rɔ. Mɔgɔ kɛmɛ ani mɔgɔ bi-wɔrɔ bɔra Bani bɔnsɔn wo rɔ ka bila Sɛlomiti fɛ.

¹¹ Bibeyaila den Sakaraya sɛgira ka bɔ Bibeyai bɔnsɔn rɔ. Mɔgɔ mogan-ni-segin bɔra Bibeyai bɔnsɔn wo rɔ ka bila Sakaraya fɛ.

¹² Hakatanla den Yohenan sɛgira ka bɔ Asigadi bɔnsɔn rɔ. Mɔgɔ kɛmɛ ani mɔgɔ tan bɔra Asigadi bɔnsɔn wo rɔ ka bila Yohanan fɛ.

¹³ Ilifɛlɛti anubɛ Yuwɛli anubɛ Sɛmaya sɛgira ka bɔ Adonaikam bɔnsɔn rɔ. Mɔgɔ bi-wɔrɔ bɔra Adonaikam bɔnsɔn wo rɔ ka bila mɔgɔ sawɛ kɛnu fɛ. Kɛnu ma na doinu fɛ bawo anu tora gbɛ la.

¹⁴ Yutayi anubɛ Sakara sɛgira ka bɔ Begifeyai bɔnsɔn rɔ. Mɔgɔ bi-wɔrɔnfila bɔra Begifeyai bɔnsɔn wo rɔ ka bila mɔgɔ filɛ kɛnu fɛ.

Lifayinu Nyini-Koe Bato-Bɔnla Ko La

¹⁵ Nde, Ɛsira ya nyama kɛ kundɛn bɛ do fɛ min bi yigila Ahefa soe kɔma. Tele sawa, ma daga makɛnɛ nyɔ. Nyama wo rɔ, n ya saraka-masɔlɛnu yen kɔnɔ n ma Lifayinu yen.

¹⁶ N ya kilayɛ lata kun-tigi kɔnɔntɔ anubɛ karan-mɔgɔ fila ma ka anu kele. Kun-tigi wonu tɔgɛ le Ɛliyesa anubɛ Ariyɛli anubɛ Sɛmaya anubɛ Ɛlinetan anubɛ Yaribu anubɛ Ɛlinetan doi anubɛ Netan anubɛ Sakaraya anubɛ Mɛsulam. Anu karan-mɔgɛ wonu tɔgɛ le Yoyaribu anubɛ Ɛlinetan.

¹⁷ N ya anu nata Kasifaya so-tigi warɛ min tɔgɛ Idɔ. N ya anubɛ a ta-nyɔgɛ Bato-Bonna-wɔlilɛnu manyinika ko anu ni Lifayi donu nana min si Bato-Bon-wɔlɛ kɛ.

¹⁸ Kilayɛ wonu ke, anu ya kei kelen don ma bolo mata Alla baraka rɔ min ya ata wɔlɛ lɔn. Wo tɔgɛ le Sɛrɛbaya. Lifayi bɔnsɔn-mɔgɛ le ale la ka bɔ Mehali bɔnsɔn rɔ. Ala den-kei anubɛ a na-kelen-nyɔgɛnu bilara a fɛ. Anu yatɛ bɛnta mɔgɔ tan-ni-segin ma.

¹⁹ Min sanɛ wo kuma, anu ya Hasabaya anubɛ Yɛsaya lana ka bɔ Mɛrari bɔnsɔn-mɔgɛnu rɔ, wonubɛ anu na-kelen-nyɔgɔ mɔgɔ mogan.

²⁰ Wo kɔma, Bato-Bonna-wɔli-kɛla mɔgɔ kɛmɛ fila ani mɔgɔ mogan (220) nara. Mansa Dawuda anubɛ ala mɔgɔ-banu denu ya kɛnu benbanu yabɔ ka Lifayinu dɛnbɛ Bato-Bon-wɔlɛla ko la. Ma ya anu dama tɔgɛ sɛbɛ.

Ɛsira anubɛ Ala Mɔgɛnuna Sun-Don-Koe

²¹ Wo tumɛ ma ye Ahefa bɛ kɛ fɛ, n ya a fɔ mɔgɛ bɛɛ ye ko ma ni sunyɛ don ka ma nyɛrɛ famayigi mata Alla ye. N ko ma ni a matara ko a ni to ma fɛ mala tagama kɛ rɔ alako mabɛ mala dannu anubɛ ma bolo-fannu ma ni tanka.

²² N miliyara le ka mansɛ manyinika kɛlɛ-den so-laburilɛnuna ko ma minnu si ma matanka kilɛ la. N miliyara le bawo n bara ban a fɔla a ye nun ko mɔgɔ-wo-mɔgɔ lanɛ mata Alla la, a si wo tigi dɛnbɛ, ado mɔgɔ-wo-mɔgɔ ya a kan-kɔ sɔ a la, a ti sewa wo tigi la fɔ ka a tɔrɔ.

²³ Woletɔ ma ara sunyɛ don ka Alla matara ma lakanan-koe la, ado a ya ma matarali-kan wo lamɔɛn.

Kɔ-Fan Di-Koe Bato-Bɔn Wara-Koe Rɔ

^24-25 Sɛnɛ anubɛ wodi-gbɛ anubɛ miran minnu bɔra mansɛ anubɛ ala makawandilɛnu anubɛ ala mɔgɔ-banu anubɛ Isirɛla mɔgɛnu bolo Alla Bato-Bɔn wara-koe rɔ, n ya wo dama suman. N ban anu sumanna, n ya anu don Sɛrɛbaya anubɛ Hasabaya anubɛ mɔgɔ tan bolo n ya minnu yabɔ ka bɔ saraka-masɔ-kun-tiginu tɔ alako anu ni fan wonu fɛ-bira.

²⁶ N ya min don anu bolo, wo le kɛnu na. N ya wodi-gbɛ don anu bolo minna gbiliyɛ anubɛ fui-fan bɔrɔ kɛmɛ sawa bɔrɔ mogan-ni-loli (325) rakɛn. N ya wodi-gbɛ-miran minnu don anu bolo, wonu nakofunɛ gbiliyɛ anubɛ fui-fan bɔrɔ bi-loli (50) rakɛn de! N ya sɛnɛ min don anu bolo, wola gbiliyɛ anubɛ fui-fan bɔrɔ bi-loli (50) rakɛn de!

²⁷ N ya sɛnɛ-miran mogan don anu bolo minna gbiliyɛ anubɛ yi kalɔn fila ani a talɛ rakɛn. Min sanɛ wo kuma, n ya sila-miran-hakika fila don anu bolo. Wonu sɔnkɛ anubɛ sɛnɛ-miran wonu sɔnkɛ rakɛn.

²⁸ N ban kɛ damasi labɔla, n ya a fɔ anu ye ko, “Wole dantɛgɛni de ma benbanuta Mari Alla ma. Mɔgɛnu nara sɛnɛ anubɛ wodi-gbɛ-miran minnu na Mari ye hɛniki-sarakayɛ la, wonu fanan dantɛgɛnɛ a ma iko wole.

²⁹ Wo ni anu fɛ-bira a kilɛ fɛ ha miran wonu ni ke Bato-Bɔn la. Wo wa ke anu na nyɔ, wo si anu suman saraka-masɔ-kun-tiginu yakɔrɔ anubɛ Lifayinu anubɛ Isirɛla bɔnsɔn kebila-kun-tiginu Yerusalɛm soe burɔ. Wo kɔma, wo ni anu don anu bolo.”

³⁰ Woletɔ saraka-masɔlɛnu anubɛ Lifayi kɛnu ya anu bole sigi sɛnɛ anubɛ wodi-gbɛ anubɛ miran kɛnu kɔrɔ ka ta anu na mata Alla Bato-Bɔn la Yerusalɛm.

Anu Wuli-Koe Ahefa Bɛ dafɛ ka Ta Yerusalɛm

³¹ Ma wulita Ahefa bɛ dafɛ san wo karɛ fɔlɛ, a tele tan-ni-fila nyɔgɛ le ma. Mata Alla ye ma fɛ nun. A ya ma tanka ma yogenu anubɛ ma lapɛrɛnnɛnu masibɛ ma kilɛ la.

³² Mala don Yerusalɛm soe burɔ, tele sawa, ma ye ma sulenna.

³³ A tele nani nyɔgɛ ma, ma ya sɛnɛ anubɛ wodi-gbɛ anubɛ miran wonu suma Bato-Bɔn la. Wo kɔma, ma ya anu don Yurayala den Saraka-Masɔla Mɛrɛmoti bolo. Finihasila den Ɛliyesa anubɛ Lifayi bɔnsɔn-mɔgɔ fila ye a fɛ nyɔ. Lifayi wonu tɔgɛ le Yɛsuwala den Yosabadi anubɛ Binuwaila den Nowadaya.

³⁴ Anu ya miran wo bɛɛ suma ka anu dan ka anu yatɛ sɛbɛ nya-kun-kelen.

³⁵ Mɔgɔ-biranɛ min bɛɛ sɛgira, wonu nara saraka-mintantɛnu na Isirɛlata Alla ye. Anu ya tura tan-ni-fila bɔ Isirɛla mɔgɛ bɛɛ ye anubɛ saga-yigi bi-kɔnɔntɔ ani saga-yigi wɔrɔ anubɛ saga-den bi-wɔrɔnfila ani saga-den wɔrɔnfila. Anu ya baa-kɔrɔn tan-ni-fila fanan mintan hakɛ-sarakayɛ la. Anu ya kɛ damasi mintan Mari ye gburr!

³⁶ Mansɛ ya kɛdi min don anu bolo, anu tara wo yira Yufereti bɛ tele-yigi waralɛ kun-tiginu anubɛ nyɔ-mɔgɔ-banu na. Wonu dama ya anu dɛnbɛ Bato-Bon-ko-wɔlɛ wo rɔ.