Ɛsira 6 - ALLALA KUMƐ

Mansɛ Kan Taran-Koe Buku Rɔ

¹ Woletɔ Mansa Dariyasi ya a fɔ ko anu ni ko-kɔrɔta-karan-buku wonu tafɛlɛn minnu namaranɛ anu bolo Babilɔn nyamanɛ rɔ.

² Tɔ-a-la, anu ya mansɛ wo kan sɛbɛnɛ taran Akimita soe burɔ Midiya nyamanɛ rɔ. Min sɛbɛnɛ a rɔ, a ko,

³ “Sairasila mansayɛ san fɔlɛ ma, Mansa Sairasi ya a fɔ ko anu ni Bato-Bɔn do sɔ Yerusalɛm soe burɔ anu si sarakɛnu bɔ ka anu mintan kan min. A sɔɛ ni ma nunkan-nya bi-wɔrɔ la, a kɔnɛ ni ma nunkan-nya bi-wɔrɔ la.

⁴ Anu bi a bon-dandan sɔla nya min, wo le kɛ la. Anu ba kuri gbaranda sawa sigi anu nyɔgɔn sun na, a nani nyɔgɛ ni ma kɔlɔma la. Pasiya nyamanita wodi le ye Bato-Bɔn wo ko-nya bɛɛ sarala.

⁵ Min sanɛ wo kuma, Mansa Nɛbukanasa nara sɛnɛ anubɛ wodi-gbɛ-miran minnu na ka bɔ Bato-Bɔn la Yerusalɛm kɔrɔma la, wo bɛɛ ni sɛgi anu gba-kɔrɛ rɔ Alla Bato-Bɔn wo la.”

Bato-Bɔn Sɔ Koe, Wo Fɔɛ Mansɛ Bolo

⁶ Mansa Dariyasi ya kala sɔrɔn kɛ ma min kɛ, a ya mɔgɔ-ba wonuna kɛdi kɔfili. A ko, “Ile Tatenayi min bi Yufereti bɛ tele-yigi waralɛ kun na wo, ila kandɛ Setari-Bɔsɛnayi wo, anubɛ nyɔ-mɔgɔ-banu, n bara wo dama kɔndɔn. “Wo ni wo masɛgi Bato-Bɔn wo la.

⁷ Wo kana anu tɔrɔ anuna wɔlɛ rɔ. Wo ni sɔn Yuda kun-tigi anubɛ Yahudiya mɔgɔ-banu ni Alla Bato-Bɔn sɔ a gba-kɔrɛ rɔ.

⁸ Ado nfan, wo ni anu dɛnbɛ wodi-koe rɔ. Wo ye duti min sɔrɔnna Yufereti bɛ tele-yigi waralɛ wo rɔ, anu madɛnbɛ-fan ye bɔla wo le tɔ alako fɛɛ kana na sa wɔlɛ wo la.

⁹ Saraka-masɔlɛnu nyinita fenfen ma wo bolo, wo ni wo di anu ma. Tele-wo-tele, wo kana foo wo fenfen na. A mara tura-bulan na wo, a mara saga la wo, a mara saga-den na anu bi min mala saraka-mintantɛ la San-Kole-Alla ye wo, a mara fui-fen na wo, a mara kɔgɔ la wo, a mara gbɛɛ la wo, a mara tulu la wo, wo ni anu madɛnbɛ kɛ dama la.

¹⁰ Wo ni anu madɛnbɛ alako anu ni ke sarakɛnu bɔla San-Kole-Alla ye minnu si a hɛnɛ. Wo kɔma, anu si Alla matara alako mabɛ nna den-keinu ni simayɛ sɔrɔn.

¹¹ Ni min ya n kan kɛ bɔ a gbɛ rɔ, wo si wo tigila bon-kɔn do sagan a rɔ ka a lasulen ka wo sɔrɔngbɔ ale mɔgɛ wo rɔ. Wo wa ka-a-la, wo si ala bɔn wo ma sundu-kunyɛ la.

¹² Alla min ya Yerusalɛm kɛ yabɔ a bato-tinayɛ la, min ba a fɔ ko a ye bato tinɛ wo tinyana ka n kuman-kan lafɛya, alamɛ Alla ya wo wara-koe layigi, a mansa wo, a sibolo wo. Nde, Mansa Dariyasi kan le kɛ la, ado wo ni a bira gben!”

Bato-Bɔn Dantɛgɛ-Koe

¹³ Wo kɔma, Tatenayi min bi Yufereti bɛ tele-yigi waralɛ kun na wo, ala kandɛ Setari-Bɔsɛnayi wo, anubɛ nyɔ-mɔgɔ-banu, wonu ya a ma iko Mansa Dariyasi ya a fɔ anu ye nya min.

¹⁴ Yahudiya mɔgɔ-banu tora tala yarɔ Bato-Bɔn sɔ tinɛ. Nɛbi Hegayi anubɛ Sakaraya tora anu yisi-kima-kumɛ fɔla. Anu ya Bato-Bon-wɔlɛ wo kundon iko Isirɛlata Alla anubɛ Pasiya mansa kɛnu ya a fɔ anu ye nya min, Mansa Sairasi wo, Mansa Dariyasi wo, anubɛ Mansa Atasakasi.

¹⁵ Mansa Dariyasila mansayɛ san wɔrɔ nyɔgɛ ma, karɛ min tɔgɛ Adari wo tele sawa nyɔgɛ ma, anu ya Bato-Bɔn wo laban.

¹⁶ Wo kɔma, Isirɛla mɔgɛ bɛɛ, a mara a saraka-masɔla la wo, a Lifayi wo, anubɛ a mɔgɔ-birani-kɔrɔ-toe minnu sɛgira Yerusalɛm, wonu ya Bato-Bɔn dantɛgɛ sewɛ rɔ.

¹⁷ Dantɛgɛlɛ wola ko la, anu ya tura kɛmɛ bɔ, saga-yigi kɛmɛ fila, anubɛ saga-den kɛmɛ nani sarakayɛ la. Wo kɔma, anu ya baa-kɔrɔn tan-ni-fila bɔ anu hakɛ-sarakayɛ la iko anu bɔnsɔn ye nya min.

¹⁸ Anu ya saraka-masɔlɛ anubɛ Lifayi bɛɛta wɔlɛ don a bolo Bato-Bɔn la Yerusalɛm soe burɔ iko a sɛbɛnɛ Nɛbi Musata buku rɔ nya min.

Kanan-Ko-Ladiyɛ Wara-Koe

¹⁹ Mɔgɔ-biranɛ wo minnu sɛgira, wo san nasɛgi karɛ fɔlɛ tele tan-ni-nanɛ ma, anu ya Kanan-Ko-Ladiyɛ kɛ anu nyɔgɔn fɛ kan-tina-kelen.

²⁰ Wo ya a taran, saraka-masɔlɛnu anubɛ Lifayinu bara anu nyɛrɛ sɛninya iko tɔn ya a fɔ nya min. Kanan-ko-sarakɛ wonu, Lifayinu denu ya wonu kan natɛgɛ. Anu ya wonu faga anu nyɛrɛ anubɛ anu na-kelen-nyɔgɔ saraka-masɔlɛnu anubɛ mɔgɔ-birani-kɔrɛ dama ye.

²¹ Isirɛla mɔgɔ-birani-kɔrɛ wo minnu sɛgira, wonu ya a soge dɔn. Nyɔ-sibolo-gbɛrɛ minnu bara anu fara sibolo-gbɛrɛ-bɛsɛ wonu batoe la ka na kofu anu ma Mari Alla bato tinɛ, wonu fanan ya a dɔn.

²² Tele wɔrɔnfila dɛgɛdɛgɛ, anu bi Biredi-Yɛlɛbɛlɛ-Dɔn-Ladɛn kun na sewɛ rɔ. Anu bi sewɛ rɔ bawo Mari le ya a ma, mansɛ min bi Asiriya nyamanɛ kun na, anuna hinɛ donta wo rɔ. Mansɛ wo tora anu madɛnbɛna Isirɛlata Alla Bato-Bɔn sɔ-koe rɔ.