Ɛsira 5 - ALLALA KUMƐ

¹ Mansa Dariyasita san fila nyɔgɛ kɛ ma, nɛbi mɔgɔ fila donta wɔlɔyiya-kuma-fɔɛ rɔ Isirɛlata Alla tɔgɛ rɔ. Anu tɔgɛ le Hegayi anubɛ Idɔla den Sakaraya. Anu tora kumala Yahudiyanuna ko rɔ minnu siginɛ Yuda nyamanɛ anubɛ Yerusalɛm soe burɔ.

² Silatiyɛlila den Sarababulu anubɛ Yɛhosadakila den Yasowa ya anuna kumɛ lamɔɛn tumɛ min, anu donta Bato-Bon-sɔɛ rɔ tun. Nɛbi mɔgɔ filɛ wonu fanan tugunta anu na wɔlɛ wo rɔ.

³ A ma mɛ, Tatenayi min bi Yufereti bɛ tele-yigi wara la kun-tigiyɛ la wo, anubɛ ala kandɛ Setari-Bɔsɛnayi wo, anubɛ mɔgɔ-ba doinu, anu tara Yerusalɛm soe burɔ. Wonu ya a fɔ Yahudiyanu ye ko, “Yon ya a fɔ wo ye ko wo ni Bato-Bɔn kɛ sɔ ka a rabɛn a kilɛ fɛ?”

⁴ Wo kɔma, anu ya a fɔ anu ye ko minnu bi Yahudiyanuna kun-tiginu dɛnbɛna, anu ni wonu tɔgɛ sɛbɛ.

⁵ Kɔnɔ kɛ bɛɛ rɔ, Alla kolan ye Yahudiyanuna kun-tiginu kumafɛlɛnna. Pasiya mɔgɔ-banu ya a latɛgɛ ko anu kana ko-wo-ko ma fɔ anu ni kɛdi sɛbɛ anuna Mansa Dariyasi ma fɔlɔn. Anu ni a miriya-fɔlɔn lɔn.

⁶ Mɔgɔ-ba minnu bi Yufereti bɛ tele-yigi waralɛ kun na, wonu ya kɛdi min sɛbɛ Mansa Dariyasi ma, wo le kɛ la.

⁷ “Ma tigi, Mansa Dariyasi, alamɛ i mɛra ma kuma yisi-kimɛ rɔ.

⁸ “Ma tigi, i ni a lɔn ko ma tara Yuda nyamanɛ rɔ tumɛ min, ma ya a taran, anu bi Alla-makawanɛta Bato-Bɔn sɔla. Anu bi kuru-wɛnu lɛsɛla ka kɔlɔmanu sa dandannu tɔ. Anu bi Bato-Bon-wɔlɛ kɛla anu fɛrɛma. A ye tala yarɔ a kin na!

⁹ “Ma ya anuna kun-tiginu manyinika ni min ya anu sɔ Bato-Bɔn sɔla ka a rabɛn a kilɛ fɛ.

¹⁰ Ma ya anu tɔgɛ manyinika ka anu sɛbɛ alako i ni a lɔn min bi anu kun na.

^11-12 “Anu ya a fɔ ma ye ko Alla min bi san-kole anubɛ dugu-kole kuma ko wota wɔli-kɛlɛ le anu denu na. Anu ko anu benbanu ya San-Kole-Alla ladiminya min kɛ, wo le ya a ma, Alla ya anu kunyɛ don Babilɔn Mansa Nɛbukanasa bolo, Kaladiya kɛ, kɔni. Anu ko Nɛbukanasa le ya anuta Bato-Bɔn tinya, anuta mansa-makawanɛ do ya min sɔ kɔrɔma la nun. Wo kɔma, a tara anu denu na Babilɔn nyamanɛ rɔ. Anu ko anu bi San-Kole-Alla wo leta Bato-Bɔn sɔla tun.

¹³ Wo kɔma, anu ko Sairasila mansayɛ san fɔlɔtɛ Babilɔn nyamanɛ rɔ, wo ya a fɔ anu ye ko anu ni Bato-Bɔn wo sɔ kura kɛ tun.

¹⁴ Anu ko Mansa Nɛbukanasa wo ya sɛnɛ anubɛ wodi-gbɛ-miran minnu bi Bato-Bɔn wo la Yerusalɛm soe burɔ ka ta anu na ata bɛsi-kɔ-tinɛ Babilɔn, Mansa Sairasi ya wonu denu nasɛgi anu ma. Anu ko Mansa Sairasi ya miran wonu don kei do bolo min tɔgɛ Sɛsabasa, a ya min ma kun-tigi la Yuda nyamanɛ rɔ.

¹⁵ Anu ko mansɛ ya a fɔ ale Sɛsabasa ye ko a ni sɛgi miran wonu na Yerusalɛm soe burɔ. Wo kɔma, a ko anu ni Bato-Bɔn sɔ a gba-kɔrɛ rɔ tun.

¹⁶ Anu ko woletɔ Sɛsabasa nara Bato-Bɔn kurukɛ. Ka a bi wulɔn ma ha kaka, anu bi Bato-Bon-sɔ-ko-wɔlɛ la kɔnɔ a ma ban bɛ.

¹⁷ “Nba, ma tigi, ni i si sɔn, anu ni ko-kɔrɔta-karan-bukunu tafɛlɛn Babilɔn nyamanɛ rɔ ka a lɔn ni Sairasi kan le ko anu ni na Bato-Bɔn sɔ Yerusalɛm tun. Wo kɔma, ni ile sako ye min na, i si ma lalɔn wo la.”