Ɛsira 4 - ALLALA KUMƐ

Kɛlɛ-Tɛgɛ-Koe ka Bato-Bon-Sɔɛ Mabeli

¹ Yuda bɔnsɔn anubɛ Bɛnyamɛ bɔnsɔn yogenu ya a lamɔɛn ko mɔgɔ-birani-kɔrɛnu bi Isirɛlata Mari Alla Bato-Bon-sɔɛ kun na tumɛ min,

² anu nara Sarababulu anubɛ kebila-kunyɛnu bara. Anu ko, “A sɔgɛ ye ma la ka wo dɛnbɛ Bato-Bɔn kɛ sɔla. Wo ye Alla min batola, male fanan bi wo le batola. Kebi Asiriya Mansa Isahadɔn ya ma lana yan tɔ tumɛ min, ma taranta sarakɛnu bɔla wola Alla kɛ le ye.”

³ Sarababulu anubɛ Yɛsuwa anubɛ kebila-kunyɛnu ya a fɔ anu ye ko, “Ma sa nyinina wola dɛnbɛnɛ ma mata Mari Alla Bato-Bɔn sɔ tinɛ bawo a ti bɛn. Ma si a sɔ ma nyɛrɛ ma iko Pasiya Mansa Sairasi ya ma sɔ nya min.”

⁴ Woletɔ anu yoge minnu siginɛ nyɔ rɔ, wonu ya anu taya ka kɔndɔfili anubɛ kilan don anu tɔ alako Bato-Bɔn wo sɔɛ kana bɛn.

⁵ Wo kɔma, anu ya dogonta-fan di Pasiya mɔgɔ-banu ma anuna ko la. Anu tora wo kun na ka a dabira Sairasila mansaya-wati ma ha Dariyasila mansaya-wati.

Kɛlɛ-Tɛgɛ-Koe ka Yerusalɛm So-Sɔɛ Mabeli

⁶ Sakasi manɛ mansɛ la Pasiya nyamanɛ rɔ, Isirɛla yoge minnu bi anuna foolɛ rɔ, wonu ya kɛdi sɛbɛ Mansa Sakasi ma. Anu ya wo sɛbɛ Isirɛla mɔgɛnu kan ma minnu siginɛ Yuda nyamanɛ anubɛ Yerusalɛm soe burɔ.

⁷ Pasiya Mansa Atasakasita wati fanan tɔ, Bisilam anubɛ Mitirɛdati anubɛ Tabiyɛli anubɛ anu diyana-mɔgɛnu, wonu fanan ya kɛdi sɛbɛ Mansa Atasakasi ma Isirɛla mɔgɛnu kan ma. Kɛdi wo sɛbɛnɛ Aramaki kan le tɔ anubɛ a sɛbɛ-nya.

⁸ Wo kɔma, Rihum min bi kun-tigiyɛ la Yufereti bɛ tele-yigi wara la anubɛ ala kɛdi-sɛbɛlɛ Simisayi, wonu ya kɛdi sɛbɛ Mansa Atasakasi ma Yerusalɛm so-burɔ-mɔgɛnu kan ma. Min sɛbɛnɛ kɛdi wo rɔ, wo le kɛ la ko,

^9-10 “Minnu bi kɛdi kɛ sɛbɛla, wo le nde, Rihum wo, nna kɛdi-sɛbɛla Simisayi wo, ma makawandilɛnu wo, kiti-tɛgɛlɛnu wo, anubɛ a mɔgɔ-ba-toe minnu siginɛ Samariya soe kɛ burɔ. Mɔgɔ-ba donu kofura ma ma ka bɔ nyamani-gbɛrɛkɛnu tɔ Yufereti bɛ tele-yigi wara la. Fɔlɔ nun, ma dama siginɛ Ɛreki anubɛ Babilɔn anubɛ Susa soenu tɔ nun Ilam nyamanɛ rɔ anubɛ nyamani-gbɛrɛkɛnu tɔ. Mansa-makawanɛ Asibanipuli ya ma labɔ mala soenu tɔ ka ma sigi Samariya soe kɛ burɔ anubɛ nyamani-gbɛrɛkɛnu tɔ Yufereti bɛ tele-yigi wara la.

¹¹ “Male min bi Yufereti bɛ tele-yigi wara la, ila wɔli-kɛlɛnu, kɔni, male ara kɛdi kɛ sɛbɛ ile, Mansa Atasakasi ma.

¹² “Ma tigi, a sɔgɛ ye ma la, i ni a lɔn ko Yahudiya minnu nara ka bɔ ila nyamanɛ tonke do rɔ, anu bara sigi Yerusalɛm soe burɔ, ado anu bi anuna karagbɛlɛya-so-karantan wo sɔla tun min nafanɛ murutiyɛ la. Anu bara wuli soe wo tarɛ sɔla, ado anu sa mɛla a labanna.

¹³ Ma tigi, ni anu ya soe kɛ anubɛ a tarɛ laban, anu si anu ban duti dila i ma. I sɔrɔn-fan si dɔgɔya ka bɔ nyamanɛ kɛ rɔ.

¹⁴ Woletɔ bawo ma telennɛ ile, ma tigi ye, ma sa a rɔ kɛ sufa ni ma. Ma miri ye min ma,

¹⁵ i ni ko-kɔrɔta-karan-bukunu tafɛlɛn. Ni i ya wonu mafɛlɛn, wonu si a yira i la ko Yerusalɛm soe, murutiya-soe le. I si a yen ko soe kɛ ara mansa fɔlɔtɛnu anubɛ nyamanɛ mɔgɔ-banu yakɔrɔ-mamɔ anuta wati rɔ. Mɔgɛ kɛnu namara ma di. Wo le ya a to, anu ya soe wo tinya.

¹⁶ Ma lanɛ a la, ni anu ya soe kɛ anubɛ a tarɛ sɔ tun, i ti ke Yufereti bɛ tele-yigi waralɛ kɛ nɔla tun.”

¹⁷ Mansɛ ya anuna kɛdi karan ka a kɔfili ko, “N bara wo dama kɔndɔn, wola kun-tigi Rihum, anubɛ ala kɛdi-sɛbɛlɛ anubɛ kun-tigi minnu bi Samariya, hali mɔgɔ-ba-toe minnu bi Yufereti bɛ tele-yigi warala-toe rɔ.

¹⁸ “Anu ya wola kɛdi latenbi mala kan rɔ ka a karan n ye.

¹⁹ N ya a ma, anu ya ko-kɔrɔta-karan-bukunu tafɛlɛn. Anu ya a mafɛlɛn kebi fɔlɔ, Yerusalɛm soe kɛ ara murutiya kun-tigi-siyaman bolo nun. Ka tenbi wo la, soe wo lafanɛ mɔgɔ-murutiyanɛnu anubɛ mɔgɔ-tɔrɔlɛ-gbansan na.

²⁰ Tonyɛ le, mansa-makawanɛ donu bi nyɔ nun. Sɛnbɛ ye anu na Yufereti bɛ tele-yigi damasi kun na nun. Anu taranta duti makelela nyɔ-mɔgɛnu bolo.

²¹ Woletɔ, wo ta a fɔ anu ye ko anu ni fara so-karantan-kɛ-sɔɛ la ha n ni sereya latenbi tumɛ min.

²² Wo ni kɛ ma tiriya alako ko kana ma nna nyamanɛ la.”

²³ Mansa Atasakasita kɛdi kɛ karanta Rihum anubɛ Simisayi anubɛ anuna kun-tiginu ye tumɛ min, tiriyante wo rɔ, anu tara Yerusalɛm soe burɔ ka anu fɔrɔsɛ ko Yahudiyanu ni fara soe wo sɔɛ la.

Bato-Bon-Sɔɛ Dabira-Koe Tun

²⁴ Bato-Bon-sɔɛ danta Yerusalɛm soe burɔ tumɛ min, anu ma wɔli-wo-wɔli kɛ ha Dariyasita mansayɛ san fila nyɔgɛ ma Pasiya nyamanɛ rɔ.