Ɛsira 3 - ALLALA KUMƐ

Batoli Dabira-Koe Tun

¹ Anu sɛgira san min na, wo karɛ wɔrɔnfila nyɔgɛ ya a taran, Isirɛla mɔgɛnu bara ban anu sigi-bole rabɛnna. Wo kɔma, Isirɛla mɔgɛ bɛɛ ya anu kundɛn Yerusalɛm soe burɔ.

² Yɛhosadakila den Yasowa wo, a ta-nyɔgɔ-saraka-masɔlɛnu wo, Siyatiyɛlila den Sarababulu wo, Sarababulu na-kelen-nyɔgɛnu wo, wonu ya Isirɛlata Allata saraka-mintan-tinɛ ladan. Anu ya wo ladan alako anu ni ke saraka mintanna a kuma iko Allata mɔgɛ Nɛbi Musa ya a sɛbɛ tɔn-buku rɔ nya min nun.

³ Isirɛla mɔgɛnu ya mɔgɛ minnu taran sigini nyɔ, hali anu kilannɛ mɔgɛ wonu na, anu ya saraka-mintan-tinɛ ladan Mari ye a gba-kɔrɛ rɔ. Anu ban wo sɔla, anu ya sɔgɔma ani wurala-saraka-mintantɛnu-bɔɛ dabira.

⁴ Anu ya Lele Sɔɛ Ladɛn kɛ iko tɔn ya a fɔ nya min. Anu ya saraka-mintantɛnu bɔ iko a bɛnta, anu ni a ma nya min ladɛn-tele wo bɛɛ kɔrɔ.

⁵ Min sanɛ wo kuma, anu bi saraka-mintantɛ minnu mintanna, anu ya wonu bɔ. Anu bi Karɛ-Kura-Sarakɛ minnu bɔla, anu ya wonu bɔ. Anu si ladiyɛ min bɛɛ kɛ Mari ye, anu ya wonu sarakɛ bɔ. Wo kɔma fanan, anu ya hɛniki-sarakɛnu bɔ.

⁶ Anuna karɛ wɔrɔnfilɛ tele fɔlɛ ma, anu ya saraka-bɔɛ dabira Mari ye kɔnɔ wo ya a taran, anu ma Bato-Bon-sɔɛ dabira wɛ.

Bato-Bon-Sɔɛ Dabira-Koe a Kurɛ la Tun

⁷ Isirɛla mɔgɛnu ya wodi bɔ ka kuru-lɛsɛlɛnu anubɛ bon-tuwalɛnu sara wo la. Anu ya dɔn-fan anubɛ minni-fan anubɛ ɔlifi-tulinu nata Lɛbanan nyamanɛ rɔ kɔlɔma-hakikɛnu sɔnkɔyɛ la. Anu ya fan wonu nata Taya soe anubɛ Saidon soe burɔ. Lɛbanan kɛnu ya kɔlɔma wonu nata yi kuma ha ka ke Yapa soe ma. Pasiya Mansa Sairasi sɔnta anu miriya kɛ dama ma.

⁸ Isirɛla mɔgɛnu ke Yerusalɛm wo san kelen karɛ kelen tenbinɛ, a karɛ fila nyɔgɛ ma, anu ya Bato-Bon-sɔɛ dabira. Silatiyɛlila den Sarababulu wo, Yɛhosadakila den Yasowa wo, saraka-masɔlɛnu wo, Lifayinu wo, anubɛ mɔgɔ-birani-kɔrɔ-toe minnu nara Yerusalɛm soe burɔ, anu dama ya wɔlɛ dabira. Lifayi kei min bɛɛsi sɔrɔn ara ke san mogan rɔ ka tenbi wo la, anu ya wonu ma Mari Bato-Bon-kumafɛlɛnnɛnu na.

⁹ Lifayi min tɔgɛ Yɛsuwa anubɛ ala dannu anubɛ a na-kelen-nyɔgɛnu, wonubɛ Kadamiyɛli anubɛ ala dannu, wonu denu mara kun-tiginu na Bato-Bon-sɔ-ko-wɔlɛ rɔ. Kadamiyɛli kɛ bɔra Hodafaya kebilɛ rɔ. Hɛnadadi kebilɛ fanan ya Lifayi wonu dɛnbɛ.

¹⁰ Wɔli-kɛlɛnu ya Bato-Bɔn kurukɛ wati min, saraka-masɔlɛnu ya anu sɔ anu sɔ tinɛnu tɔ. Anuna burinu bi anu bolo. Anu mabɛnnɛ anuna saraka-masɔ-durukinu tɔ. Esafi kebilɛ Lifayi minnu bi nyɔ, wonu sɔnɛ anuna karanyanu na anu bolo. Anu ya Mari tanto iko Mansa Dawuda ya anu nabila nya min fɔlɔn.

¹¹ Anu ya Alla-tanto-bɛtinu bɔ ko, “Alla tanto bawo a kin, ala keninteyɛ ti ban Isirɛla mɔgɛnu bara-la habadan!” Bɛɛ ya a kuli mayɛlɛ anu sɛnbɛ la ka Mari tanto sewɛ la bawo anu bara Bato-Bon-kurukɛ-wɔlɛ laban.

¹² Kina min bɛɛ ya Silamɛnita Bato-Bɔn yen, a saraka-masɔla wo, a Lifayi mɔgɔ wo, a kebila-kun wo, wonu bɛɛ dira anu sɛbɛ-kuna-wɛ la bawo Bato-Bon-kurɛ kɛ ma ke iko Mansa Silamɛnitɛ. Kɔnɔ min hɛnkili ma to Mansa Silamɛnita Bato-Bɔn ko, wonu ya a lawɔyɔ sewɛ bolo.

¹³ Mɔgɔ ma sɔnkɛ kɛ dan-nafarɛ lɔn, a sewa wo, a diyi-kɛ wo, bawo anu bɛɛ kulu mayɛlɛnɛ bɛrɛkɛ! Anu si a lamɔɛn wula-yan na.