Ɛsira 1 - ALLALA KUMƐ

Isirɛla Mɔgɛnu Sɛgi-Koe Fɔ-Koe Mansa Sairasi Bolo

¹ Pasiya Mansa Sairasila mansayɛ san fɔlɔtɛ ma, Mari ya min fɔ Nɛbi Yɛrɛmaya ye, wo bɔra-a-la. Mari ya a ma, Mansa Sairasi ya sereya do sɛbɛ min si karan ala nyamanɛ kan tinɛ bɛɛ rɔ.

² Min sanɛ kɛdi wo rɔ a ko, “Nde, Pasiya Mansa Sairasita tɔn le kɛ la. Mari, Arinyɛnɛ Alla, kɔni, wo le wara n ma mansɛ la duninya kun na. A ara n sɔ ata Bato-Bon-sɔɛ la Yerusalɛm soe burɔ Yuda nyamanɛ rɔ.

³ Wole Allata mɔgɛnu, alamɛ Alla tora wo fɛ. Wo ta Yerusalɛm ka Mari Bato-Bɔn sɔ a kurɛ la Isirɛlata Alla ye nyɔ, anu bi Alla min batola Yerusalɛm soe burɔ, kɔni.

⁴ Ala mɔgɛ min bɛɛsi biranɛ wula-yan la, ni anu ma ke tala, wonu sigi-nyɔgɛnu ni anu makoe nyinya. Anu bi min dila anu ma, wo le kɛnu na, sɛnɛ wo, wodi-gbɛ wo, anu beli-fen wo, dunu-bi-sogenu wo, hali anuna kɔ-fannu anu si ta min bɔ Alla Bato-Bɔn la Yerusalɛm soe burɔ.”

⁵ Wo le ya a ma, Bɛnyamɛ bɔnsɔn-kun-tiginu anubɛ Yuda bɔnsɔn-kun-tiginu, anubɛ saraka-masɔlɛnu anubɛ Lifayinu, wonu dama ya anu mabɛn ka ta Mari Bato-Bɔn sɔ-koe la Yerusalɛm soe burɔ, Alla ya min bɛɛ yisi-kɔrɔ-tugu ka wo ma, kɔni.

⁶ Anu sigi-nyɔgɛ damasi ya anu magben ka fen-siyaman di anu ma, sɛnɛ wo, wodi-gbɛ-miran wo, anu beli-fen wo, dunu-bi-sogo wo, fen-kolomɛ donu wo, anubɛ anu bi tala kɔ-fan minnu na Bato-Bɔn la.

⁷ Mansa Nɛbukanasa ya miran minnu nabɔ Alla Bato-Bɔn la Yerusalɛm nun ka ta anu na ata bɛsi-kɔ-tinɛ, Mansa Sairasi ya wo dama lasɛgi anu ma.

⁸ Ale mansɛ ya wonu don Mitirɛdati bolo min si fen-namara-kɛ a ye. Wo ya wonu dan ka anu don Sɛsabasa bolo min bi kun-tigiyɛ la Yuda nyamanɛ rɔ.

⁹ A ya sɛnɛ-miran bi-sawa (30) don a bolo.

¹⁰ A ya wodi-gbɛ-miran waga kelen (1,000) don a bolo. Wo kɔma, a ya miran-su-gbɛrɛkɛ mogan-ni-kɔnɔntɔ (29) don a bolo. A ya sɛnɛ-miran-dɔgɔma bi-sawa (30) fanan don a bolo. A ya wodi-gbɛ-miran-dɔgɔma kɛmɛ nani ani tan (410) don a bolo. Wo kɔma, a ya wɔli-kɛ-miran su-gbɛrɛkɛ waga kelen (1,000) fanan don a bolo.

¹¹ Wo tumɛ Sɛsabasa anubɛ mɔgɔ-biranɛ wonu bi bɔla Babilɔn nyamanɛ rɔ ka ta Yerusalɛm soe burɔ, a tara sɛnɛ anubɛ wodi-gbɛ-miran min bɛɛ la a bolo, wo yatɛ bɛnta miran waga loli, miran kɛmɛ nani (5,400) ma.