Bɔ-Koe-Iyipiti 34 - ALLALA KUMƐ

Tɔn-Walan-Kurɛ Sɛbɛ-Koe

¹ Mari ya a fɔ Musa ye ko, “I ni kuru-walan filɛ lɛsɛ iko a fɔlɔtɛ. I ya kuru-walan fɔlɔtɛ minnu tatii, nta kumɛ minnu sɛbɛnɛ wonu ma, n si wonu sɛbɛ kɛnu ma tun.

² I rabɛn ka n taran Sinayi kɔnkɛ kuma sɔgɔma.

³ Mɔgɔ-wo-mɔgɔ kana yɛlɛ i fɛ hali ka taran kɔnkɛ bu la. Hali wola kolo-fannu kana anu de-nyini kɔnkɛ kɛ kɔrɔ.”

⁴ Musa ya kuru-walan filɛ lɛsɛ iko a fɔlɔtɛnu. A ya kuru-walan filɛ wonu bi ka yɛlɛ Sinayi kɔnkɛ kuma sɔgɔma iko Mari ya a fɔ a ye nya min.

^5-6 Mari ya ala kumɛ latɔnbagaya. A yigira banda-fin-gbɛ wo rɔ ka tenbi Musa yakɔrɔ. A ya a sereka-tɔgɛ fɔ a ye ko, “Mari le nde la. Kinikini mansɛ le nde la. N ti diminya yona. Keninteyɛ waranɛ n tɔ. Telenbaga le nde la.

⁷ N si nta nyimayɛ yira mɔgɔ waga siyaman na. N si mɔgɛnu makoto anuna hakɛ-yogomɛnu na. Hakɛ-tigi minnu si anu ban n na, n si wonu tɔrɔ. Hali anuna dannu ha ka ta a sigi anu tolo-birɛnu na anubɛ anu tolo-bira-sɔɛnu, n si wonu fanan tɔrɔ.”

⁸ A ma mɛ, Musa ya a madu dugi ma ka Mari bato.

⁹ A ko, “E, Mari, ni n di i ye, i yandi, i ni ta ma tɛma kamasɔrɔn ila mɔgɛ kɛnu tengberenta. I ni mala yogoyɛ anubɛ mala hakɛ makoto ka ma ma i halalɛ la.”

Lanyiri Fɔ-Koe Tun ka A Banban

¹⁰ Mari ko, “Mabɛ Isirɛla mɔgɛnu si lanyiri kiri ma nyɔgɔn tɛma bi. N si ko-makilannɛnu ma ila mɔgɛnu yala, kebi duninya danta min nyɔgɔn ma ma wɛ mɔgɛnu yala. N bi nala nta kabana-koe minnu mala wo ye, ita mɔgɛ minnu bi i fɛ, wonu bɛɛsi si wonu yen anu yɛ la.

¹¹ N bi min bɛɛsi fɔla wo ye bi, wo ni wonu ma. N si Amoranu anubɛ Kenannu anubɛ Hɛtinu anubɛ Perasanu anubɛ Hefanu anubɛ Yebusinu gben wo yarɔ.

¹² Wo ni a ma wo fɛrɛma wo nyɛrɛla ko la. Wo ye tala kan tinɛ min, wo kana lanyiri kiri nyamanita-mɔgɛ wonu ye alako anu kana ma gbɛrɛ la wo ye.

¹³ Yanni wo ni wo ma, wo ni anuna saraka-mintan-tinɛnu tinya. Anu bi kuri minnu kɔla, wo ni wonu takerikeri. Anu bi anuna bɛsɛ min kelela Asura, wo ni wo tinya.

¹⁴ Wo kana alla-dogbɛrɛ kɔ bawo wota Mari Alla le nde la min si wo makeliya. N ti sɔn n senɛ ma.

¹⁵ “Wobɛ nyamanita-mɔgɛ wonu kana lanyiri kiri wo nyɔgɔn tɛma. Wo kana sarakɛnu bɔ anuta allanu ye bawo anu donu si wo kele saraka dɔn tinɛ.

¹⁶ Wo ni a ma wo fɛrɛma. Wo kana sɔn anuna dunmusinu furula wola den-keinu ye kamasɔrɔn wonu ba don anuna bɛsi-kɔɛ rɔ tumɛ min, anu kana wola den-keinu kɔndɔfili ka anu nadon anuna bɛsi-kɔ-koe rɔ.

¹⁷ Wo kana fenfen nalee ka a ma bɛsɛ la wo nyɛrɛ ye wo si min kɔ.

¹⁸ “Wo ni Biredi-Yɛlɛbɛlɛ-Dɔn-Ladɛn kɛ. Wo ni to biredi-yɛlɛbɛlɛ dɔnna tele wɔrɔnfila kɔrɔ a wati-latɛgɛnɛ rɔ Abibu karɛ la iko n ya a fɔ wo ye nya min. Wo si ladɛn wo kɛ karɛ wo ma kamasɔrɔn wo bɔra Iyipiti nyamanɛ rɔ karɛ wo le la.

¹⁹ “Wo kɔma, ni musu-wo-musu ya den-kei fɔlɔtɛ sɔrɔn, ntɛ le dan wo la, hali a mara wola kolo-fannuta den fɔlɔtɛ la, a keimɛnu, kɔni. Kɔnɔ wo ni wola den-keinu kunka.

²⁰ Ni sofɛlɛ le, wo ni anuna den fɔlɔtɛnu kunka saga-dannu na. Ni wo ma sofɛli-dan wonu kunka, wo ni anu kan keri. “Mɔgɔ-wo-mɔgɔ bolo lakolɔn kana ta nta ladɛn wonu kuma.

²¹ “Wo ni wola wɔlɛ kɛ tele wɔrɔ kɔrɔ kɔnɔ a tele wɔrɔnfila nyɔgɛ ma, wo ni wo sulen, hali sɛnɛ-sa-wati le anubɛ ni a tɛgɛ-wati le, wo ni wo sulen tele wo ma.

²² “Wo ni Dɔn-Fen-Kun-Fɔlɛnu-Tɛgɛ-Ladɛn kɛ, wo wa wola dɔn-fen-kun-fɔlɛnu tɛgɛ wati min. Wo wa ban wola dɔn-fannu tɛgɛla wati min, wo ni Lele-Sɔɛ-Ladɛn fanan kɛ.

^23-24 N ba ban sibolo-gbɛrɛnu gbenna wo yarɔ ka wola nyamanɛ lakoloya tumɛ min, kei bɛɛsi ni ta n bato tinɛ san-bo-san iko sawa. Wo tenbi ladɛn wonu tɔ tumɛ min, wo hɛnkili la ni tɛgɛ ko nde, Alla si a ma, wo yogenu ti wola nyamanɛ bi wo bolo wo kɔma kilɛ la.

²⁵ “Wo tenbi kolo-fen-sarakɛ dila nde ma tumɛ min, wo kana anubɛ biredi di nde ma nya-kun-kelen isiti ye min tɔ. Wo kana saraka-sogo-toe to ha sɔgɔma Kanan-Ko-Ladiyɛ kuma.

²⁶ “Wo ni wola dɔn-fen kun-fɔlɛ, a kiri fɔlɔtɛ di nde, Mari Alla ma. “Wo kana baa-dan te a na kin-yi la.”

²⁷ Mari ya a fɔ Musa ye ko, “I ni nta kumɛ kɛnu sɛbɛ kamasɔrɔn n bara lanyiri min bɛɛsi kiri mabɛ Isirɛla mɔgɛnu tɛma bi, wo bɛɛ ye tɔn kɛnu tɔ.”

²⁸ Musa tora Mari fɛ nyɔ su bi-nani, tele bi-nani. A ma fen dɔn. A ma yi min. Alla ya tɔn wonu sɛbɛ kuru-walan wonu ma, Tɔn Tan, kɔni.

Musa Bɔ-Koe Kɔnkɛ Kuma

^29-30 Musa ye Sinayi kɔnkɛ yigila tumɛ min tɔn-walan filɛ wo la a bolo, a yakɔrɛ ye malan-malanna kamasɔrɔn a kumara Mari fɛ. Aruna anubɛ Isirɛla mɔgɛ bɛɛ ya anu yɛ lata Musa ma tumɛ min, anu ya a yen a yakɔrɛ ye malan-malanna. Anu kilanta anu madonna a la kɔnɔ ale Musa ma a lɔn a yakɔrɛ ye malanna.

³¹ Wo kɔma, Musa ya Aruna anubɛ kun-tiginu kele tumɛ min, wonu tara a wara. Musa kumara anu ye.

³² Woletɔ Isirɛla mɔgɛ bɛɛsi ya anu madon a la. Mari ya kumɛ min bɛɛsi fɔ Musa ye Sinayi kɔnkɛ kuma, a ya wo bɛɛsi latenbi mɔgɛnu ma.

³³ Musa banta wo bɛɛsi fɔla anu ye tumɛ min, a ya kurɛ burun a yɛ la.

³⁴ Kɔnɔ Musa tenbi Marita Fani-Bɔn la tumɛ min, a si kurɛ wo bɔ a yɛ la Mari yakɔrɔ. Alla wa kumɛ minnu fɔ a ye nyɔ, a si bɔ ka wonu fɔ Isirɛla mɔgɛnu ye.

³⁵ Isirɛla mɔgɛnu ba Musa yakɔrɔ-malannɛ wo yen tumɛ min, a si kurɛ wo burun a yɛ la tun. A si to a mala wo nya tuma-wo-tuma.