Bɔ-Koe-Iyipiti 30 - ALLALA KUMƐ

Isɛnti Mintan Tinɛ Ladan-Nya

¹ “Wo ni isɛnti mintan tinɛ ladan kɔlɔma do la min tɔgɛ akasiya.

² Isɛnti mintan tinɛ sɔɛ ni ma nunkan-nya fila la. A yanyɛ ni ma nunkan-nya kelen na. A kɔnɛ ni ma nunkan-nya kelen na. A tɔnkɔn nanɛ ra ni kɛnya bɛrɛtɛ! Wo ni a bolon nani ladan a tonko nanɛ rɔ. Isɛnti mintan tinɛ wonubɛ a bolɔnnu na ni dan nya-kun-kelen.

³ Wo ni sɛnɛ sa kan tinɛ bɛɛ ma, a kumɛ anubɛ a bolon nanɛ anubɛ a tɔnkɔn nanɛ ma. Wo ni sɛnɛ-mɔlɔnɛ do ladan ka a sa a da-gbengbe ma.

⁴ Wo ni sɛnɛ bolo-kalama-dɛɛn fila ladan ka anu sɔ a da-gbengbe kɔrɔ. Kelen si to a tɔnkɔn kelan rɔ, kelen doi si to a tɔnkɔn doi rɔ. Wonu si ma a bi-kɔlɔmanu don tinɛnu na.

⁵ Wo ni akasiya kɔlɔmanu nadan ka wonu ma a bi-kɔlɔmanu na ka sɛnɛ sa wonu ma.

⁶ Wo ni isɛnti mintan tinɛ sigi Kan-Tina-Sɛnimɛ rɔ. Yorolan si taran anubɛ tɔn-kenkirɛ tɛma.

⁷ “Aruna ni isɛnti mintan a mintan tinɛ kuma. A tenbi lɛnpu ladufenna sɔgɔma, a ni isɛnti mintan wo wati rɔ.

⁸ A tenbi lɛnpu lamalanna wurɛ la, a ni isɛnti mintan tun, woletɔ isɛnti si mintan sɔgɔma ani wurɛ la nde, Mari ye ha tumɛ min di nde, Alla ye.

⁹ Wo kana isɛnti-dogbɛrɛ mintan nyɔ. Wo kana saraka-mintantɛ mintan nyɔ, ni wo ma, bu-munke-sarakɛ. Wo kana minni-sarakɛ fanan kɛ nyɔ kuma.

¹⁰ San-bo-san, Aruna ni hakɛ-yamatogon-saraka-yele sisa isɛnti mintan tinɛ bolɔnnu ma alako isɛnti mintan tinɛ si sɛninya nya min. San-bo-san, saraka-masɔla-wɛ si to kɛ mala a siyi-tele-bɛɛ kɔrɔ. Fɔ isɛnti mintan tinɛ, wo ni to sɛninyɛ rɔ nde, Mari ye feu!”

Niyi Kunka-Fan

¹¹ Mari ya a fɔ Musa ye ko,

¹² “I wa Isirɛla mɔgɛ keimɛnu tɔgɛ sɛbɛ tumɛ min, anu kelen-kelennamɛ-bɛɛ ni anu niyi-kunka-fan di nde, Mari ma, alako kiraya-fitinɛ kana don anu tɛma.

¹³ Wo ye minnu mala wo niyi-kunka-fan la, wo le kɛnu na. Wo ni wodi-gbɛ wo mɔlɔn tɛgɛ a kilɛ fɛ iko a di nde, Mari ye nya min. Mɔgɛ bɛɛ ni wodi-gbɛ kɛ bɔ minna gbiliyɛ manɛ iko wodi-mɛlɛn kelan.

¹⁴ Ka a bi minnu sɔrɔn ara san mogan bɔ ha ka yɛlɛ, wo bɛɛsi ni anu niyi-kunka-fan kɛ labɔ.

¹⁵ Anu tenbi anu niyi-kunka-fan labɔla tumɛ min, i kana a banbɛ makele nɔnfulu-tiginu bolo. Wo kana a dɔgɔmɛ makele bolo-kolɔnnu bolo. Anu damasi niyi kelen.

¹⁶ Ile Musa ni wodi-gbɛ wo bira Isirɛla mɔgɛnu bolo ka a ma nde, Allata Fani-Bɔn mabɛn-fan la. Wo si ma wo hakɛ-yamatogon-fan la alako nde, Mari yili ni to wo ko.”

Yi-Sigi-Miran Wara-Koe

¹⁷ Mari ya a fɔ Musa ye ko,

¹⁸ “Wo ni yi-sigi-miran anubɛ a sigi-fan ladan silɛɛ la ku-kɛ-koela ko la. Wo ni a sigi nta Fani-Bɔn anubɛ saraka-mintan-tinɛ tɛma. Wo ni a lafa yi la.

¹⁹ Yanni anu ni don nna Fani-Bɔn la, Aruna anubɛ ala den-keinu si to anu bolenu anubɛ anu kiannu makula yi wo la

²⁰ Yanni anu ni anu gbɛrɛn saraka-mintan-tinɛ ma tumɛ min, anu ni anu bolenu anubɛ anu kian maku yi wo la tun.

²¹ Ni anu ma wo ma, anu si faga. Wo ni ma habadan-tɔn la Aruna anubɛ a kebila-mɔgɛnu ye.”

Dantɛgɛ-Tuli Wara-Koe

²² Mari ya a fɔ Musa ye ko,

²³ “I ni fen-suma-diyamɛ do bi min tɔgɛ mira. Wo ni wo yi do bi minna gbiliyɛ si ma iko yi kalɔn kelan, anubɛ kɔn-gbolo-suma-diyamɛ min tɔgɛ sinamɔn minna gbiliyɛ manɛ iko yi kalɔn talɛ. Min sanɛ wo kuma, i ni faranya-kalɛ do bi minna gbiliyɛ fanan manɛ iko yi kalɔn talɛ,

²⁴ anubɛ bagɛ min tɔgɛ kɔsiya, i ni a fere-gbalɛ donu bi minna gbiliyɛ manɛ iko yi kalɔn kelan. Wo si a bɛɛ suma a kilɛ fɛ iko a di nde, Mari ye nya min. I ni ɔlifi-tuli kalɔn kelen bi ka a kɛ kɛ bɛɛsi kuma.

²⁵ I ni wo bɛɛsi yabasan ka a ma dantɛgɛ-tuli la. A ni ma iko sɛnti-sumɛ ye nya min.

²⁶ I ni tulu-sɛnimɛ wo doni sisa nna Fani-Bɔn anubɛ tɔn-kenkirɛ wo ma.

²⁷ I ni tuli do sisa tebulu anubɛ a fɛ-mirannu ma. I ni do sisa lɛnpu anubɛ a fɛ-mirannu ma. I ni do sisa isɛnti mintan tinɛ ma.

²⁸ I ni do sisa saraka-mintan-tinɛ anubɛ a fɛ-mirannu ma. I ni do sisa yi-sigi-miran anubɛ a sigi-fan ma fanani.

²⁹ I ni wonu di nde, Alla ma alako wonu si sɛninya nya min. Ni fenfen tugura miran kɛ do la, wo ara don nde, Alla bolo.

³⁰ “I ni tulu-sɛnimɛ wo do sisa Aruna anubɛ ala den-keinu ma ka anu dantɛgɛ nde, Alla ma alako anu ni nta saraka-masɔ-wɔlɛ kɛ.

³¹ I ni a fɔ Isirɛla mɔgɛnu ye ko ka a bi anu denu ma ha ka a sigi anu kegeyɛnu na, tulu-sɛnimɛ kɛ ni ma fen dantɛgɛ-tuli la nde ma.

³² Wo kana a kɛ mɔgɔ-gbɛrɛ ma saraka-masɔlɛ ma min na. Wo kana tulu-gbɛrɛkɛ ladan iko tulu-sɛnimɛ sufa kɛ ladanta nya min. Wo ni a gbiliya a kilɛ fɛ bawo tulu-sɛnimɛ le.

³³ Ni min ya tuli wo nyɔgɔn ladan wo, ni min ya a kɛ mɔgɔ-gbɛrɛkɛ ma saraka-masɔla ma min na wo, wo ni wo gben wo kurun tɔ.”

Isɛnti Ladan-Koe

³⁴ Mari ya a fɔ Musa ye ko, “I ni fen-suma-diyama nani bi, sitakate wo, ɔnikiya wo, kalibanan wo, anubɛ farankinsɛnsi-sɛnimɛ. Anu kelen-kelennamɛ-bɛɛsi suman-nya ra ni kɛnya.

³⁵ I ni wonu nakofu ka anu ma isɛnti la ka a yabasan iko wo si sɛnti yabasan nya min. Wo ni kɔgɛ kɛ a rɔ alako a ni sɛninya.

³⁶ Wo ni wo do bunden ka a munke wo sigi tɔn-kenkirɛ wo yarɔ nta Fani-Bɔn la. Wo ni a fɛ-bira iko fen-sɛnima-bɛrɛbɛrɛ.

³⁷ Wo kana isɛnti-gbɛrɛkɛ ladan iko isɛnti-sɛnimɛ sufa kɛ ladanta nya min. Ni min ya wo ma, wo ni wo gben wo kurun tɔ. Isɛnti-sɛnimɛ le kɛ la min kɛ, wo ni a gbiliya a kilɛ fɛ.

³⁸ Ni mɔgɔ-wo-mɔgɔ ya isɛnti sufa kɛ ladan a nyɛrɛ ye ka a nyɛrɛ diya wo la, wo ni wo gben wo kurun tɔ.”