Bɔ-Koe-Iyipiti 28 - ALLALA KUMƐ

Saraka-Masɔlɛnuna Makiri-Fannu Nadan-Nya

¹ “Ile Musa ni i kɔrɔ-kei Aruna anubɛ ala den-keinu yabɔ Isirɛla mɔgɛnu tɛma, Nedabu anubɛ Abaihu anubɛ Ɛliyasa, anubɛ Itamarayi, kɔni. I ni anu madon ile Musa la alako anu ni saraka-masɔ-wɔlɛ kɛ nde ye.

^2-3 Mɔgɛ minnu kusan kurɛ karala a kilɛ fɛ, i ni wonu kele ko anu ni makiri-kura-sɛnimɛnu nadan i kɔrɔ-kei Aruna ye alako mɔgɛnu yɛ ni bɔ a la ka a gbiliya.

⁴ Mɔgɛ wonu bi kurɛ minnu nadanna, wo le kɛnu na, kɔgɔ-dala-kurɛ wo, kura-kundi-fugbɛ wo, duruku-ba-wɛ wo, duruku-kɔrɔ-donyɛ min sɔgɔnɛ wo, saraka-masɔla-wɛta fulɛ wo, anubɛ a butɛ-kiri-fan. Anu ni kura-sɛnimɛ wonu kara Aruna anubɛ ala den-keinu ye alako anu ni saraka-masɔ-wɔlɛ kɛ n ye.

⁵ Anu bi kura-hakikɛ min kelela linɛn, wo ni wo ma saraka-masɔlɛnuna makiri-kurɛ kɛnu na. Mɔgɛ minnu kusan, yesekara-yalafinyɛ wo, yesekara-bilolamɛ wo, a yesekara-wulan wo, anubɛ sɛnɛ-yesekari wo, wonu ni wo bi ka wo ma kurɛ kɛnu sɔgɔ-fan la.

Kura-Kundi-Fugbɛ Ladan-Nya

⁶ “Anu bi kura-hakikɛ min kelela linɛn, wo ni wo ma kura-kundi-fugbɛ la. Mɔgɛ minnu kusan, wonu ni yesekara-yalafinyɛ wo, yesekara-bilolamɛ wo, yesekara-wulan wo, anubɛ sɛnɛ-yesekari bi ka wo ma kura-kundi-fugbɛ wo sɔgɔ-fan la.

⁷ Wo ni kura-yili fila sɔ kura-kundi-fugbɛ wo tɔnkɔn filɛ la a si min kiri a kɛɛ kuma.

⁸ Buta-kiri-fan min nadannɛ iko kura-kundi-fugbɛ wo, wo ni wo tugun kura-kundi-fugbɛ wo la. Wo ni linɛn-kurɛ ladan buta-kiri-fan wo la. Anu ni yesekara-yalafinyɛ anubɛ yesekara-bilolamɛ anubɛ yesekara-wulan anubɛ sɛnɛ-yesekari sɔgɔ wo ma.

⁹ “Wo ni kuru-da-gbɛlɛ fila bi minnu tɔgɛ ɔnikisi ka Isirɛla bɔnsɔn-mɔgɔ tan-ni-fila tɔgɛ sɛbɛ wonu ma.

^10-11 Kuru-lɛsɛlɛ min kusan, wo si bɔnsɔn wɔrɛ tɔgɛ sɛbɛ kuru kelan ma. Wo kɔma, a si bɔnsɔn wɔrɛ doi tɔgɛ sɛbɛ kuri doi ma iko anu sɔrɔnta nya min. Wo ni na wonu sa sɛnɛ-mɔlɔni fila tɛma.

¹² Wo ni kuru filɛ wonu sa saraka-masɔla-wɛta kura-kundi-fugbɛ kɛɛ filɛ kuma. Anu si ma tamasere-kurinu na alako nde, Mari yili ni to Isirɛla mɔgɛnu ko. Aruna si kura-kundi-fugbɛ wo don a kan na. Wo si ma yili to kurinu na a kanban kun filɛ kuma nde, Mari ye.

¹³ Wo ni kuri wonu sigi tinɛ ladan sɛnɛ-mɔlɔnɛ rɔ.

¹⁴ Wo ni sɛnɛ-yɔlɔkɔ fila ladan ka anu dɛbɛ. Wo ni sɛnɛ-yɔlɔkɔ-dɛbɛni filɛ wonu sɔ a makiri-fan wonu na.”

Kɔgɔ-Dala-Kurɛ Ladan-Koe

¹⁵ “Wo ni linɛn-kurɛ bi ka a ma kɔgɔ-dala-kurɛ la. Wo si ma nde, Alla sako-lɔn-fan la. Wo ni a ladan iko saraka-masɔlɛta kura-kundi-fugbɛ la si dan nya min. Wo ni a sɔgɔ yesekara-yalafinyɛ anubɛ yesekara-bilolamɛ anubɛ yesekara-wulan anubɛ sɛnɛ-yesekari la.

¹⁶ Wo ni a rakunbɛn. A tɔnkɔn nanɛ bɛɛsi ra ni kɛnya. A kɔnɛ ni ma bira kelen, a yanyɛ ni ma bira kelen.

¹⁷ Wo ni kuru-da-gbɛlɛ gbaranda nani kankan a ma. A gbarandɛ fɔlɔtɛ wo kurinu tɔgɛ le kɛnu na, rubi wo, topasi wo, anubɛ ɛmarɔdi.

¹⁸ A gbaranda fila nyɔgɛ wo kurinu tɔgɛ le kɛnu na, tukɔsi wo, safaira wo, anubɛ daimon.

¹⁹ A gbaranda sawa nyɔgɛ wo kurinu tɔgɛ le kɛnu na, opɛli wo, agati wo, anubɛ amɛtisi.

²⁰ A gbaranda nani nyɔgɛ wo kurinu tɔgɛ le kɛnu na, bɔrɔ wo, ɔnikisi wo, anubɛ yasipa. Wo ni sɛnɛ-mɔlɔnɛ do ladan kuru-da-gbɛlɛ kɛnu si sa min tɔ ka anu kankan kɔgɔ-dala-kurɛ kɛ ma.

²¹ Wo ni kuri wonu sigi iko Isirɛla bɔnsɔn tan-ni-filɛ tɔgɛ ye nya min. Bɔnsɔn tan-ni-filɛ kelen-kelennamɛ-bɛɛsi tɔgɛ ni sɛbɛ kuri kɛnu ma.

²² “Wo ni sɛnɛ-yɔlɔkɔ-dɛbɛnɛ wonu sɔ kɔgɔ-dala-kurɛ wo la.

²³ Wo ni sɛnɛ-dɛɛn-kɔlɔni fila ladan ka wonu sɔ kɔgɔ-dala-kurɛ tɔnkɔn filɛ la a kan tɔ.

²⁴ Wo kɔma, wo ni sɛnɛ-yɔlɔkɔ-dɛbɛni filɛ wonu sɔ dɛɛn-kɔlɔni filɛ wonu na.

²⁵ Wo ni sɛnɛ-yɔlɔkɔ-dɛbɛnɛ wo kun filɛ fanan sɔ sɛnɛ-mɔlɔni filɛ wonu na minnu bi saraka-masɔlɛta kura-kundi-fugbɛ wo kanban kun filɛ kuma.

²⁶ Wo ni sɛnɛ-dɛɛn-kɔlɔni fila sɔ kɔgɔ-dala-kurɛ dugu la tɔnkɔn filɛ la a ya-yoge ma.

²⁷ Wo ni sɛnɛ-dɛɛn-kɔlɔni fila dogbɛrɛ sɔ saraka-masɔlɛta kura-kundi-fugbɛ la a kɔrɔ buta-kiri-fan kan tɔ ka wonu sɔ a yili filɛ la minnu bi bɔla kanban kun filɛ kuma.

²⁸ Wo ni kɔgɔ-dala-kurɛ dɛɛn-kɔlɔni filɛ doi fanan kiri saraka-masɔlɛta kura-kundi-fugbɛ la. Wo ni a kiri anu nyɔgɔn na yili-kolo-bilolamɛ la wo nya alako kɔgɔ-dala-kurɛ ni to a butɛ-kiri-fan kan tɔ. Wo le si a ma, kɔgɔ-dala-kurɛ ti bɔ saraka-masɔla-wɛta kura-kundi-fugbɛ wo la.

²⁹ “Aruna tenbi Kan-Tina-Sɛnimɛ rɔ tumɛ min, a ni a makiri-miran don a kan na Isirɛla bɔnsɔn tan-ni-filɛ tɔgɔ sɛbɛnɛ min ma. A kiri kura-kundi-fugbɛ ma, woletɔ nde, Alla si n hɛnkili to anu ko tuma-wo-tuma, ni a yogoma ma.

³⁰ Wo si nde, Alla sako-lɔn-fen filɛ minnu fɛ minnu tɔgɛ Yurim anubɛ Tumin, i ni wonu sa kɔgɔ-dala-kurɛ wo yifɛ rɔ. Aruna wa don nde, Marita Fani-Bɔn la tumɛ min, wonu ni to a kɔgɔ dɛ rɔ ka nde sako lɔn Isirɛla mɔgɛnuna ko la.”

Saraka-Masɔlɛ Makiri-Miran Donu

³¹ “Wo ni kura-bilolamɛ do bi ka a ma saraka-masɔlɛta duruku-ba-wɛ la min bi donna kura-kundi-fugbɛ kɔrɔ.

³² Wo ni duruki wo kan tɛgɛ ka saraba sa duruki wo kan ma woletɔ nyɔ ti fara yona.

^33-34 Kɔlɔma-gbɔɛ min tɔgɛ pamakarani, wo ni wola muninyɛnu nadan duruki wo da-gbole la. Wo ni wonu nadan yesekara-yalafinyɛ anubɛ yesekara-bilolamɛ anubɛ yesekara-wulan la ka wonu ma duruki wo da-gbole bunsan la. Wo ni sɛnɛ-tɛlan-dɔgɔmanɛnu kiri tala pamakaranila muninyɛ wonu tɛma duruki wo da-gbole la.

³⁵ Aruna si to duruki wo donna a kan na nta wɔlɛla ko la alako a kana faga. A tenbi don-ni-bɔɛ la Sɛnima-Sɛnima-Tinɛ rɔ tumɛ min duruki wo la a kan na, tɛlan wonu kan la si to bɔla nyɔ. Fananta a ye ata wɔlɛ kɛla, tɛlan wo kan si to bɔla nyɔ.

³⁶ “Wo ni sɛnɛ ladan ka a ma fagbatara! Wo ni a sɛbɛ sɛnɛ wo ma ko, ‘Mɔgɛ Kɛ Dantɛgɛnɛ Mari Le Ma.’

³⁷ I ni yesekara-bilolamɛ sɔ a la alako a ni kiri saraka-masɔlɛta fulɛ yarɔ.

³⁸ Wo ni to kirinɛ fulɛ wo ma Aruna telɛ ma woletɔ hali Isirɛla mɔgɛnu ma nta kɔ-fan di n ma a kilɛ fɛ, nde, Alla nyɛrɛ si sɔn kɔ-fan wonu na Arunala ko la.

³⁹ “Wo ni kura-hakikɛ do bi min tɔgɛ linɛn ka a ma duruku-kɔrɔ-donyɛ la. Wo ni linɛn-kurɛ do bi ka saraka-masɔlɛta fulɛ ladan. Kura-sɔgɔlɛ min bi buta-kiri-fan ladanna, wo ni a sɔgɔ a kin na!

⁴⁰ “Wo ni saraka-masɔ-durukinu nadan Arunala den-keinu ye. A ni buta-kiri-fannu nadan anu ye anubɛ a fulɛnu woletɔ mɔgɛnu yɛ si bɔ anu na ka saraka-masɔlɛnu gbiliya.

⁴¹ I ni wonu don i kɔrɔ-kei Aruna anubɛ ala den-keinu kan na. I ni dantɛgɛ-tuli kɛ anu kunyɛ rɔ ka anu dantɛgɛ nde, Alla ma alako anu ni wɔlɛ kɛ nde ye saraka masɔ tinɛ.

⁴² “Wo ni linɛn-kura-nyimɛ ma anuta kurusi-kundi la. Wonu dan si ma anu wore la woletɔ mɔgɔ ti anu nakolɔn yen.

⁴³ Aruna anubɛ ala den-keinu wa don Fani-Bɔn la tumɛ min, anu si kurusi wonu don. Fananta anu bi nta wɔli kɛla kata burɔ, kurusi wonu ni to anu na. Ni anu ma kurusi-kundi wonu don kan-tina-sɛnimɛ wo rɔ, nde, Alla si anu faga bawo anu nakolɔn le n yala worɔ. “Wo ni ma habadan-tɔn la Aruna anubɛ a kebila-mɔgɛnu ye.”