Bɔ-Koe-Iyipiti 27 - ALLALA KUMƐ

Saraka Mintan Tinɛ Ladan-Nya

¹ “Wo ni saraka-mintan-tinɛ ladan akasiya kɔlɔma la. A sɔɛ ni ma nunkan-nya sawa la. Ala yanyɛ ni ma nunkan-nya loli la, a kɔnɛ ni ma nunkan-nya loli la. A tɔnkɔn nanɛ bɛɛsi ra ni kɛnya bɛrɛtɛ!

² Wo ni bolon nanɛ ladan a tonko nanɛ rɔ. Saraka mintan tinɛ anubɛ a bolon nanɛ, wo bɛɛsi la ni dan nya-kun-kelen. Wo ni silɛɛ sa saraka-mintan-tinɛ wo kan tinɛ bɛɛ ma.

³ Wo ni saraka-mintan-tinɛ wo fɛ-miran bɛɛsi ladan silɛɛ la, a bugura-makɔ-fen wo, a sɔbulu wo, a yele-purupuru-miran wo, a sogo-sɔgɔ-fen wo, anubɛ a ta-kɔ-miran.

⁴ Wo ni silɛɛ ladan yalɛ la ka silɛɛ wo bolo-kalama-dɛɛn nani ladan ka anu sɔ yalɛ wo tɔnkɔn nanɛ bɛɛ la.

⁵ Wo ni wo dun saraka-mintan-tinɛ burɔ. A ni to saraka-mintan-tinɛ wo tɛma.

⁶ Wo ni saraka-mintan-tinɛ wo bi-kɔlɔmanu nadan akasiya kɔlɔma la ka silɛɛ sa wonu ma.

⁷ A bi-kɔlɔmanu ni don bolo-kalama-dɛɛn wonu woe rɔ saraka-mintan-tinɛ tɔnkɔn filɛ rɔ. Wo wa wuli a bila tumɛ min, wonu si ma a bi-fan la.

⁸ Wo si saraka-mintan-tinɛ min nadan fɛrannu na wo burɛ ra ni kolonya fɔ sila-yalɛ dɔrɔn, wo le ye dunna a burɔ. Wo ni a ladan iko n bara a ladan-bole yira i la kɔnkɛ kɛ kuma nya min.”

Fani-Bɔn Masansan-Koe

⁹ “Wo ni Fani-Bon-kata rabɛn. Wo ni linɛn-kura-nyimɛ nunkan-nya kɛmɛ bi ka kata bolo-nyima-waralɛ masansan wo la.

¹⁰ Wo ni kɔlɔma mogan nadan. Wo ni silɛɛ ladan ka wonu sa kɔlɔma wonu kɔrɔ. Wo ni wodi-gbɛ ma lundannu anubɛ gbɛsɛ-gbɛsannu na. Lundan wonu si ma linɛn-kurɛ wonu dun fan la. Gbɛsɛ-gbɛsannu si ma kɔlɔma wonu balan-fan la. Kata-kɔlɔma wonu kian la ni dan silɛɛ la.

¹¹ A bolo-maran-waralɛ ni ma wo nya na le. Kata-masansan-kurɛ yanyɛ ni ma nunkan-nya kɛmɛ la. A kata-kɔlɔma-lundannu anubɛ a gbɛsɛ-gbɛsannu la ni dan wodi-gbɛ la. Wo ni kɔlɔma mogan ladan ka silɛɛ sa wonu kɔrɔ.

¹² “Kata wo tele-yigi waralɛ, a kɔnɛ ni ma nunkan-nya bi-loli la. A kata-kɔlɔmanu ni ma kɔlɔma tan la anubɛ sila tan minnu bi sala kɔlɔma wonu kɔrɔ.

¹³ “Kata burɛ min telennɛ tele-bɔɛ la, wo ni ma nunkan-nya bi-loli la.

¹⁴ Kurɛ min bi tenbi-bolɔn bolo-nyimɛ rɔ, wo ni ma nunkan-nya tan-ni-loli la. A kata-kɔlɔma sawɛ minnu bi don-dɛ la, kurɛ wonu si kiri minnu na, wo ni sila sawa sa wonu kɔrɔ.

¹⁵ Kurɛ min bi tenbi-bolɔn bolo-maran rɔ, wo ni ma nunkan-nya tan-ni-loli la. A kata-kɔlɔma sawɛ doi kurɛ wo si kiri min na, wo ni sila sawa fanan sa wonu kɔrɔ.

¹⁶ Anu bi kura-hakikɛ min kelela linɛn, wo ni wo kiri tenbi-bolɔn la. Kura-sɔgɔlɛ min kusan, wo ni a ladan. A ni yesekara-yalafinyɛ anubɛ yesekara-bilolamɛ anubɛ yesekara-wulan bi ka mɔlɔnɛ do sɔgɔ linɛn-kurɛ wo ma. Kurɛ min kirinɛ tenbi-bolɔn wo la, a yanyɛ ni ma nunkan-nya mogan na. Wo si a kiri kɔlɔma nani na minnu sɔnɛ sila nani kuma tenbi-bolɔn wo la.

¹⁷ “Kata-kɔlɔma bɛɛsi ni wodi-gbɛ-lundannu sɔrɔn anubɛ wodi-gbɛ-gbɛsɛ-gbɛsannu ka silɛɛ sa kɔlɔma kelen-kelan wo bɛɛsi kɔrɔ.

¹⁸ Kata wo yanyɛ ni ma nunkan-nya kɛmɛ la. A kɔnɛ ni ma nunkan-nya bi-loli la. Wo ni linɛn-kurɛ ma a masansan-fan la. A sɔɛ ni ma nunkan-nya loli la.

¹⁹ Miran min bɛɛsi la ye danna Fani-Bon-burɛ wɔlɛla ko la anubɛ Fani-Bon-yili si kiri minnu na anubɛ kata-kɔlɔmanu yili si kiri minnu na, wonu ni ma silɛɛ la.”

Lɛnpu Fɛ-Bira-Koe

^20-21 “Aruna anubɛ ala den-keinu si lɛnpu wo rabɛn ka a sigi Fani-Bɔn burɔ Kan-Tina-Sɛnimɛ rɔ. Yorolan si taran anubɛ tɔn-kenkirɛ tɛma. Ile Musa ni a fɔ Isirɛla mɔgɛnu ye ko anu ni na ɔlifi tulu-hakikɛ do la. Woletɔ Aruna anubɛ ala dannu si lɛnpu wo lamalan wura-wo-wura. Lɛnpu wo si to malanna ka a bi wurɛ ma ha sɔgɔma. Wo si ma habadan-tɔn la Aruna anubɛ a kebila-mɔgɛnu ye.”