Bɔ-Koe-Iyipiti 24 - ALLALA KUMƐ

Lanyiri Lakanbali-Koe Mɔgɛnu Bolo

¹ Mari ya a fɔ Musa ye ko, “I ni Aruna bi anubɛ Nedabu anubɛ Abaihu ka wonu sa Isirɛla kun-tigi bi-wɔrɔnfila kuma. I ni yɛlɛ wonu na kɔnkɛ bu la ka nde, Mari bato.

² Ile, Musa kelan ni yɛlɛ kɔnkɛ kuma ka i madon n na kɔnɔ kun-tigi wonu kana anu gbɛrɛn n ma. Mɔgɔ-gbɛrɛkɛ kana yɛlɛ kɔnkɛ bu la kun-tigi kɛnu fɛ.”

³ Wo kɔma, Musa tara ka Marila kumɛ anubɛ ata tɔn kɛnu natenbi mɔgɛnu ma. Mɔgɛ bɛɛ ya a fɔ nya-kun-kelen ko, “Mari ara kumɛ min bɛɛsi fɔ, ma si wonu bira.”

⁴ Wo kɔma, Musa ya Marita kumɛ wo bɛɛsi sɛbɛ. Wo banda kɛ sɔgɔma subaga, Musa wulita ka saraka-mintan-tinɛ sɔ kɔnkɛ wo kɔrɔ. A ya kuru-lɔngbɔn tan-ni-fila sɔ saraka-mintan-tinɛ wo dafɛ iko Isirɛla bɔnsɔn kebila tan-ni-filɛ ye nya min.

⁵ A ya keminɛ donu yabɔ Isirɛla mɔgɛnu tɔ alako wonu ni saraka-mintantɛnu mintan Mari ye anubɛ yisi-kima-sarakɛnu, tura-bulannu, kɔni.

⁶ Musa ya sarakɛ wo yele fara sigi tina fila la. A ya sigi tina kelan bi ka wo kɛ mirannu tɔ ka doi bi ka a labɔn saraka-mintan-tinɛ wo ma.

⁷ A ya tɔn-buku wo bi ka a karan mɔgɛnu ye. Anu ya a yabi ko, “Mari ara min bɛɛsi fɔ, ma si wonu kɛ ka ala kumɛ bira.”

⁸ A yele-toe min tora mirannu tɔ, Musa ya wo fanan bi ka wo pusen mɔgɛnu ma. A ko, “Yele kɛ si ma lanyiri-kiri-fan la wobɛ Mari tɛma alako wo ni ata lanyiri latɔnbagaya.”

⁹ Musa ya Aruna anubɛ ala den-kei filɛ bi, Nedabu anubɛ Abaihu, kɔni, ka wonu sa Isirɛla kun-tigi bi-wɔrɔnfila kuma ka ta anu na kɔnkɛ wo bu tɛma.

¹⁰ Anu ya anuta Alla yen. Alla sɔra kan min, anu ya nyɔ fanan yen, a matɛgɛnɛ iko safaira. Safaira wo, kuru-da-gbɛlɛ do le wo la min matɛgɛnɛ iko san-kolo-bilolamɛ.

¹¹ Hali anu ya Alla nyɛrɛ yen, Alla ma ko-wo-ko ma Isirɛla kun-tigi wonu na. Anu ya fen-dɔn-kɛ nyɔ ka anu min.

Musa Mɛ-Koe Kɔnkɛ Kuma

¹² Mari ya a fɔ Musa ye ko, “Na n bara ka mɛ n fɛ kɔnkɛ kun tɛma yan. N si kuru-walan fila don i bolo nna tɔnnu sɛbɛnɛ minnu ma alako i ni mɔgɛnu karan wonu na.”

¹³ Musa anubɛ a gba-fɛ-bilalɛ Yasowa wulita ka yɛlɛ kɔnkɛ kuma.

¹⁴ Kɔnɔ yanni anu ni wuli, Musa ya a fɔ kun-tigi wonu ye ko, “Wo ni ma makɔni yan. Ma si na wo wara tun. Ni sɔsɔli fenfen donta wo tɛma, wo si a fɔ Aruna anubɛ Huri ye.”

¹⁵ Anu bi yɛlɛla tumɛ min, anu ya a yen, kɔnkɛ kumɛ wo bɛɛ manɛ banda-finyɛ la.

¹⁶ Marila gbiliyɛ wo tora Sinayi kɔnkɛ kuma tele wɔrɔ kɔrɔ iko banda-finyɛ.

^17-18 A tele wɔrɔnfila nyɔgɛ ma, Mari ya Musa rakele banda-finyɛ wo rɔ. A tara banda-finyɛ wo tɛma. A ye nyɔ su bi-nani, tele bi-nani. Isirɛla mɔgɛ toe minnu bi dagɛ rɔ, wonu ya Marila gbiliyɛ wo yen kɔnkɛ kuma iko ta-mɛlɛn-belebele-wɛ.