Bɔ-Koe-Iyipiti 21 - ALLALA KUMƐ

Allata Tɔn Donu

¹ Mari ya a fɔ Musa ye tun ko, “I ni tɔn kɛnu fanan di Isirɛla mɔgɛnu ma.

² Ni min ya a nyɛrɛ sigi tulumɛ la a ta-nyɔgɛ Isirɛla mɔgɛ ma, a ni wɔlɛ kɛ a ye san wɔrɔ kɔrɔ. A san wɔrɔnfila nyɔgɛ ma, wo ni a bolo bɔ a rɔ. A ya fan min bi a bolo, wo kana wo makele a la.

³ Ni a kelan sigira tulumɛ la, a kelan si boloka. Ni a nara musi le la a bolo, a ni anubɛ ala musi boloka.

⁴ Kɔnɔ ni tuluma-tigi wo ya musi do di a ma, ni wo ya dannu sɔrɔn a ye, musi wonubɛ ala dannu si to tuluma-tigi wo bolo. A si a bolo bɔ a kelan rɔ.

⁵ “Kɔnɔ min bi tulumɛ rɔ wo la, ni wo ya a fɔ mɔgɛ bɛɛ yala ko a ara a tigi keni anubɛ ala musi wo anubɛ ala dannu, a kana sɔn, a tigi ni a bolo bɔ a rɔ worɔ.

⁶ A tigi wo si ta a la nde, Mari bato tinɛ ka a tole sɔgɔ bɛn la bonda-dɛ la nyɔ. Min bi tulumɛ rɔ, wo si to wɔlila a tigi ye a siyi-tele-bɛɛ kɔrɔ.

⁷ “Ni kei do ya ala dunmusi mayira a ta-nyɔgɛ do ma ka a ma yɔɔn-musi la, yɔɔn-musi wo kana hɔrɔya san wɔrɔnfila nyɔgɛ ma iko yɔɔn-kei.

⁸ A tigi min bara a san alako ka a ma ala musi la kɔnɔ tɔ-a-la, musi wo sɔgɔ la ni bɔ a la, a si fɛrɛ di yɔɔn-musi wo fa ma, wo ni a kunka a ma. Kɔnɔ a ma bɛn, yɔɔn-tigi ni musi wo mayira sibolo-gbɛrɛkɛ-mɔgɛ ma. Ni a ya wo ma, a ara ko-yogomɛ le ma musi wo la.

⁹ Ni musu-tigi ya musi wo di ala den-keminɛ ma, a ni a rabira iko a nyɛrɛla dunmusi bawo yɔɔn ma a la tun.

¹⁰ Ni kei ya musu-gbɛrɛkɛ furu ka a sa yɔɔn-musi wo kuma, a ni to dɔn-fan dila yɔɔn-musi wo ma ka a fɛrɛya bɔ ka musu-sigi-sereya-kilɛ tagama ka a bɛn a ma iko a duruta a mala nya min nun fɔlɔ.

¹¹ Ni a ma ko sawɛ wo kɛ ala yɔɔn-musi wo ye, musi wo si hɔrɔya. Kei wo kana a yili bɔ.

Tɔn Donu Karagbɛlɛyɛla Ko La

¹² “Ni min ya mɔgɔ gbesi ka a faga, wo ni wo tigi faga yati!

¹³ Kɔnɔ ni min ma a lawuli a ma, a ni mɔgɛ do faga, ado Alla kitira a la, mɔgɛ wo si a buri ka ta kan tinɛ do rɔ n bi nala min yirala wo la. A si to a niyi la nyɔ.

¹⁴ Ni mɔgɛ do ya yanfɛ sigi a ta-nyɔgɛ do la ka a faga wunduyogoyɛ la, hali a tara nna saraka-mintan-tinɛ ala kisi-koe la, wo ni wo tigi faga.

¹⁵ “Ni min ya a na gbesi, ni wo ma, a fa, wo ni wo tigi faga yati!

¹⁶ “Ni min ya mɔgɛ kankan, ni a ya mɔgɛ wo mayira le wo, ni a tora a bolo le wo, wo ni kankan wo faga.

¹⁷ “Ni min ya a na, ni wo ma, a fa lafɛya, wo ni wo tigi faga yati!

¹⁸ “Ni mɔgɔ fila kɛlɛta, ni doi ya a ta-nyɔgɛ bon kuri la wo, ni a ya a tɔntɔn a bole la wo, kɔnɔ a ma a faga, a ti nanparan sɔrɔn wola ko la. Ni a ya a tanban ha a ni wo kirayɛ sa,

¹⁹ ni a ya a lasɔ ka kɔlɔma sɔ a kɔrɔ ka tagama, min ya a gbesi wo la, wo si wo boloka. Kɔnɔ a ni a dandan ha a ni kɛndɛya. Wati min bara tinya wo bolo ka yɛ, a si wo sara wati wola ko la.

²⁰ “Ni mɔgɔ ya ala yɔɔn-kei, ni wo ma, ala yɔɔn-musi gbesi kɔlɔma la, ni yɔɔn wo fagara a bolo, wo ni wo tigi tɔrɔ kosɛbɛ!

²¹ Hali wo, ni a ma faga tele filɛ wo kɔrɔ, wo kana kuma di yɔɔn-tigi wo ma bawo a ya a san de!

²² “Ni mɔgɔ fila tora kɛlɛla, doi ni ta bɛn musu-kolomɛ do la, musu-kolomɛ wo buyi ni tinya kɔnɔ ko ma ma musi wo la, anu si kɛlɛ-kɛlɛ wo bɔni iko musu-tigi ye a latɛgɛla nya min, ni kiti-tɛgɛlɛnu sɔnta wo ma, kɔni.

²³ Kɔnɔ ni ko tinyanta musu-kolomɛ wo ma, wo si a tayili sara. Ni min ya niyi bɔ, wo ni wo niyi bɔ.

²⁴ Ni min ya yɛ tii, wo ni wo fanan yɛ tii. Ni min ya nyin keri, wo si wo fanan nyin keri. Ni a ya min ma a bole la, wo ni wo ma ale fanan bole la. Ni a ya min ma a kian la, wo ni wo ma ale fanan kian la.

²⁵ Ni a ya a mamintan, wo ni ale fanan mamintan. Ni a ya a tanban, wo ni ale fanan tanban. Ni a ya a mukun, wo ni ale fanan mukun.

²⁶ “Ni mɔgɔ ya ala yɔɔn-kei, ni wo ma, ala yɔɔn-musi yɛ tii, a ya-tinya-koe wo si a ma, a ni hɔrɔya.

²⁷ Ni a ya ala yɔɔn-kei, ni wo ma, ala yɔɔn-musi tii a dɛ rɔ, wo nyin ni bɔ, a nyin-bɔɛ wo si a ma, a ni hɔrɔya.

Tura-Tigita Tura Bira-Nya

²⁸ “Ni turɛ do ya kei, ni wo ma, musi sɔgɔ ka a faga, wo ni turɛ wo mabon kuri la ka a faga yati! Mɔgɛ kana turɛ wo soge dɔn. Kɔnɔ wo kana kuma di tura-tigi wo ma.

²⁹ Kɔnɔ ni tura-feremɛ do tara mɔgɛ do sɔgɔ, ado a tigi ya a lɔn nun ko a fere kɔnɔ hali wo, a ma sɔn a kiri-koe ma, ni a ya mɔgɛ do faga, wo si turɛ wo mabon kuri la ka a tigi fanan faga.

³⁰ Kɔnɔ ni anu ya dɛ min nyɔgɔ tii a kɔrɔ a niyila ko la, a ni wo nyɔgɔn di worɔ.

³¹ Ni turɛ wo ya mɔgɛ dola dan do sɔgɔ a kere la, wo ni a ma a la iko tɔn kɛ ye nya min.

³² Ni mɔgɛ wola tura-feremɛ ya mɔgɛ dola yɔɔn sɔgɔ, tura-tigi wo ni wodi-gbɛ bi-sawa bɔ ka a di yɔɔn-tigi ma. Kɔnɔ wo si turɛ wo mabon kuri la.

³³ “Ni mɔgɛ do ya denkɛ sin, ka, ni a ya denka kɔrɛ laka, a ma fen sa a dɛ la, ni mɔgɛ dola turɛ buira wo rɔ, ni wo ma, ala sofɛlɛ,

³⁴ denka-tigi wo si a nyɔgɔn sara. Turɛ wo, sofɛlɛ wo, wonu soge si ma ale denka-tigitɛ la.

³⁵ “Ni mɔgɛ dola turɛ ya mɔgɛ dotɛ faga, mɔgɔ filɛ wonu ni dɛn ka tura-kɛndɛ wo mayira ka a sɔnkɛ rafara anu nyɔgɔn tɛma. Wo kɔma, anu si tura-faganɛ wo soge ratala anu nyɔgɔn tɛma.

³⁶ Kɔnɔ ni a ya a lɔn ko turɛ wo duruta a ta-nyɔgɛnu tugula le nun kɔnɔ a tigi ti sɔn a kiri-koe ma, turɛ wo wa mɔgɛ minta turɛ faga, ale tura-tigi si tura-faganɛ wo nyɔgɔn labɔ turɛ doi la. Tura-faganɛ wo ni ma aletɛ la.”