Bɔ-Koe-Iyipiti 20 - ALLALA KUMƐ

Allata Tɔn Tan Wara-Koe

¹ Alla ya a fɔ Musa ye ko a ni a latenbi Isirɛla mɔgɛnu ma ko,

² “Nde le wota Mari Alla la min ya wo labɔ yɔɔnyɛ rɔ Iyipiti nyamanɛ rɔ.

³ Woletɔ wo kana fen-gbɛrɛkɛ bato nde, Alla kɔma muk!

⁴ “Fan minnu bi san-kole rɔ wo, fan minnu bi dugu-kole kuma wo, fan minnu bi yi kɔrɔ wo, wo kana wonuna muninya fenfen ladan

⁵ wo si wo nyɛnkin min kɔrɔ ka a kɔ. Nde le wota Mari Alla la min sa nyinina a senɛ ma. Ni nde, Mari sɔgɔ labɔra mɔgɛ minnu na ka bɛsɛ kɔ, n si wonu tɔrɔ, hali anuna dannu anubɛ anuna mamanɛnu ha ka ta a sigi anu tolo-birɛnu na.

⁶ Kɔnɔ ni min ya n keni ka nta tɔn kɛnu bira, hali wonu bɔnsɔn matiinu, n si nta keninteyɛ yira wonu na.

⁷ “Mɔgɔ kana n tɔgɛ ratɛgɛ fufafui la. Ni min ya wo ma, n si wo tigi tɔrɔ.

⁸ “Wo ni wo hɛnkili to Sulen-Tele ko ka tele-sɛnimɛ wo bira gben!

⁹ Wo ni wola wɔlɛ bɛɛ kɛ tele wɔrɔ kɔrɔ

¹⁰ kɔnɔ a tele wɔrɔnfila nyɔgɛ si ma Sulen-Tele la nde, Mari Alla ye. Wo kana wɔli-wo-wɔli kɛ wulɔn tele ma. Wola dannu wo, wola yɔɔnnu wo, wola kolo-fannu wo, anubɛ wola sundannu, wonu fenfen kana wɔli kɛ.

¹¹ Nde, Mari le ya san-kole dan anubɛ dugu-kole anubɛ kɔgɔ-yi anubɛ fan min bɛɛsi ye duninya rɔ. N ya wo bɛɛ dan tele wɔrɔ le kɔrɔ ka n sulen a tele wɔrɔnfila nyɔgɛ ma. Woletɔ nde, Mari ya nta duwɛ to a tele wɔrɔnfila nyɔgɛ ma ka a ma tele-sɛnimɛ la.

¹² “Wo ni wo fanu anubɛ wo nanu gbiliya. Woletɔ n bara wo yili-madiya nyamanɛ min na, wo si simayɛ sɔrɔn wo rɔ.

¹³ “Wo kana mɔgɛ faga.

¹⁴ “Wo kana yɛlɛnyɛ kɛ.

¹⁵ “Wo kana kankanyɛ kɛ.

¹⁶ “Wo kana foninya-sereyɛ bɔ.

¹⁷ “Mɔgɔ kana a niyi sa a sigi-nyɔgɛ bolo-fan kuma iko bon wo, musu wo, yɔɔn wo, anubɛ kolo-fen.”

Isirɛla Mɔgɛnu Kilan-Koe

¹⁸ Mɔgɛnu ya banda-nyin-masɔgɛ yen ka san-sɛran anubɛ buru-fɛ-kan lamɔɛn ta-sisi-fin-bɛ rɔ kɔnkɛ kuma tumɛ min, anu yɛrɛyɛrɛnta ka anu masɛgi anu kɔma.

¹⁹ Mɔgɛ wonu ya a fɔ Musa ye ko, “I yandi, Alla kana kuma ma ye kamasɔrɔn ma kilannɛ a la. Ni a kumara ma ye, ma si faga. Ni ile nyɛrɛ kumara ma ye, ma si a lamɔɛn de!”

²⁰ Musa ya a fɔ mɔgɛnu ye ko, “Wo kana kilan. Alla ara na ka wola dɛnkɛninyɛ kɔrɔbɔ. Alla ye a fɛ, wo ni a gbiliya alako wo kana kilɛ boloka ka hakɛ kɛ.”

²¹ Mɔgɛnu tora sɔni wula-yan la, fɔ Musa kelan min ya a gbɛrɛn pinpi-wɛ wo ma kɔnkɛ kuma Alla ye kan tinɛ min.

Saraka Mintan Tinɛ Ladan-Koe

²² Mari ya a fɔ Musa ye ko, “I ni a fɔ Isirɛla mɔgɛnu ye ko anu bara a yen anu nyɛrɛ yɛ la serr, ko n bara kuma anu ye banda-finyɛ wo rɔ.

²³ Anu kana wodi-gbɛ anubɛ sɛnɛ ladan bɛsɛnu na ka mabɛ wonu kɔ.

²⁴ “Ni anu bi saraka-mintan-tinɛ sɔla n ye, anu ni a sɔ bɔnkɛ la. Anu ni anuna sagɛnu anubɛ anuna baanu anubɛ anuna ninkinu ma sarakɛnu na saraka-mintan-tinɛ wo kuma ka saraka-mintantɛnu bɔ nyɔ anubɛ yisi-kima-sarakɛnu. N ba n bato tinɛ yira anu na kan-bo-kan, n si anu taran nyɔ ka duwa anu ye.

²⁵ Kɔnɔ anu ba wuli saraka-mintan-tinɛ kɛ sufa sɔla n ye kuri la tumɛ min, anu kana kuru-malɛsɛnɛnu bi ka anu ma a sɔ-fan la. Ni anu ya a lɛsɛ numuya-miran la, anu bara kuri wonu kɔsɔ.

²⁶ Min sanɛ wo kuma, anu kana saraka-mintan-tinɛ yɛlɛ tinɛ sɔ a ma, woletɔ mɔgɛnu ti saraka-masɔlɛnu nakolɔn yen.”