Bɔ-Koe-Iyipiti 19 - ALLALA KUMƐ

Musa Yɛlɛ-Koe Kɔnkɛ Kuma

¹ Isirɛla mɔgɛnuna bɔɛ Iyipiti nyamanɛ rɔ, karɛ fila, a sawa nyɔgɛ, a tele fɔlɔtɛ nyɛrɛ ma, anu kera Sinayi wulɛ rɔ.

² Anu bɔra kan tinɛ wo rɔ min tɔgɛ Sulen Tinɛ ka anu daga makɛ Sinayi kɔnkɛ kɔrɔ.

³ Musa yɛlɛta kɔnkɛ wo kuma. Alla ya a fɔ Musa ye nyɔ ko, “Ta a fɔ Yakoba bɔnsɔn-mɔgɛnu ye, Isirɛla mɔgɛnu, kɔni, ko,

⁴ ‘N bara min ma Iyipiti kɛnu na, wo ara wo rayen. N bara wo bi ka wo ma ntɛ la ka wo fɛ-bira kilɛ la iko bibi tenbi ala dannu fɛ-birala gban tinɛ.

⁵ Woletɔ ni wole ya n kuman-kan bira gben ka nta lanyiri latɔnbagaya, wole si ma n halalɛ la ka tenbi mɔgɛ bɛɛ la duninya rɔ. Ntɛ le duninya bɛɛsi la.

⁶ Wo si ma saraka-masɔlɛnu anubɛ sibolo-sɛnimɛnu na n ye. I si ta kumɛ kɛ fɔ Isirɛla mɔgɛnu ye.’ ”

⁷ Musa tara Isirɛla mɔgɔ-banu kundɛn kan-tina-kelen. Mari ya kumɛ min bɛɛsi fɔ a ye, a ya wonu takaran anu ye.

⁸ Mɔgɛ bɛɛsi ya a yabi anu nyɔgɔn fɛ ko, “Mari ara min bɛɛsi fɔ, ma si wonu bira.” Musa tara mɔgɛnu kan wo latenbi Mari ma.

⁹ Mari ya a fɔ Musa ye ko, “N ba wuli kumala i ye tumɛ min, n si na i ma banda-finyɛ rɔ, woletɔ mɔgɛnu si wo yen ka n kuman-kan lamɔɛn. Wo si a ma, anu ni la i la burubukai!”

¹⁰ Musa ya mɔgɛnuna yabilɛ wo latenbi Mari ma. Mari ya a fɔ Musa ye ko, “Ta a fɔ mɔgɛnu ye ko anu ni anu sɛninya bi anubɛ sina. Anu ni anuna kurɛnu ku.

¹¹ A tele sawa nyɔgɛ ma, n si a taran, anu bara anu tabɛn kamasɔrɔn a tele sawa nyɔgɛ wo ma, n si yigi Sinayi kɔnkɛ kuma banda-finyɛ rɔ mɔgɛ bɛɛ yala.

¹² I ni dan sa kɔnkɛ kɔrɔ alako mɔgɛnu kana tenbi nyɔ la ka yɛlɛ kɔnkɛ kuma. I ni a fɔ anu ye ko anu ni a ma anu fɛrɛma. Anu kana tenbi dan wo la ka yɛlɛ kɔnkɛ la, ni wo ma, ka tugu dan wo la. Ni min ya a kian latenbi dan wo kɔma, anu kana wo kɛndɛ to.

¹³ Mɔgɔ-wo-mɔgɔ kana a bole tugu tɔn-tinyalɛ wo la fɔ ka a faga kalabɛn la. Ni wo ma, anu ni a mabon kuri la. Mɔgɔ wo, kolo-fen wo, ni min ya tɔn wo tinya, anu kana wo kɛndɛ to. Anu ba buru-fɛ-kan lamɔɛn tumɛ min, anu ni anu madon kɔnkɛ kɛ la.”

¹⁴ Musa yigira mɔgɛnu wara tumɛ min ka bɔ kɔnkɛ kuma, a ya a fɔ anu ye ko anu ni anu sɛninya Mari bato-koe la ka anuna kurɛnu ku.

¹⁵ Wo kɔma, Musa ya a fɔ mɔgɛnu ye ko, “Wo ni wo rabɛn tele sawa kɛnu kɔrɔ. Wo kana wo gbɛrɛn musu ma wulɔn.”

¹⁶ A tele sawa nyɔgɛ wo sɔgɔma, anu ya banda-nyin-masɔgɛ yen ka sangbalamɛ anubɛ buru-fɛ-kan-belebele-wɛ lamɔɛn banda-fin-digidigi-wɛ rɔ kɔnkɛ wo kuma. Minnu bi dagɛ wo rɔ, wonu yɛrɛyɛrɛnta kilan bolo.

¹⁷ Musa ya mɔgɛnu bi dagɛ rɔ ka ta anu na Alla ma kɔnkɛ wo kɔrɔ.

¹⁸ Ta-sisi bɔra Sinayi kɔnkɛ kuma bawo Mari le wara yigi kɔnkɛ wo kuma iko tɛ. Ta-sisi wo yɛlɛta kulakula! Kɔnkɛ wo kan tinɛ bɛɛsi yɛrɛyɛrɛnta.

¹⁹ Buru-fɛ-kan koloyara tumɛ min, Musa kumara. Alla ya a yabi san-sɛran rɔ.

²⁰ Mari yigira Sinayi kɔnkɛ kun tɛma. Mari ya a fɔ Musa ye ko, “Na n bara kɔnkɛ kun tɛma yan.” Musa tara a wara.

²¹ Mari ya a fɔ a ye ko, “I ni yigi ka mɔgɛnu kawandi alako anu kana tenbi dan wo la ka nde, Mari ragbɛ. Ni min ya wo ma, wo tigi si faga.

²² Hali saraka-masɔlɛ minnu bi mabɛ mɔgɛnu tɛma, wonu fanan ni anu sɛninya. Ni wo ma, n si anu fanan tɔrɔ.”

²³ Musa ya a fɔ Mari ye ko, “Mɔgɛnu ti yɛlɛ yan bawo i wara a fɔ ma ye ko ma ni dan sa kɔnkɛla minɛ rɔ ka a ma kan-tina-sɛnimɛ la.”

²⁴ Mari ya a fɔ a ye ko, “Ta Aruna bi kɔnkɛ kɔrɔ. I ni yɛlɛ a la yan kɔnɔ saraka-masɔlɛnu anubɛ a mɔgɛ toenu kana tenbi dan la ka nde, Mari yen muk! Ni min tenbira, n si wo tɔrɔ.”

²⁵ Woletɔ Musa yigira mɔgɛnu wara ka Allala sarakanɛ lake anu ma.