Bɔ-Koe-Iyipiti 17 - ALLALA KUMƐ

Yi Bɔ-Koe Farɛ Rɔ

¹ Nba, Isirɛla mɔgɛ bɛɛ bɔra Sin wulɛ rɔ ka tagama iko Mari ya a fɔ anu ye nya min nun. Anu ya anu daga makɛ kan tinɛ do rɔ min tɔgɛ Sulen Tinɛ kɔnɔ anu ma yi taran nyɔ.

² Woletɔ mɔgɛnu nyɛɛra Musa ma ko, “Yi di ma ma.” Musa ya a fɔ anu ye ko, “Wo ye tɛgɛla Mari rɔ ka a kɔrɔbɔ nfenna ko la? Wo ye nyɛɛla nde ma kama worɔ?”

³ Kan-nagbalɛ ya a ma, anu ya gbunya-kuma-fɔɛ dabira Musa ma. Anu ko, “Nfenna i ya ma labɔ Iyipiti ka na male la yan, ba? A di i ye mabɛ mala denbayɛnu anubɛ mala kolo-fannu ni faga kan-nagbalɛ bolo yan, wa?”

⁴ Musa ya a kan nabɔ Mari ma ko, “N si nfen ma ita mɔgɛ kɛnu ye? A ara to doni, anu ni n mabon kuri la.”

⁵ Mari ya a fɔ Musa ye ko, “Isirɛla mɔgɔ-ba donu kofu i ma. Wobɛ wonu ni sɔ anu yarɔ tagama tinɛ. I ya Nayɛli bɛ gbesi sewuri min na nun, i ni ta wo la i bolo.

⁶ N si sɔ i yarɔ farɛ kuma Sinayi kɔnkɛ kɔrɔ. I wa farɛ wo gbesi tumɛ min, yi si tugu a rɔ alako mɔgɛnu ni anu min.” Musa ya a ma wo nya Isirɛla mɔgɔ-banu yala. (Mɔgɛ bɛɛsi nara wo kɔma ka anu min.)

⁷ Isirɛla mɔgɛnu ya gbunya-kumɛ dabira Mari ma a kɔrɔbɔ-koe la min kɛ alako ka a lɔn ni Mari ye anu tɛma, ka, ni a sa anu tɛma. Woletɔ a ya kan tinɛ wo tɔgɔ sa Kɔrɔbɔ Tinɛ anubɛ Sɔnkɔ-Sɔnkɔya.

Amalɛkinu Kɛlɛ-Koe

⁸ Amalɛkinu wulita Isirɛla mɔgɛnu kan ma kan tinɛ wo rɔ min tɔgɛ Sulen Tinɛ.

⁹ Woletɔ Musa ya a fɔ Yasowa ye ko, “Mɔgɛ donu yabɔ ma ye minnu si ta Amalɛkinu kɛlɛ tinɛ. Alla ya a fɔ sewuri min ma ko n ni a bi, sina n si ta wo la n bolo kɔnkɛ kun tɛma ka n sɔ nyɔ.”

¹⁰ Yasowa ya a ma iko Musa ya a fɔ a ye nya min. A tara Amalɛkinu kɛlɛ tinɛ. Musa wo, Aruna wo, anubɛ Huri yɛlɛta kɔnkɛ wo kun tɛma.

¹¹ Fananta Musa kɔɛn layɛlɛnɛ san ma, Isirɛla kɛlɛ-dannu bi nɔ-ko sɔrɔnna. A wa a kɔɛn layigi tumɛ min, Amalɛkinu bi anu denu fanan nɔla.

¹² Kɔnɔ Musa kɔɛn rakunta tumɛ min, anu ya kuri madon a la. A ya a mayigi wo kuma. A kɔɛn tora birani san ma Aruna anubɛ Huri bolo ha tele buira.

¹³ Wo le ya a ma, Yasowa ya Amalɛkinu nɔ.

¹⁴ Mari ya a fɔ Musa ye ko, “I ni kɛ sɛbɛ buku do rɔ alako a ni to mɔgɛnu burɔ. A fɔ Yasowa ye ko nde, Mari si Amalɛki mɔgɛnu ban fegba!”

¹⁵ Musa ya saraka-mintan-tinɛ sɔ ka a tɔgɔ sa “Nna kisi-koe falafalɛ le Mari la.”

¹⁶ A ko, “Bawo Amalɛkinu bara wuli Mari kan ma, a si to anu tɔrɔla tolon!”