Bɔ-Koe-Iyipiti 15 - ALLALA KUMƐ

Musata Bɛti

¹ Nba, Musa anubɛ Isirɛla mɔgɛnu ya bɛti kɛ bɔ Mari ye ko, “Ma si bɛti bɔ Mari ye kamasɔrɔn a ara nɔ-ko sɔrɔn a nyɛrɛta sɛnbɛ la. A ara kɛlɛ-dannu anubɛ anuna soeenu natuntun Kɔgɔ-Yi-Wulan wo rɔ.

² Ma kisilɛ le mata Mari la min si ma kunyɛ bɔ gbaran rɔ. Ma fanuta Alla le, ma si min gbiliya. Ma nyɛrɛta Alla le, ma si min tanto.

³ Mata kɛlɛ-kurugbɛ le ale la. A tɔgɛ le Mari.

⁴ “Mansɛ wola kɛlɛ-nyananu, Mari ara wonubɛ anuna kirindinu nafili yi wo rɔ.

⁵ Ale mansɛla mɔgɔ-ba wonu tora yi wo rɔ. Anu yigira yi kɔrɔ iko kuru-kundi. Yi ya anu yamatogon.

⁶ “E, Mari, i wara ko-makawani-belebele kɛ ma ye i kɔɛn-nyimɛ la. I kɔɛn-nyimɛ ara i yogenu bunden ma ye.

⁷ Minnu wulita ila mɔgɛnu kan ma, i wara wonu nabui ka anu dɛ ragborokan ita sɛnbɛ-makawanɛ la. I ya ila diminyɛ lana anu kuma ka anu mintan iko bin-gbalɛ.

⁸ I ya fɔnyɔ min nabɔ i karɛ rɔ, wo ya yi kɛ fara fila la ka anu nadɛn anu nyɔgɔn kuma tala iko dandan. Yi-ladɛnnɛ wo gbɛlɛyara gbon, iko dandan!

⁹ I yogenu ko anu si ma sagaran ka ma bira ka mata nɔnfuli rafara anu nyɔgɔn tɛma. Anu ko anu si anuna faannu sagan anu lɛɛ rɔ ka bui ma ma.

¹⁰ Kɔnɔ i karatɔ-fɔnyɔ ya Kɔgɔ-Yi-Wulan latugu anu kuma. Yi sara anu kuma. Anu yigira yi kɔrɔ iko nɛgɛ-kundi.

¹¹ “E, Mari, nfen sifa ye duninya rɔ mɔgɛnu si min bato iko ile Mari. Yon sɛninyanɛ iko ile? Ma si i tanto ila kɛwɔli-makilannɛnuna ko la. Yon si ke kabana-koenu kɛla iko ile?

¹² I ya i kɔɛn-nyimɛ rasagan dɔrɔnni, dugu-kole ya Iyipiti mɔgɛnu nakunu.

¹³ I ya male min kunka, i si ta ma yarɔ ita keninteya-banbɛlɛ la ka sɔ ma yarɔ ita sɛnbɛ la ha ma si ke nyamanɛ wo rɔ i ye i mayigila kan min.

¹⁴ Mɔgɛnu ba kɛ lamɔɛn tumɛ min, anu si yɛrɛyɛrɛn kilan bolo. Filisitinu kun ma si kɔ.

¹⁵ Idɔm kɛnu si kilan ha ka a dan-natenbi. Mohabu mɔgɔ-banu si yɛrɛyɛrɛn. Kenan kɛnu mankulan si bɔ anu ma kilan bolo.

¹⁶ Kilan si wara anu tɔ. Anu ta si faga kuluba! Anu bi ita sɛnbɛ yenna min kɛ, anu si to anu gbɛ rɔ iko kuru-kundi ha ma ni ban tenbila, i wara male minnu kunka yɔɔnyɛ rɔ kɛ la, kɔni.

¹⁷ Mari, i wara kan tinɛ min yabɔ ka a ma i nyɛrɛ mayigi tinɛ la, i nyɛrɛ si ita bato-bɔn sɔ ma ye nyɔ. I si ta ma sigi ita kɔnkɔ-sɛnimɛ wo kuma nyɔ.

¹⁸ Ile Mari si to ila mansayɛ la habadan habadan!”

Musa Kɔrɔ Miriyamta Bɛti

¹⁹ Isirɛla mɔgɛnu tagamanta kɛn-gbalanɛ kuma Kɔgɔ-Yi-Wulan tɛma nun. Kɔnɔ ale mansɛla kɛlɛ-dannu bi tenbila anuna kirindinu na anu bolo tumɛ min kɛn wo ma, Mari ya Kɔgɔ-Yi-Wulan keri anu kuma.

²⁰ Woletɔ Aruna kɔrɔ musi Miriyam, nɛbi-musi, kɔni, wo ya ata wasanbɛnu bi anubɛ Isirɛla musinu ka dɔn kɛ buta a ma.

²¹ Miriyam ya bɛti bɔ Isirɛla mɔgɛnu ye ko, “Ma ni bɛti bɔ Mari ye kamasɔrɔn a ara nɔ-ko sɔrɔn a nyɛrɛta sɛnbɛ la. A ara kɛlɛ-dannu anubɛ anuna soeenu nato kɔgɔ-yi rɔ.”

Yi-Kunamɛ Wara-Koe

²² Musa sɔra Isirɛla mɔgɛnu yarɔ ka bɔ Kɔgɔ-Yi-Wulen bolɔn wo dafɛ. Anu wulita ka tele sawa tagama kɛ ka ta ke wulɛ wo kan tinɛ do rɔ min tɔgɛ Sura kɔnɔ anu ma yi taran nyɔ.

²³ Tɔ-a-la, anu kera yi do ma min kunayanɛ kelele! (Woletɔ anu ya nyɔ kele ko Yi-Kuna.)

²⁴ Anu gbunyara Musa kɔrɔ ko, “Male si ma min mintɔ gbɛ?”

²⁵ Musa dira Mari dala, woletɔ Mari ya kɔn-kundi do yira a la. Musa ya kɔlɔma wo bi ka a lakɛ yi wo rɔ. Yi wo diyara kɔikɔi! Anu bi nyɔ wati min, Alla ya tɔn di anu ma, anu si minnu bira. Wo kɔma, a ya anu kɔrɔbɔ nyɔ.

²⁶ Mari ko, “Wo ni wo tole masɔ n kuman-kan la a kin na! Koe minnu telennɛ nde, Mari Alla yala, wo ni wonu ma ka nta tɔn bɛɛ bira. Ni wo ya wo ma, n ya kirayɛ minnu sigi Iyipiti kɛnu ma nun, n ti wo fenfen sigi wole ma bawo nde, Mari le wo rakɛndɛyalɛ la.”

²⁷ Anu kera Tamaro Kɔrɔ tenke tan-ni-filɛ anubɛ tin-kuru bi-wɔrɔnfilɛ ye kan min. Anu ya anu daga makɛ yi wonu dafɛ nyɔ.