Ɛsita 9 - ALLALA KUMƐ

Yahudiyanu Yogenu Nɔ-Koe

¹ San wo karɛ tan-ni-filɛ min tɔgɛ Adari, wo tele tan-ni-sawa nyɔgɛ kera. A bɛnta, Yahudiyanu na ni to tele kɛ le ma iko mansɛta tɔn ya a fɔ nya min. Wo tele nyɛrɛ rɔ nun, Yahudiyanu yogenu miri ko anu si anu nato tele wo le ma kɔnɔ tunbi sara a tɛrɛna anu bolo bawo Yahudiyanu ya anu nɔ.

² Yahudiyanu ya anu tabɛn Mansa Sakasila nyamani-soe wonu tɔ anu yogenu kan ma, minnu bi bagala anu ma, kɔni. Sibolo-gbɛrɛkɛ ma sisi anu na tun bawo anu bara kilan anu na.

³ Nyamanɛ wo mɔgɔ-ba-malɔnnɛnu wo, anubɛ mɔgɔ-ba-toenu wo, wonu damasi ya Yahudiyanu dɛnbɛ bawo anu kilannɛ Mɔdekɛyai la.

⁴ Ale Mɔdekɛyai, mɔgɔ-ba le ale la mansɛla bolɔn la, ado a sɛnbɛ ma ye tala kofula. A mankan ye tala nyamanɛ wo tonko nanɛ bɛɛ rɔ.

⁵ Yahudiyanu ya anu yoge bɛɛ nɔ ka anu kasara iko a di anu ye nya min.

⁶ Hali anuna so-karantan Susa, Yahudiyanu ya anu yoge mɔgɔ kɛmɛ loli faga nyɔ.

^7-10 Hamidetala den Heman, wola den-kei mɔgɔ tan wonu bi mɔgɔ kɛmɛ lolɛ kɛnu tɔ. Wonu tɔgɛ le kɛnu na, Parasandɛta, Dalafoni, Asipeta, Pɔrɛta, Adelaya, Arideta, Parimasata, Arisayi, Aridayi anubɛ Fayisata. Kɔnɔ Yahudiyanu ya min faga, anu ma anu bolo-fan fenfen bi.

¹¹ Anu ya mɔgɛ min nyɔgɔn faga Susa soe burɔ, anu ya wo fɔ mansɛ ye tele wo nyɛrɛ rɔ.

¹² Wo kɔma, mansɛ ya a fɔ Ɛsita ye ko, “Susa soe kɛ burɔ, Yahudiyanu bara mɔgɔ kɛmɛ loli faga. Hemanna dan mɔgɔ tan bi anu tɛma. Kama, kuma le nyamani-tonke doinu ma wo rɔ?” Mansɛ ya Ɛsita manyinika ko, “I ye nyinina nfen ma n bolo gbɛ? A fɔ n ye. I si a sɔrɔn.”

¹³ Ɛsita ko, “N tigi, ni i si sɔn, Yahudiyanu bara min nyɔgɔn ma bi Susa soe burɔ, anu ni wo nyɔgɔn ma sina fanan. A ma, anu ni Hemanna dan mɔgɔ tan wonu dun kan tinɛ wo la a ya min nadan.”

¹⁴ Mansɛ ya a fɔ ala mɔgɛnu ye ko anu ni a ma iko Ɛsita ya a fɔ nya min. Anu ya a mayon Susa soe burɔ. Wo kɔma, anu ya mɔgɔ tan wonu furi dun, mɔgɛ bɛɛ si anu tagbɛ kan min.

¹⁵ Karɛ wo tele tan-ni-nanɛ ma Yahudiyanu ya anu kundɛn ka mɔgɔ kɛmɛ sawa faga Susa soe burɔ wulɔn-tele rɔ. Kɔnɔ Yahudiyanu ya a ma iko anu ya a fɔlɔtɛ ma nya min. Anu ma anu bolo-fan fenfen bi.

^16-17 Yahudiya minnu basannɛ anuna nyamanɛ wo la, wonu tora anu yogenu fagala alako anu ni anu nyɛrɛ niyi kumafunfan. Karɛ wo tele tan-ni-sawɛ ma, anu ya anu yoge mɔgɔ waga bi-wɔrɔnfila ani mɔgɔ waga loli (75,000) faga kɔnɔ anu ma anu bolo-fan fenfen bi. A tele tan-ni-nani nyɔgɛ ma, anu ya anu sulen ka wo ma anu nyɛrɛta ladiya-tele la.

¹⁸ Kɔnɔ Yahudiya minnu bi Susa soe burɔ, wonu ya anu sulen a tele tan-ni-loli nyɔgɛ ma ka wo ma anu nyɛrɛta ladiya-tele la bawo anu ya anu yogenu faga a tele tan-ni-sawa nyɔgɛ anubɛ a tele tan-ni-nani nyɔgɛ le ma.

¹⁹ Kɔnɔ Yahudiya minnu siginɛ nyamanɛ wo so-mɛsɛnɛnu tɔ, wonu bi ladiyɛ kɛla a tele tan-ni-nani nyɔgɛ le ma. Wulɔn-tele tora mala anuna tolon-tele la ka to anu nyɔgɔn kɔla.

Koron-Nakɛ-Tele-Ladiyɛ Wara-Koe

²⁰ Mɔdekɛyai ya a ma, anu ya koe kɛ damasi sɛbɛ. Wo kɔma, a ya kɛdi-gbɛrɛkɛ sɛbɛ ka wo ranyɛnsɛn Yahudiya wonu na minnu bɛɛ basannɛ Mansa Sakasila nyamanɛ wo la.

²¹ Min sanɛ kɛdi wo rɔ, a ko, san wo karɛ tan-ni-fila nyɔgɛ min tɔgɛ Adari wo tele tan-ni-nanɛ anubɛ a tele tan-ni-lolɛ ma, Yahudiya bɛɛ ni wo ma anuna ladiya-tele la san-bo-san

²² bawo anu ya lafɛrɛ sɔrɔn anu yogenu bolo tele filɛ wo le ma. Anuna kɔndɔfili anubɛ anuna yakɔrɔ-mamɔɛ mara anu bolo kun-nadiyɛ la karɛ wo le la. A sɛbɛnɛ a rɔ fanan ko anu ni ladiyɛ anubɛ tolɔn kɛ wulɔn ka to anu nyɔgɔn kɔla katarala bolo-kolɔnnu ma.

²³ Yahudiyanu ya a ma iko Mɔdekɛyai ya a fɔ nya min. San-bo-san, anu si ladiyɛ wo kɛ.

²⁴ Yahudiyanu gboyanɛ Heman min ye nun, wo le ya korɔn lakɛ wo san la alako a ni a lɔn anu si Yahudiyanu nato tele min ma.

²⁵ Wo kɔma, Ɛsita tara mansɛ taran. A ya sereya do sɛbɛ. Heman ya gbɛrɛ min nasigi Yahudiyanu ye, anubɛ ala dannu birara wo le la ka anu dun mɔgɔ dun tinɛ wo la, a nyɛrɛ ya min nadan ala bɔn dafɛ.

²⁶ Woletɔ anu ya Sulen-Tele wonu kele ko koron-nakɛ-telenu. Ka a tɛgɛ Mɔdekɛyaila kɛdi wonu ma anubɛ min bɛɛsi mara Yahudiyanu na,

²⁷ wo le ya a ma, Yahudiyanu ya tele filɛ wonu ma anuta Sulen-Telenu na san-bo-san. Anu denu si wo bira, anu kegeyɛnu si wo bira, min fanan ba yɛlɛma Yahudiya la, wonu si Mɔdekɛyaita tɔn wo bira ka a ma anuna namunyɛ la.

²⁸ Anu dama sɔnta ko Yahudiya bɔnsɔn-mɔgɛ bɛɛ ni namunyɛ kɛ bira hali minnu ma sɔrɔn bɛ. Anu ni tɔn kɛnu bira anu siginɛ kan-bo-kan. Anu ni to anu sulenna tele filɛ wonu ma ha duninya si ban alako anu kana nyina.

²⁹ Abihelila dunmusu, mansɛla musi Ɛsita kɛ, wonu denubɛ Mɔdekɛyai ya kɛdi-gbɛrɛkɛ sɛbɛ. Ale fanan ya ala musu-mansaya-fanka sa-a-rɔ ka a tɛgɛ anuta koron-nakɛ-tele wo ma, Mɔdekɛyai ya minna ko sɛbɛ nun.

³⁰ A ya kɛdi wonu nata Yahudiyanu ma nyamani-kun kɛmɛ ani nyamani-kun mogan-ni-wɔrɔnfilɛ bɛɛ (127) rɔ. Min sanɛ kɛdi wonu tɔ ko alamɛ wonu ya latankɛ anubɛ yisi-kimɛ sɔrɔn.

³¹ Ale nyɛrɛ ya a fɔ kɛdi wo rɔ ko anu denubɛ anu kegeyɛnu si tele-fila-tɔn kɛ ma anuna namunyɛ la iko anu si sun-don-telenu anubɛ diyi-kɛ-telenu bira nya min. Ɛsita anubɛ Mɔdekɛyai kan bɛnta ko kelen ma.

³² Ɛsitala kɛdi kɛ ya Sulen-Tele kɛnu ko banban ka anu sɛnbɛ don. Anu ya kɛdi wo bi ka a kofu nyamanita kɛdi wonu ma.