Ɛsita 8 - ALLALA KUMƐ

Yahudiyanu Dɛnbɛn-Koe Mansɛ Bolo

¹ Wo tele nyɛrɛ rɔ, Mansa Sakasi ya Yahudiyanu yogo Heman bolo-fan mumɛ latenbi ala musi Ɛsita ma. Wo kɔma, Ɛsita ya a fɔ ala kei, Mansa Sakasi ye ko a kebila-nyɔgɛ le Mɔdekɛyai la. Wo wulɔn-tele ma, Mɔdekɛyai nara a nyɛrɛ dantɛgɛ mansɛ ma.

² Mansɛ ya ala dɛɛn-kɔlɔnɛ min don Heman bolo nun, a ya wo bi ka a latenbi Mɔdekɛyai ma. Mansɛ nyɛrɛta mandan sanɛ dɛɛn-kɔlɔnɛ wo ma. Wo kɔma, Ɛsita ya a kɔrɔ Mɔdekɛyai sigi Heman bolo-fen-tonɛ bɛɛsi kun na.

³ Ɛsita ya a nyɛrɛ gbesi dugi la mansɛ kin kɔrɔ ka di a dala. A ye a madiyala ko mansɛ ni yili kiri Hemanna ko-rabɛnnɛ kɛ la Yahudiyanu kan ma, ado Heman kɛ, Yahudiyanu yoge Ekaki bɔnsɔn-mɔgɛ do le kɔrɔma la.

⁴ Mansɛ ya ala sɛnɛ-kɔlɔma telen ale Ɛsita la. Ɛsita ya a lasɔ. A ya a fɔ mansɛ ye ko,

⁵ “N tigi, ni n bara-koe ara i hɛnɛ, ado n di i ye, i ni n dɛnbɛ ko kelen na. Ekaki bɔnsɔn, Hamidetala den Heman ara sereya sa nun ko ka Yahudiyanu nato ila nyamanɛ kɛ rɔ. Ni i sɔnta, i ni sereya-gbɛrɛkɛ sa min si a ma, Hemanna ko-rabɛnni-kɔrɔmɛ ni tinya.

⁶ Ni anu si na nna mɔgɛ bɛɛ lato le, ha n kebilɛ bɛɛ kunyɛ ni to-a-rɔ, n si ke n muinna kasara-su kɛ kɔrɔ kama?”

⁷ Mansa Sakasi ya a fɔ ala musi Ɛsita anubɛ Mɔdekɛyai ye ko, “Heman min ya Yahudiyanu nato-koe rabɛn, n bara wo dun ka a bolo-fannu natenbi Ɛsita ma.

⁸ Kɔnɔ sereya min sɛbɛnɛ mansɛ tɔgɔ rɔ, ado ala dɛɛn-kɔlɔnɛ-mandan sanɛ wo ma, wo yɛlɛma-nya-wo-nya sa. Wo si min ma gbɛ, wo ni kɛdi-gbɛrɛkɛ sɛbɛ Yahudiyanuna ko la. Ni min di wo ye, wo ni wo sɛbɛ a rɔ. Wo kɔma, wo ni n tɔgɛ sɛbɛ a rɔ ka nta dɛɛn-kɔlɔnɛ-mandan sa a ma.”

⁹ San wo karɛ sawɛ min tɔgɛ Sifan, wo tele mogan-ni-sawa nyɔgɛ ma, anu ya kɛdi wo sɛbɛ. Mɔdekɛyai ya mansɛla kɛdi-sɛbɛlɛnu kele. A ya a fɔ anu ye ko anu ni a kan sɛbɛ. Anu ni a sɛbɛ Yahudiyanu ma anubɛ mɔgɔ-ba-malɔnnɛnu anubɛ mɔgɔ-ba-toenu ma minnu bi nyamani-kun kɛmɛ, nyamani-kun mogan-ni-wɔrɔnfilɛ wo bɛɛ rɔ ka a dabira Yindiya nyamanɛ ma ha ka a sigi Sudan nyamanɛ la. Anu ya a ma, kɛdi wonu sɛbɛra bɛɛta kan rɔ iko anu si anuna kannu sɛbɛ nya min. Anu ya a sɛbɛ Yahudiyanu fanan ma anuna kan rɔ iko anuna kan si sɛbɛ nya min.

¹⁰ Mɔdekɛyai ya a ma, anu ya a sɛbɛ Mansa Sakasi tɔgɔ rɔ ka ala mansaya-dɛɛn-kɔlɔnɛ-mandan sa kɛdi wonu ma. So-laburilɛnu ya mansɛla so-buri-kɛla-wɛnu bi ka ta kɛdi wonu to anu to tinɛnu tɔ.

¹¹ Min sɛbɛnɛ kɛdi wonu tɔ, ko mansɛ ara sɔn ko Yahudiya bɛɛ ni anu tabɛn ka anu nyɛrɛ kumafunfan. Ni sibolo-gbɛrɛkɛ wulita Yahudiyanu kan ma nyamanɛ kɛ kan-bo-kan, a mara Yahudiya-musuma la wo, a mara a keima la wo, a mara a denni na wo, anu ni sibole wonu kɛlɛ ha ka anu ban fegba! Anu ba ban anu nɔla, anu ni wonu bolo-fan damasi bi.

¹² Wo damasi ye mala san wo karɛ tan-ni-filɛ min tɔgɛ Adari, wo tele tan-ni-sawɛ, kɔni.

¹³ Anu si na sereya wo mayon mɔgɛ bɛɛ ye nyamanɛ tonke wo bɛɛ rɔ. Anu si na wo ma alako a tumɛ wa ke, Yahudiya bɛɛ ni anu tabɛn kɛlɛ-kɛ-koe la.

¹⁴ A fɔɛ mansɛ bolo, “Wo ta gbɛ,” so-laburilɛnu yɛlɛta mansɛla so-buri-kɛla-wɛ wonu na tiriyante wo rɔ ka ta kɛdi wonu to tinɛnu tɔ. Anu ya kɛdi wo do fanan karan Susa so-karantan burɔ.

¹⁵ Mɔdekɛyai bɔmatoe mansɛla bɔn la ala mansaya-duruki min bi a kan na, a gbɛmɛ anubɛ a bilolamɛ le. Kura-hakika-finyɛ min tɔgɛ linɛn wo fanan bilanɛ a kan na. Susa so-karantan-mɔgɛ bɛɛsi ya a labɛn sewa-belebele-wɛ la.

¹⁶ Kɛ mara sewa-tele la Yahudiyanu ye bawo anu bara hɛnkili-latɛgɛ sɔrɔn anubɛ lafɛrɛlɛ.

¹⁷ Anu ya mansɛla kɛdi kɛ karan kan tinɛ min bɛɛ rɔ, Yahudiyanu ya tolon-belebele-wɛ ladan ka ladiyɛ kɛ nyɔnu tɔ. Mɔgɔ-siyaman ya anu sibole yɛlɛma ka ma Yahudiya la bawo bɛɛ ara fɔlɔ kilanna Yahudiyanu na.