Ɛsita 7 - ALLALA KUMƐ

¹ Mansɛ Sakasi anubɛ Heman tara anu de-nyini tinɛ tun mansɛla musi Ɛsita warɛ.

² Anu ban fen-dɔn la, anu bi fen-minyɛ kun na gbɛ, mansɛ ya Ɛsita manyinika ko, “Ni i ye nyinina min ma, wo fɔ n ye. I ye nyinina fenfen ma, n si wo di i ma. Hali a mara nna nyamani-talɛ la, n si a di i ma.”

³ Mansɛla musi Ɛsita ya a fɔ a ye ko, “N tigi, ni n bara-koe ara i hɛnɛ, ado n di i ye, a sɔgɛ ye n na, sayɛ min bara gbɛrɛn mabɛ nna mɔgɛnu ma kɛ la, i ni ma tanka wo ma

⁴ bawo anu bara ban mabɛ nna mɔgɛnu kunyɛ donna bolo tɔ ka ma sugi lato. Ni a tonɛ yɔɔnyɛ gbansan le ma dɔrɔn, n ti wo fɔ i ye nun kɔnɔ anu bi nala ma ban tinɛ le kɛ la fegba!”

⁵ Mansa Sakasi ya Ɛsita manyinika ko, “Yon bara sisi ko sufa kɛ la? Wo tigi ye mintɔ?”

⁶ Mansɛla musi Ɛsita ko, “Ma yoge min tɔgɛ Heman, wo le ya kɛ bɛɛ rabɛn ma kan ma.” Kumɛ wo ya Heman kumakɔ. A ya a yɛ gbala mansɛ anubɛ ala musi la.

⁷ Mansɛ yisi bɔra. A ya a lasɔ ka bɔ ala mansaya-bolɔn lu-kɔndɛ rɔ. Heman ban a lɔnna ko mansɛ ara a kɔnkɔn a ma a tɔrɔ-koe la, a tora kɔma alako a si Ɛsita madiya nya min. Wo ni a kunyɛ bɔ saya-masibɛ kɛ kɔrɔ.

⁸ Ɛsita sanɛ sigi-fen-yan kuma kan min anuna fen dɔn tinɛ, ale Heman tara a sa a kian kuma nyɔ a madiya tinɛ. Mansɛ don bɔn la, a ya Heman sanɛ taran ala musi Ɛsita kian kuma. Mansɛ ya a fɔ a kulu-mayɛlɛnɛ la ko, “Wo ni wo yɛ lana, a sɔgɛ ye kei kɛ la ka a sa nna musi fɛ n nyɛrɛta bɔn la n yala?” Mansɛ ban wo fɔla, a makandannɛnu ya ale Heman yɛ lakiri ka a yira ko aletɛ ara ban.

⁹ A makandanna kelen ye nyɔ min tɔgɛ Habɔna, wo ko, “Min sanɛ wo kuma, ale Heman kɛ ara mɔgɔ dun tinɛ ladan ala bɔn dafɛ nun Mɔdekɛyai tɔgɔ rɔ, Mɔdekɛyai min ya i niyi latanka, kɔni. A ya mɔgɔ dun tinɛ min nadan, ala yanyɛ nunkan-nya bi-sawa ani nunkan-nya wɔrɔ.” Mansɛ ko, “Wo ta ale Heman dun wo la.”

¹⁰ Nba, anu ya Heman dun ala mɔgɔ dun tinɛ wo la, a ya min nadan Mɔdekɛyai tɔgɔ rɔ nun. Wo ban, Mansɛ yisi nara to kimɛla.