Ɛsita 5 - ALLALA KUMƐ

Mansɛ anubɛ Heman Kele-Koe Ladiyɛ rɔ Ɛsita Bolo

¹ Anuna sun-don-tele sawɛ da-fara lunyɛ min, Ɛsita ya a layɛlɛ ala musu-mansaya-mirannu tɔ. A tara a sɔ kata burɔ bolon-don-dɛ la mansɛ si a ragbɛ kan min. Wo ya a taran, ala kei Mansa Sakasi siginɛ ala mansaya-waganɛ rɔ bolɔn burɔ. A yɛ lamununnɛ bolon-don-dɛ wo la.

² Mansɛla musi Ɛsita yen Mansa Sakasi bolo, a wara-koe diyara a ye. A ya ala sɛnɛ-kɔlɔma telen a la alako ka a yira ko a ma ko tinya. Ɛsita fanan tara a bole tugu sɛnɛ-kɔlɔma wo sungban la.

³ Mansɛ ya a manyinika ko, “Ɛsita, nfen mara? Ni i ye nyinina min ma n bolo, wo fɔ n ye. Hali nna nyamani-talɛ, n si a di i ma.”

⁴ Ɛsita ya a fɔ a ye ko, “N tigi, ni i si sɔn, wobɛ Heman ni ta fen dɔn tinɛ n barɛ, n bara min tabɛn wo ye.”

⁵ Mansa Sakasi ya Heman kele tiriya! Anu tara fen dɔn tinɛ Ɛsita warɛ.

⁶ Anu ban fen dɔn la, anu bi fen minyɛ kun na gbɛ, mansɛ ya Ɛsita manyinika tun. A ko, “Ni i ye nyinina min ma n bolo, wo fɔ n ye. I ye nyinina fenfen ma, n si wo di i ma. Hali nna nyamani-talɛ, n si a di i ma.”

⁷ Nba, Ɛsita ya a fɔ a ye ko,

⁸ “N tigi, ni n bara-koe ya i hɛnɛ, ado n di i ye, n bi dɔn-fan min tabɛnna, wobɛ Heman ni na wo dɔn yan tɔ sina. N bi nyinina min ma, n ni na to wo fɔla i ye.”

Yanfɛ Don-Koe Heman Bolo Mɔdekɛyai Faga-Koe Rɔ

⁹ Heman bɔmatoe Ɛsita warɛ fen dɔn tinɛ, a nyagalennɛ a yisi rɔ bɛrɛkɛ! Kɔnɔ a ya Mɔdekɛyai taran bolon-don-dɛ la min kɛ, wo ma a lasɔ ka a gbiliya, wo ya a ma, Heman yisi bɔra dɔgɔma-ma-de!

¹⁰ Kɔnɔ a ya a bira a rɔ. A tara bɔn la. A ya a diyana-mɔgɛnu kele a warɛ bɔn la. A ya ala musi Sirɛsi fanan kele.

¹¹ A ya a nyɛrɛ matɔgɔ wonu ya la. Nɔnfuli min nyɔgɔn yirika ye a bolo wo, den-kei min nyɔgɔn ye a bolo wo, mansɛ ara ala sɔ tinɛ mayɛlɛ nya min wo, a tenbira mansɛla mɔgɔ-ba doinu na nya min wo, a ya a yonkan kɛ damasi la.

¹² Ale Heman ya a fɔ tun ko, “Min tenbira kɛ dama la, mansɛla musi Ɛsita ya dɔn-fen-belebele rabɛn mabɛ ala kei dɔrɔn ye, ado sina fanan, ma ye tala fen dɔn tinɛ nyɔ le tun.

¹³ Kɔnɔ fananta n yɛ ye Mɔdekɛyai Yahudiya wo la mansɛla bolon-don-dɛ la, wo fenfen ti n yisi sa.”

¹⁴ Ala musi anubɛ a diyana-mɔgɛnu ya a fɔ ko, “Nfenna i ti mɔgɔ dun tinɛ ladan, Mɔdekɛyai kɛ si dun kan min? Wola yanyɛ ni ma nunkan-nya bi-sawa ani nunkan-nya wɔrɔ la. Sina sɔgɔma, i ni ta a fɔ mansɛ ye alako a ni Mɔdekɛyai dun wo la. Wo wa ka a la, i sewanɛ si ta mansɛ fɛ musi wo warɛ fen dɔn tinɛ.” Heman mirinɛ ko anu bara kuma-telennɛ le fɔ a ye wo la. A ya mɔgɔ dun tinɛ wo ladan.