Ɛsita 4 - ALLALA KUMƐ

Ɛsita Manyinika-Koe Yahudiyanu Dɛnbɛn-Koe La

¹ Kuma sufa wo lamɔɛn Mɔdekɛyai bolo, a ya ala duruki rafara yisi-tinya bolo. A ya kasa-kurɛ kɛ a ma. A ya ta-gbangban kɛ a kunyɛ rɔ. A ya soe bira diyi-kɛ anubɛ woronde la a bolo.

² A nara worondola ha mansɛla tenbi-bolɔn la. A ma don bolɔn burɔ bawo ni kasa-kurɛ ye mɔgɛ min ma, wo ti don nyɔ.

³ Mansɛla kɛdi wo ara ke nyamanɛ wo tonke min bɛɛ rɔ, Yahudiyanu worondora kan tinɛ wo bɛɛ rɔ. Anu dira ka sunyɛ don. Anu siyaman ya kasa-kurɛ kɛ anu ma ka anu sa ta-gbangban rɔ.

⁴ Kei anubɛ musi minnu bi wɔlila Ɛsita ye, wonu tara a fɔ ale Ɛsita ye ko kasa-kurɛ donnɛ Mɔdekɛyai kan na. Wo ya a yisi tinya. A ya kurɛ donu nata Mɔdekɛyai ye alako a ni kasa-kurɛ wo bɔ a kan na kɔnɔ Mɔdekɛyai ma sɔn kurɛ wonu na.

⁵ Mansɛ ya wɔli-kɛlɛ min don a bolo, Ɛsita ya wo do kele. Wo tɔgɛ le Hetaki. A ya a fɔ wo ye ko a ni ta Mɔdekɛyai manyinika ni min bara ma.

⁶ Hetaki wo tara Mɔdekɛyai taran barɛ tɛma bolon-don-dɛ telen tɔ.

⁷ Min bara ma, Mɔdekɛyai ya wo bɛɛ rakaran a ye. Heman ya mansɛ yili-madiya wodi min nyɔgɔn yirika la, ni anu ya Yahudiyanu faga, a ya wo fanan takaran a ye.

⁸ Yahudiyanu faga-koe min sɛbɛnɛ Susa soe burɔ, Mɔdekɛyai ya wo do don a bolo ko a ni ta a to Ɛsita ma. A ya a fɔ wo ye ko a ni ta a fɔ Ɛsita ye ko Ɛsita ni ta ala kei Mansa Sakasi madiya alako a ni kinikini ale Ɛsitata mɔgɛnu ma.

⁹ Hetaki tara a dantɛgɛ Ɛsita ye.

¹⁰ Ɛsita fanan ya a sara Hetaki la Mɔdekɛyai wara tun. A ko,

¹¹ “Kei wo, musu wo, ni min tara a labɔ mansɛ ma, a ma min kele, anu si wo tigi faga. Ka a bi mansa-makawandilɛnu ma ha ka yigi, bɛɛ ya sereya wo lɔn. Kɔnɔ ko kelen de ye sereya kɛ ma, ni mansɛ ya ala sɛnɛ-kɔlɔma telen min na, mɔgɛ wo ara kanan. Kɔnɔ a ara karɛ kelen bɔ, mansɛ ma n kele.”

¹² Ɛsitala kilayɛ wo lamɔɛn Mɔdekɛyai bolo,

¹³ Mɔdekɛyai fanan ya a sara ka a fɔ a ye ko, “I kana i hɛnkili latɛgɛ bawo i ye mansɛla bolɔn la, ni Yahudiya le i la, fɔ anu ba ile fanan faga.

¹⁴ Kɔnɔ ni a siginɛ tora a la i bolo kaka, dɛnbɛnɛ si bɔ Alla bolo kan tinɛ do rɔ ka Yahudiyanu kunyɛ bɔ a rɔ kɔnɔ wolebɛ i kebila-kunyɛ si to-a-rɔ dogbe! Tumado, i mara mansɛla musi la kɛ lela ko la. Mɔgɔ ma a lɔn.”

¹⁵ Kumɛ kɛ lamɔɛn Ɛsita bolo, Ɛsita fanan ya a sara Mɔdekɛyai wara tun, a ko,

¹⁶ “Yahudiya min bɛɛ ye Susa soe kɛ burɔ, i ni wonu kundɛn kan-tina-kelen. Wo ni sunyɛ don ka Alla matara n ye tele sawa su sawa kɔrɔ. Malebɛ nna bonna-wɔli-kɛla-musinu si sunyɛ don ka matarali kɛ fanan. Wo kɔma, n si ta mansɛ taran hali n ya tɔn tinya. Ni n kunyɛ tora-a-rɔ, ale le wo la.”

¹⁷ Mɔdekɛyai tara a ma iko Ɛsita ya a fɔ a ye nya min.