Ɛsita 3 - ALLALA KUMƐ

Yahudiyanu Nato-Koe Rabɛn-Koe Heman Bolo

¹ Wati tenbinɛ, Mansa Sakasi ya mɔgɛ do ma ala kandɛ la. Wo tɔgɛ le Heman. Heman kɛ fa tɔgɛ le Hamideta. Ekaki bɔnsɔn-mɔgɛ do le anu denu na.

² Mansɛ ya a fɔ ala mɔgɔ-banu ye ko min ba Heman kɛ yen kan-bo-kan, wo ni a nyɛnkin a kɔrɔ ka a gbiliya. Bɛɛ ya a nyɛnkin a kɔrɔ, fɔ Mɔdekɛyai min ma sɔn wo ma-koe ma mumɛ!

³ Mɔgɔ-ba doinu ya ale Mɔdekɛyai manyinika ko, “Nfenna i sa sɔnna mansɛla sereya-sanɛ birala?”

⁴ Tele-wo-tele, anu si a makawandi Heman gbiliya-koe ma kɔnɔ a ti sɔn. Ale Mɔdekɛyai ara a fɔ anu ye nun ko, “Bawo Yahudiya le nde la, woletɔ n ti n nyɛnkin a kɔrɔ.” Anu tara wo rakaran Heman ye ka a lɔn ni a si ke a muinna Mɔdekɛyai sɔn kɛ ma.

⁵ Heman ban wo lɔnna ko Mɔdekɛyai ti a nyɛnkin a kɔrɔ mumɛ, a yisi bɔra dɔgɔma-ma-de!

⁶ Wo rɔ, a ban a lɔnna ko Yahudiya le, a ya a latɛgɛ a yisi rɔ ko, “N sa Mɔdekɛyai kelen nanyinina tun.” A ya a kɔnkɔn Yahudiya dama lato-koe ma Pasiya nyamani-tonke bɛɛ rɔ.

⁷ Ale Mansa Sakasi kɛla mansayɛ san tan-ni-fila nyɔgɛ, a karɛ fɔlɛ ma min tɔgɛ Nisan, Heman ya korɔn lakɛ wati wo le ma. A ya wo ma alako a ni Yahudiya kɛnu nato-tele anubɛ a karɛ lɔn. San wo, a karɛ tan-ni-fila nyɔgɛ ma min tɔgɛ Adari, korɔn diyara wo tele tan-ni-sawa nyɔgɛ le ma.

⁸ Wo kɔma, Heman ya a fɔ Mansa Sakasi ye ko, “Sibole donu basannɛ ila nyamanɛ kɛ la. Wonuta namunyɛ anubɛ mɔgɔ-wo-mɔgɔta ma kɛn. Min sanɛ wo kuma, ile nyɛrɛta tɔn siginɛnu, anu sa sɔnna wonu bira-koe ma. A ma bɛn, mɔgɔ-sufa wonu ni to anu niyi la ila nyamanɛ kɛ rɔ.

⁹ Kɔnɔ Mansɛ, ni i si sɔn, mɔgɔ kɛnu faga-koe latɛgɛ. Ni i ya wo ma, n bara i yili latɛgɛ wo rɔ feu! N si a ma, wodi-gbɛ minna gbiliyɛ anubɛ yi durɔmu waga kelen kɛmɛ fila rakɛn, i si wo sɔrɔn ka a sa nyamanɛ nɔnfulu lamara tinɛ rɔ.”

¹⁰ Mansɛ fanan ya ala mansaya-dɛɛn-kɔlɔnɛ bɔ a bole la ka a don Yahudiyanu yogo Heman bolo. Dɛɛn-kɔlɔnɛ wo le si a yira ko mansɛ kan le wo la.

¹¹ Mansɛ ban wo mala, a ya a fɔ a ye ko, “Mɔgɔ wonubɛ anu halalɛnu, itɛ le anu na. Min di i ye, i ni wo ma anu na.”

¹² San wo karɛ fɔlɛ, a tele tan-ni-sawa nyɔgɛ ma, Heman ya mansɛla kɛdi-sɛbɛlɛnu kundɛn. A ya sereya do latenbi anu ma alako anu ni a sɛbɛ bɛɛta kan rɔ iko bɛɛta kan si sɛbɛ nya min. Anu ba ban a sɛbɛla, anu ni a don kun-tiginu anubɛ mɔgɔ-ba-malɔnnɛnu bolo nyamanɛ wo tonke bɛɛ rɔ. Anu ya wonu sɛbɛ mansɛ tɔgɔ rɔ. Anu ya mansɛla dɛɛn-kɔlɔnɛ wo bi ka wo mandan sa kɛdi wonu ma.

¹³ Ala kilayɛnu ya kɛdi wonu bi ka ta anu to mɔgɔ-banu ma nyamanɛ wo tonke bɛɛ rɔ. Min sanɛ kɛdi wo rɔ ko, “San kɛ, a karɛ tan-ni-fila nyɔgɛ min tɔgɛ Adari, wo tele tan-ni-sawɛ ma, Yahudiya bɛɛ si faga wulɔn-tele ma. A denni wo, a kina wo, a musu wo, a kei wo, a bɛɛ si faga. Wo kana kinikini anu ma. Wo ni anu dama faga tɛrr, wulɔn-tele rɔ ka anu bolo-fannu bi.”

¹⁴ Anu ya kɛdi wonu karan mɔgɛ bɛɛ ye alako mɔgɛ bɛɛ ni a rabɛn wulɔn-telela ko la.

¹⁵ Kɛ fɔɛ mansɛ fanan bolo, kilayɛnu fanan ya sarakanɛ wo nyɛnsɛn Susa so-karantan burɔ. Anu ya mɔgɛ bɛɛ lalɔn Yahudiyanu nato-koe ma. Kumɛ kɛ ya Susa soe yabasan tumɛ min, wo ya a taran, Mansa Sakasi anubɛ ala kandɛ Heman siginɛ, anu bi fen-minyɛ kun na.