Ɛsita 2 - ALLALA KUMƐ

Ɛsita Ma-Koe Mansɛla Musi La

¹ Mansa Sakasi yisi-kimani-kɔmɛ kɛ, a yili ma bɔ ala tɔn-siginɛ ko ka a tɛgɛ Fasati sɔn kɛ ma.

² A makawandilɛ donu min gbɛrɛnnɛ a ma, wonu ya a fɔ a ye ko, “A fɔ ila nyamanita-mɔgɔ-banu ye ko anu ni anu yɛ lakalan ka na sunkurun-bulan-hakikɛ bɛɛ la i wara yan tɔ.

³ I ni mɔgɔ-ba donu yabɔ ila nyamanɛ kan tinɛ bɛɛ rɔ alako wonu ni anu yɛ lakalan ka na sunkurɔn wonu dantɛgɛ ila musu-makandanna Hɛgayi ma Susa soe kɛ burɔ. Hɛgayi min bi ila musinu makandanna, wo ni to sunkurɔn kɛnu fɛ-birala alako anuna kinyɛ si bɔ gbɛ rɔ nya min.

⁴ Wo kɔma, i ni sunkurɔn kɛnu yabɔ. Min ba ile mansɛ yisi bira, i ni wo ma ila bara-musi la Fasati gbɛ rɔ.” Mansɛ miri ko makawandili-nyimɛ le kɛ la. A ya a ma wo nya.

⁵ Kei do ye Susa soe burɔ, Yahudiya le wo la. A tɔgɛ le Mɔdekɛyai. A fa tɔgɛ le Yeya. Wo fanan fa tɔgɛ le Simayi. Simayi fa fanan tɔgɛ le Kisi. Wonu bɔra Bɛnyamɛ bɔnsɔn-mɔgɛnu tɔ.

⁶ Babilɔn mansa Nɛbukanasa ya Yuda mansa Yɛhoyasin anubɛ ala nyamanita-mɔgɛnu bira wati min ka ta anu na Babilɔn nyamanɛ rɔ, Mɔdekɛyai ye anu tɛma nun.

⁷ A kebila-nyɔgɛ do ye nyɔ, wo tɔgɛ le Ɛsita. A sereka-tɔgɛ le Hiburu-kan rɔ ko Hadasa. A kin, ado a mafɛlɛn di kati! Sunkurɔn kɛ sɔrɔnbagɛnu faganɛ, Mɔdekɛyai ya a makolo iko a halala dan.

⁸ Mɔgɔ-banu nara sunkurɔn wonu na Susa soe burɔ iko mansɛ ya a fɔ anu ye nya min, Ɛsita fanan bi sunkurɔn wonu tɛma. Anu ya ale Ɛsita bi ka a dantɛgɛ mansɛla musu-makandanna Hegayi ma. Wo tara a basan mansɛla musi doinu na mansɛla bɔn la.

⁹ Ale Ɛsita wara-koe ya Hɛgayi hɛnɛ. Tiriyante wo rɔ, a donta Ɛsita mamunyɛ rɔ ka dɔn-fen-hakikɛ di a ma alako ala kinyɛ ni bɔ gbɛ rɔ. A ya sunkurun mɔgɔ wɔrɔnfila yabɔ ka wonu ma ala bonna-wɔli-kɛlɛnu na. A ya kan-tina-hakikɛ di anubɛ ala bonna-wɔli-kɛlɛnu ma min tenbira sunkurɔn doinutɛ la.

¹⁰ Ɛsita ma a fɔ mɔgɔ-wo-mɔgɔ ye ko Yahudiya le ale la iko a kɔrɔ Mɔdekɛyai ya a makawandi nya min.

¹¹ Tele-wo-tele, mansɛla musinu bi kan min, Mɔdekɛyai si na nyɔ matagama alako a ni a lɔn a dɔgɛ wo wara-koe ye nya min.

¹² Yanni anu ni ta sunkurun-wo-sunkurun la mansɛ yakɔrɔ, anu si to sunkurɔn wo mabɛnna san kelen kɔrɔ iko anuna namunyɛ ye nya min. San wo kɔrɔ, karɛ wɔrɔ, anu bi a mamunna mira-tuli la. A nyɔgɔn karɛ wɔrɔ fanan, anu bi a mamunna bɔlɔsam tuli la. Minta wati wa ban, anu ni ta wo to mansɛ ma.

¹³ Anu tenbi tala sunkurɔn wo to tinɛ mansɛ ma, makiri-fan minnu di ale musi wo ye, a si wonu bi.

¹⁴ Sunkurɔn wo si ta mansɛ warɛ wurɛ la. Sɔgɔma gbɛ, a ni ta bon-gbɛrɛkɛ la musu doinu kurun tɔ. Kei min bi musi wonu makandanna, wo tɔgɛ le Sayasikasi. Tɛgan le ale bɛrɛn na. Musu-wo-musu bɔra mansɛ warɛ, wo ti sɛgi nyɔ tun fɔ min ba diya mansɛ ye, a ye wo le kelela a tɔgɛ la.

¹⁵ Ɛsitata wati kenɛ ka ta mansɛ warɛ, Hegayi min bi a kun na, wo ya kurɛ minnu yira a la, a ya wonu denu don a ma. A ban a mabɛnna, min bɛɛ ya a yen, wonu yɛ bɔra a la. Ɛsita kɛ, a sɔrɔn-fa tɔgɛ le Abiheli. A kɔrɔ Mɔdekɛyai, wo le ya a makolo, ado wo ya a bira iko a halala-dan.

¹⁶ Sakasila mansayɛ san wɔrɔnfila nyɔgɛ, karɛ tan ma, anu tara Ɛsita to Mansa Sakasi ma karɛ wo le la. Karɛ wo tɔgɛ le Tibɛti.

¹⁷ Ɛsita kɛ wara-koe diyara ale mansɛ ye ka tenbi sunkurɔn wo bɛɛ la. Woletɔ a ya ale ma bara-musi la Fasati gbɛ rɔ. A ya musu-mansaya-fulɛ sigi a kunyɛ la.

¹⁸ A ya Ɛsitala kɔn-kura-ladiyɛ kɛ. A ya ala mɔgɔ-ba-sɛbɛnɛnu kele. A ya tele kelen yabɔ, a ya a ma, ala nyamanita-mɔgɛ bɛɛ ya a sulen wulɔn. A ya nilɛ kɛ wulɔn tele rɔ iko a bɛnta, mansɛ ni mɔgɔ kɔ nya min.

Mansɛ Niyi-Lakisi-Koe Mɔdekɛyai Bolo

¹⁹ Yanni Ɛsita ni ta musi doinu kurun tɔ, wo ya a taran, mansɛ nyɛrɛ ara sɔ tinɛ di Mɔdekɛyai kɛ ma.

²⁰ Ɛsita ma sɔn mɔgɔ ni a sibole anubɛ a na-kelen-nyɔgɛnu lɔn iko Mɔdekɛyai ya a fɔ a ye nya min. Hali mansɛla bara-musi le a la gbɛ, Mɔdekɛyai ya fenfen fɔ a ye, a ti wo tinya iko a ye a mala nya min nun wo tumɛ wo ye a makolola.

²¹ Mɔdekɛyai ye ala mɔgɔ-bayɛ la wati min mansɛ warɛ, mansɛla bonda-da-makandanna fila ye nyɔ, Bigitan anubɛ Tirɛsa, wonu ya yanfɛ don mansɛ Sakasi ma. Anu ko anu ni a faga.

²² Mɔdekɛyai ya kalasɔrɔn wo ma tumɛ min, a tara wo fɔ a dɔgɔ ye, mansɛla musi Ɛsita, kɔni. Ɛsita fanan tara Mɔdekɛyai kan kɛ rakaran ala kei Mansa Sakasi ye.

²³ Anu ya kumɛ wo fɛ-bira wati min, a mara tonyɛ la, anu ya yili sɔ mɔgɔ filɛ wonu kan la ka anu dun. Mansɛ fanan ya a fɔ ko ko sifa min bara ma kɛ la, anu ni wo sɛbɛ anuna nyamani-buku rɔ.