Ɛsita 1 - ALLALA KUMƐMansɛ Masɔsɔ Koe Ala Musi Bolo 1-2 Pasiya nyamani-tigi min tɔgɛ Sakasi, wo siginɛ Susa soe burɔ. Nyamani-kun kɛmɛ ani nyamani-kun mogan-ni-wɔrɔnfila le ye a kɔrɔ (127). Ka a dabira Yindiya nyamanɛ ma ha ka a sigi Sudan nyamanɛ la, ala nyamanɛ le wo bɛɛ la. 3 Sakasi kɛ, wola mansayɛ san sawa nyɔgɛ ma, a ya ladiya-belebele kɛ ala nyamanita-mɔgɔ-banu ye. Kɛlɛ-dan minnu bi Pasiya anubɛ Midiya nyamanɛ rɔ, wonu bɛnta ladiyɛ wo rɔ. Mɔgɔ-ba minnu bi nyamanɛ wonu kun na anubɛ a mɔgɔ-ba-malɔnnɛnu, wonu fanan bɛnta a rɔ. 4 Karɛ wɔrɔ dɛgɛdɛgɛ, a ye anu de-nyinina ka ala fen-tigiyɛ anubɛ ala fanka mayira. 5 Kɛ kanɛ a la, a ya ladiyɛ kɛ Susa kɛnu ye, a keimɛnu, kɔni. A bolo-kolon wo, a fen-tigi wo, a ya wo bɛɛ de-nyini. Anu tora ladiyɛ wo kun na ale mansɛla lu-kɔndɛ rɔ ha lɔgɔkun kelen. 6 A ya yesekara-gbɛ anubɛ yesekara-finyɛ bi ka wo ma kurɛ la ka lu-kɔndɛ wo rabɛn wonu na. Anu ya kurɛ wonu tɛ-kiri tala yili-kolo-pɔrɔkɔsɛnu na. Wodi-gbɛ-dɛɛn minnu sɔnɛ sɛnbɛrɛn-kɔnnu na tala, anu ya yili-kole wonu kiri tala wonu na. Sɛnbɛrɛn-kɔn wonu nadannɛ kuru-gbɛlɛ denu denu na. Sigi-fen-yan minnu nadannɛ sɛnɛ anubɛ wodi-gbɛ la, wonu siginɛ tala lu-kɔndɛ wo rɔ. Lu-kɔndɛ wo gbɛlɛkannɛ kuru-gbɛlɛ subolo-siyamɛ bɛɛ la. 7 Anu bi baan minna sɛnɛ-yi-lafɛ minnu tɔ, wonuna dan-nya farani de anu nyɔgɔn na. To ma to mansɛla baan-koe la. 8 Bɛɛ ya a wasakara maka baan rɔ bawo ale mansɛ ya a fɔ ala bonna-wɔli-kɛlɛnu ye ko bɛɛ ni a min iko a di a ye nya min. 9 Wati kelan wo le tɔ fanan, mansɛla musi Fasati ye ladiyɛ kɛla bɔn burɔ mansɛla bolɔn la Susa so-burɔ-musinu ye. 10 Ladiyɛ wo tele wɔrɔnfila nyɔgɛ ma, dolo-minyɛ ya mansɛ lasewa. A ya a fɛ-birala tɛgan mɔgɔ wɔrɔnfila kele, Mɛhuman wo, Bisita wo, Habɔna wo, Bigita wo, Abagita wo, Sitari wo, anubɛ Karakasi. 11 A ya wonu sɔ ala musi Fasati kele tinɛ. A ya a fɔ a ye ko a tenbi nala, a ni a rabɛn ala mansaya-musi-mirannu tɔ. A sɔgɛ ye a la, a ni na a makiri-nya anubɛ ala kinyɛ yira kei-nyama wo la. 12 Kɔnɔ kilayɛ kɛnu kɛra mansɛla musi ma nkɛkuna, a ya a ban ta-koe ma pati! Wo fɔɛ mansɛ ye, mansɛ yisi bɔra dɔgɔma-ma-de. 13 Fenfen tugura sereya la, yanni a ni ko-wo-ko ma, ale mansɛ si ala mɔgɔ-ba-malɔnnɛnu fɔlɔn manyinika. A ya ala mɔgɔ-ba-kurɔn kɛnu kele alako wonu ni a hɛnkili labila ka a lɔn a si min ma gbɛ. 14 Mɔgɔ-ba wonu tɔgɛ le kɛnu na, Karisina wo, Setari wo, Adamata wo, Tasisi wo, Merisi wo, Marisena wo anubɛ Mɛmukan. Mɔgɔ-ba kɛnu denu bi mɔgɔ-ba bɛɛsi yarɔ Pasiya anubɛ Midiya nyamanɛ rɔ. Yanni mansɛ ni ko-wo-ko ma, a si a tole masɔ mɔgɔ-ba kɛnu denu na fɔlɔn. 15 A ya a fɔ anu ye ko, “Nde le ya kilayɛ lata nna musi Fasati ma, n ko a ni na. A ya a ban pati! Wo le ya a to, n bi wo manyinikala, nfen si ma a la iko mala tɔn ya a fɔ nya min?” 16 Nba, Mɛmukan ya a fɔ mansɛ anubɛ ala mɔgɔ-ba-toenu ye ko, “Mansɛla bara-musi kɛ ma bila mansɛ dɔrɔn na kɔnɔ a ara bila male mɔgɔ-banu anubɛ nyamanita-mɔgɛ bɛɛ le la. 17 Ka a bi kɛ ma gbɛ, ni musu-wo-musu ya mansɛla musi sɔn kɛ lamɔɛn, wo si yoo ala kei ma. Anu si to a fɔla ko mansɛla musi ma kuri a banna ala kei ye, kumanato male ma. 18 Ka tenbi wo la, Pasiya anubɛ Midiya mɔgɔ-ba-malɔnnɛnuna musinu ba mansɛla musi sɔn kɛ lamɔɛn tumɛ min, yanni wurɛ la, anu si to kɛ fɔla anuna keinu tole tɔ. Musu-wo-musu ti ala kei gbiliya tun nyamanɛ kɛnu tɔ, ado keinu fanan yisi si bɔ anuna musinu kuma. 19 Mansɛ, ni i si sɔn, musi kɛ to a nyɛrɛ ma. I ni a ma, anu ni Fasati wara-koe sɛbɛ Pasiya kɛnu ani Midiya kɛnuna tɔn-buku rɔ ka a fɔ ko a ye a nyɛrɛ ma le gbɛ! Ni wo sɛbɛnɛ de, a ti yɛlɛma muk! Wo kɔma, i ni ata sɔ tinɛ wo bi a bolo ka a di musu-gbɛrɛkɛ ma. 20 Mansɛ ara tɔn sifa min sa kɛ la, ni wo ranyɛnsɛnta ala nyamanɛ mumɛ bɛɛ rɔ, wo si a ma, nyaganɛ bɛɛ ni ala kei gbiliya, hali bolo-kolɔnnuna musinu.” 21 Kumɛ kɛ ya a diya don mansɛ anubɛ mɔgɔ-banu tɔ bɛrɛkɛ! Mansɛ fanan ya a ma iko Mɛmukan ya a fɔ nya min. 22 Mansɛ ya a ma, tɔn kɛ sɛbɛra bɛɛta kan rɔ iko anu si anuna kannu sɛbɛ nya min. Anu ya a sɛbɛ ko kei bɛɛ ni ma kun-tigi la ala musi kuma bɔn la. Ni kei ya ko-wo-ko latɛgɛ bɔn la, wo kɔrɔ ti bi musi bolo. |
Kuranko Common Language Bible © The Bible Society in Sierra Leone, 2006.
Bible Society in Sierra Leone