Ɛfɛsa 4 - ALLALA KUMƐ

Bagbu Kelan Wara-Koe

¹ Woletɔ nde, Pɔli min bi yele la Marita wɔlɛla ko la, n bi wo madiyala ko wo ni tagama iko a bɛnta, Allata mɔgɔ-yabɔnɛnu ni tagama nya min.

² Wo kana a lagbɛlɛya wo nyɔgɔn kuma fɔ ka famayigiyɛ kɛ wo nyɔgɔn ye a nya bɛɛ ma. Wo ni wo munyu wo nyɔgɔn kɔrɔ keninteyɛ rɔ.

³ Wo ara ma na kelan la Allata Ni-Sɛnimɛ baraka rɔ min kɛ, wo ni wo raya ka to kan kelen tɔ yisi-kimɛ rɔ, ado yisi-kimɛ wo si wo latugun wo nyɔgɔn na.

⁴ Bagbu kelen de ma dama la, ado ata Ni-Sɛnimɛ kelen de ma bolo. Alla ara ma kele yigi kelen de ma.

⁵ Mari kelen de ma kuma, ma bɛɛsi dɛnkɛninyanɛ min ma, kɔni, ado ma bɛɛsi batasira tɔgɔ kelan wo le tɔ.

⁶ Fa kelen de hadama-dan bɛɛ bolo, Alla min bi ma dama kun na, kɔni. Wo le ye wɔlila ma dama yisi rɔ ka ata wɔlɛ kɛ male bolo.

⁷ Ma dama ara kɔ-fan do sɔrɔn Mari bolo kɔnɔ bɛɛtɛ ye a dan na iko Kirasiti ya a rabɛn nya min.

⁸ Iko a sɛbɛnɛ nya min fɔlɔ-nun ko, “A yɛlɛta san ma tumɛ min, a tara mɔgɔ-biranɛnu na a bolo nyɔ. A ya kɔ-fan di mɔgɛnu ma.”

⁹ Nba, ma ti ke a fɔla ko, “A yɛlɛta san ma,” ni a ma yigi dugu-kole kɛ kuma nun fɔlɔ.

¹⁰ Woletɔ Yisa kelan min yigira, Yisa kelan wo le yɛlɛta san-kole rɔ pon alako a ni taran duninya kan tinɛ bɛɛ rɔ.

¹¹ Ale le ya “kɔ-fan di mɔgɛnu ma.” A ya donu ma Kirasitita kilayɛnu na ka donu ma nɛbinu na. A ya donu ma kibara-nyima-fɔlɛnu na ka donu ma mɔgɔ-manugunɛgɛlɛnu na minnu si mɔgɛnu karan Allala kumɛ ma.

¹² A ya kɔ-fan kɛnu di le alako Allala mɔgɛnu-tabɛnnɛ ni taran Allata wɔlɛla ko la. A ya wo ma le alako Kirasitita chɔchi ni sabati.

¹³ Wɔlɛ kɛ ni to tala yarɔ ha ma dama ni to kan kelen tɔ dɛnkɛninyɛ fɛ ka Allata den Yisa wara-koe lɔn. Ma si ma mɔgɔ-kanbalinɛnu na worɔ ka to koloyala ha Kirasiti ni taran ma yisi rɔ a nya-bɛrɛbɛrɛ ma.

¹⁴ Nba, wo kana ma dennɛnu na tun ka to finki-fankala. Wo kana ma iko fɔnyɔ ye kulɔn latonko-tankala nya min. Woletɔ hallitorenu ba anu taya ka wo yanfa karan-kurɛ la tumɛ min, anu kana wo lasama kilɛ ma.

¹⁵ A fisa, ma ni to tonyɛ fɔla ma nyɔgɔn ye keninteyɛ rɔ alako ma ni ma iko Kirasiti min bi ma kunyɛ la.

¹⁶ Ma bagbuyi bɛɛ latugunnɛ anu nyɔgɔn na iko a bɛnta, a ni ma nya min ale bolo. A sɔlɔmɔnya kelen-kelennamɛ-bɛɛ ye wɔlila iko a bɛnnɛ a ni wɔli nya min. Woletɔ a ye koloyala le ka a nyɛrɛ lasabati keninteyɛ rɔ.

Ni-Kurɛ Wara-Koe

¹⁷ Marita kilayɛ le kɛ la n bi min nagbɛlɛyala wo kuma gben! Wo kana tagama tun iko Alla-batobɛlɛnu. Wonu miriya manɛ fuyi le la.

¹⁸ Anu hɛnkili ye pinpi rɔ. Alla ye nimayɛ min dila male ma, anuta fenfen sa wo rɔ bawo anu ma ko-wo-ko nya-yen anuna yisi-gbɛlɛyɛ bolo.

¹⁹ Anu si kisimiriya-koenu ma bawo anu ti miliya mumɛ! Anu bara anu nyɛrɛ ma yabatoenu na ka ko-yogoma-su bɛɛ dan-natenbi.

²⁰ Wole ma Kirasiti wara-koe karan wo nya.

²¹ Wo ya a wara-koe lamɔɛn tumɛ min ka ma aletɛ la, wo ya ata tonyɛ le karan, wo ma?

²² Woletɔ wo ye tagamana wo kɛ-nya-kɔrɛ min tɔ nun, wo ni wo boloka. Kɛ-nya-kɔrɛ wo ya miriya-yogomɛnu don wo yisi rɔ min ya wo lasama kilɛ ma.

²³ A fɛrɛ sa fɔ wo yisi anubɛ wo hɛnkili ni kuraya tun feu!

²⁴ Fɔ wo ni kɛ-nya-kurɛ bi min nadannɛ iko Allatɛ ye nya min. Mɔgɛ min si kɛ-nya-kurɛ bi, wo si gbɛ ko wonu telennɛ Alla yala, ado wo bɛɛ sɛninyani de!

²⁵ Wo kana foninyɛ fɔ tun! Bɛɛ ni tonyɛ fɔ anu nyɔgɔn ye bawo Kirasiti bagbu kelen de ma dama la.

²⁶ Ni min diminyanɛ mɔgɛ ma, a kana sɔn, ala diminyɛ ni a ladon hakɛ rɔ. A diminyanɛ kana telen gbɛn,

²⁷ min si a ma, a ni fɛrɛ di Setanɛ ma.

²⁸ Ni min bara duru kankanyɛ la, wo ni kankanyɛ boloka ka a sɛbɛ don wɔlɛ ma. Wo si a ma, a ni ke a nyɛrɛ-beli-fannu sɔrɔnna ka bolo-kolɔnnu fanan dɛnbɛ.

²⁹ Wo kana kuma-dumanɛnu fɔ kuma tinɛ, fɔ mɔgɔ-dɛnbɛn-kumɛnu dɔrɔn! Wo si ko nyinya mɔgɛnu ma ka duwɛ lana wonu ma minnu bi anu tole masɔla wo kan la.

³⁰ Mɔgɔ kana Allata Ni-Sɛnimɛ ladiminya bawo ata Ni-Sɛnimɛ le Allala tamasere la wo kuma ko a halalɛ le wole la. Tamasere le ale ata Ni-Sɛnimɛ la ko Marita Tele wa na, a si ma hɔrɔya wulɔn.

³¹ Nyɔgɔn-kɔn wo, yisi-bɔɛ wo, diminyɛ wo, wo ni wonu boloka. Wo kana nyɛɛ mɔgɛnu ma ka mɔgɛ manyini, ado wo kana ni-yogoyɛ kɛ wo nyɔgɔn na.

³² Wo ni wo nyɔgɔn bira a nyimɛ la ka wo nyɔgɔn makoto iko Alla ara wo makoto nya min Kirasiti baraka rɔ.