Ɛfɛsa 1 - ALLALA KUMƐ

¹ Nde, Pɔli le ye kɛdi kɛ sɛbɛla. Nde mara Yisa Kirasitita kilayɛ la iko Alla ya a latɛgɛ nya min. Kɛ sɛbɛnɛ Alla batolɛnu ma Ɛfɛsa soe burɔ minnu sɔnɛ Kirasiti Yisa ye yiri!

² Ma Fa Alla anubɛ ma Mari Yisa, Allata-Mɔgɔ-Yabɔnɛ, kɔni, alamɛ wonu ya hinɛ anubɛ yisi-kimɛ di wo ma.

Kisi-Koe Bɔ-Koe Gbɛ Ma

³ Ma ni baraka bira ma Mari Yisa Kirasiti, wo Fa Alla ye dɛɛ bawo duwɛ min bɛɛsi ye Arinyɛni tɔ, Alla ara wonu di ma ma. Ma ya wonu sɔrɔn Kirasiti baraka le tɔ.

⁴ Yanni duninya ni dan, Alla ara ban ma yabɔla nun alako ma ni ma atɛ la Kirasiti baraka rɔ. A ya ma yabɔ ko ma ni sɛninya a yala. A sa a fɛ, fɛɛ-wo-fɛɛ ni taran ma la. Ala keninteyɛ rɔ,

⁵ Alla ara ban a latɛgɛla ko ma ni ma a halala-dannu na Yisa Kirasiti baraka rɔ, ado a nyɛrɛ diyana-koe le wo bɛɛ la.

⁶ Ma ni a tanto ata hina-belebele-wɛla ko la kosɛbɛ! A ara wo di ma ma sewɛ rɔ a diyana-dan baraka rɔ.

⁷ Kirasiti ya a nyɛrɛ ma sarakɛ la alako a yele ni ma hɔrɔya ma hakɛnu ma. A ya wo ma Allala hina-warani-bɛla ko la,

^8-9 a ya min nabon ma kuma, kɔni. A ara ban a latɛgɛla Yisa Kirasiti baraka rɔ ata hɛnkili anubɛ ata lɔnnɛ fɛ ko a ni a nyɛrɛta gbundu-koe labɔ gbɛ rɔ ma ye.

¹⁰ Ata gbundu-koe ye min na, wo le kɛ la. A wati wa ke tumɛ min, Alla si ala ko-latɛgɛnɛ wo kanbali. Ala dali-fan min bɛɛ ye san-kole rɔ wo, min bɛɛ ye dugu-kole kuma wo, a si wonu nadɛn kan-tina-kelen alako Kirasiti ni ma wonu kunyɛ la.

¹¹ Fan bɛɛ si ma iko Allata ko-latɛgɛnɛ anubɛ a sako ye nya min. Woletɔ a ya ma yabɔ ko mabɛ Kirasiti ni to ko kelen tɔ ka ma a halalɛ la, ado a ara a latɛgɛ wo nya le kebi fɔlɔ.

¹² Nba, male Isirɛla mɔgɛ minnu fɔlɔn ya Kirasiti ma ma yigi la, male fɔlɔn ni Alla tanto wona ata gbiliyɛla ko la!

¹³ Wole fanan mara a halalɛ la wo nya na le. Wo ya tonyɛ lamɔɛn tumɛ min, wo dɛnkɛninyara Kirasiti ma. Kibara-nyimɛ wo nara kisi-koe la wo ye. Alla ya wo ma atɛ la ka ata tamasere sigi wo kuma, ata Ni-Sɛnimɛ, kɔni, ado lanyiri kirinɛ ata Ni-Sɛnimɛ wo le di-koe rɔ wo ma nun ka a yira ko Allatɛ le wole la.

¹⁴ Alla ara wo yili-madiya koe min na, wo dabirɛ le ale ata Ni-Sɛnimɛ la ma ye. Ma lanɛ a la feu, ko Allatɛ ye minnu na, a si hɔrɔya-kanbalinɛ di wonu fanan ma. Ma ni a tanto wona ata gbiliyɛla ko la!

Pɔlila Madiyalɛ Wara-Koe

¹⁵ Nba, wola dɛnkɛninyɛ Mari Yisa ma anubɛ wola keninteyɛ wo nyɔgɔn tɛma, kebi n ya wonu namɔɛn,

¹⁶ n ma fara baraka-birɛ la Alla ye wolela ko la. N hɛnkili tonɛ wo ko nta madiyalɛnu tɔ.

¹⁷ N bi ma Mari Yisa Kirasiti, wo Fa Alla gbiliya-tigi matarala ko a ni ata Ni-Sɛnimɛ di wo ma. A si hɛnkili di wo ma ka ata tonyɛ labɔ gbɛ rɔ wo ye alako wo ni a lɔn a nya-bɛrɛbɛrɛ ma.

¹⁸ N bi a matarala ko ata wan-takanɛ ni wo hɛnkili-dɛ laka. Wo wa ma tumɛ min, a ya wo kele yigi min ma, wo ni na to wo lɔnna. Wo kɔma, wo ni a lɔn a ara duwa-belebele min kiri wole, ata mɔgɛnu ye.

¹⁹ Wo ni ata sɛnbɛ-waranɛ lɔn min bi wɔlila male dɛnkɛninya-mɔgɛnu tɔ. Sɛnbɛ wo min bi male rɔ,

²⁰ sɛnbɛ kelan wo le ya Kirasiti lawuli ka bɔ furinu tɛma. Sɛnbɛ kelan wo ya Kirasiti sigi Alla kɔɛn-nyimɛ rɔ Arinyɛni tɔ.

²¹ Allata nima-fan bɛɛ, a mara melika la wo, a mara nyina la wo, a mara hadama-den na wo, Kirasiti tenbira wonubɛ anuna kun-tiginu na. Duninya kɛ wo, duninya min bi nala wo, Kirasiti tɔgɛ kolo sɛnbɛ-tigi wo bɛɛ ko.

²² Alla ya fan bɛɛ sa Kirasiti tontɛ kɔrɔ ko a ni ma fan bɛɛ kun-tigi la dɛnkɛninya-mɔgɛnu ye.

²³ Kirasiti bagbuyi le chɔchi-mɔgɛnu na. Ale le ye chɔchi da fala ado ale Kirasiti nyɛrɛ le ye fan bɛɛ da fala.