Tɔn-Fɔɛ-Fila-Nyɔgɛ 9 - ALLALA KUMƐ

Kuma-Birabɛlitayɛ Mɔgɛnu Bolo

¹ Musa ya a fɔ Isirɛla mɔgɛnu ye ko, “Wo ni wo tole masɔ! A ara to doni, wo ni Yorodan bɛ kɛ tɛgɛ ka ta wo sigi mɔgɔ-ragbɛlɛmɛnuna nyamanɛ rɔ, ado anu siya wo ko kati! Anuna soenu kolo dɔgɔma-ma-de! Anuna tarɛnu yan pon!

² Mɔgɛ wonu fanan yan, anu kolo gbɛlɛ! Mɔgɛnu kɛnɛna a fɔla ko mɔgɔ-wo-mɔgɔ ti kɛnu nɔ!

³ Kɔnɔ kaka, wo si a yen wota Mari Alla ye tala wo yarɔ iko ta-wɔnkɔrɔmɛ. Wo ye tala nya min, ale Mari ye tala mɔgɛnu nɔla wo yarɔ wo nya na le. Wo si ke le ka anuna nyamanɛ bi anu bolo ka anu faga tiriya iko Mari ya lanyiri kiri wo ye nya min.

⁴ “Wota Mari Alla wa ban fanka dila wo ma tumɛ min ka mɔgɛ kɛnu faga, wo kana wo miri bawo wo sɔn kin, woletɔ a ya nyamanɛ wo di wo ma. Kɔnɔ a sa wo nya. A ya nyamanɛ wo di wo ma bawo Kenan mɔgɛnu wunduyogo.

⁵ Iko n ya a fɔ nya min, Mari ye nala nyamanɛ kɛ dila wo ma. A ma wo ma bawo wo mɔgɔ-nyimɛ le wo la, ado wo telenta. Wo ma de! Kɔnɔ a ya wo ma bawo Kenan mɔgɛnu wunduyogo, ado fanan, Mari Alla ya ata lanyiri min kiri wo benba Iburayima, Isiyaka anubɛ Yakoba ye, a ye wo kanbali-koe rɔ.

⁶ Wo ni a lɔn wo yisi rɔ yati, ko wo sa nyamani-hakikɛ wo sɔrɔnna bawo wola ko kin. A dabira fɔlɔtɛ, wo yisi gbɛlɛ ka tenbi mɔgɛ bɛɛ la.

Ninki-Danla Muninyɛ Wara-Koe

⁷ “Wo kana nyina min ya a to, wota Mari Alla fonde bɔra wole Isirɛla mɔgɛnu kan ma Sinayi kɔnkɛ kɔrɔ. Kebi wo bɔra Iyipiti nyamanɛ rɔ tele min ma ha ka a sigi wo ke wati ma yan, wo murutiyanɛ Mari ma tolon!

⁸ Katarala Sinayi kɔnkɛ kɔrɔ, wo ya a ma, Mari Alla fonde bɔra dɔgɔma-ma-de! A fonde bɔra ha a sɔgɛ ya a bira ka wo lato dogbe!

⁹ Wobɛ Mari sarata min na, wo sɛbɛnɛ kuru-walannu ma. N tara kɔnkɛ kuma kuru-walan wonu bi tinɛ ka su bi-nani ani tele bi-nani le bɔ nyɔ. N ma fenfen dɔn hali ka n min.

¹⁰ Wo ladɛnnɛ Sinayi kɔnkɛ kɔrɔ tumɛ min, wo ya kuman-kan min namɔɛn ta-mɛlan wo rɔ, Mari ya kumɛ wonu denu sɛbɛ kuru-walan filɛ wo ma a nyɛrɛ kɔɛn la ka anu ma tɔn la.

¹¹ “Tele bi-nani anubɛ su bi-nanɛ dafara tumɛ min, Mari ya wonu denu denu don n bolo nyɔ.

¹² Wo kɔma, Mari ya a fɔ nde ye ko, ‘I buri yigila kɔnkɛ kɔrɔ tiriya bawo i nara mɔgɛ minnu na ka bɔ Iyipiti nyamanɛ rɔ, wonuna ko-yogoma-ladan ara a ma, anu bara anu nyɛrɛ kɔsɔ. N ma n tade lefan, n ya min fɔ anu ye, anu bara anu kan-kɔ sɔ wo la. Nba, i yɛ lata de! Anu bara bɛsɛ ladan anu nyɛrɛ ye.’

¹³ “Mari ya a fɔ nde, Musa ye ko, ‘N ya mɔgɛ kɛnu lɔn. Anu kalabante.

¹⁴ I kana n nakala de! N si mɔgɛ kɛnu faga kelenna! Mɔgɔ-wo-mɔgɔ ti anu miri anu ma tun! N si anu bara-koe lato yen!’ Wo kɔma, Mari ya a fɔ ko, ‘N si a ma, ile ni bɔnsɔn-kurɛ dabira fanka ye minnu na, ado wonu si siyaya kɛnu ko.’

¹⁵ “N ya n tintan ka yigi kɔnkɛ kɔrɔ kuru-walan filɛ ye n bolo tɔ tɔn sɛbɛnɛ minnu ma. Ta-mɛlan ye malanna kɔnkɛ kuma bilibili n kɔma-kilɛ la.

¹⁶ N ya a taran, wo ara banna wota Mari Allata tɔn tinyana. Wo ara hakɛ kɛ Alla la ka ninki-danla muninyɛ ladan.

¹⁷ Wo damasi yakɔrɔ nyɔ rɔ, n ya kuru-walan filɛ fɛrɛn dugi la. Anu tatiira.

¹⁸ “Yisi-tinyɛ le ya a ma, n ya n maburun dugi ma ka Mari madiya su bi-nani tele bi-nani kɔrɔ. N ma fen dɔn hali ka n min bawo wola hakɛ ya a ma, Mari fonde bɔra wo kuma.

¹⁹ Marila diminyɛ ara a ma, n bara kilan dɔgɔma-ma-de! A fonde bɔra ha a sɔgɛ ya a bira ka wo damasi faga tɛrr! Kɔnɔ Mari ya a wɔlɔ matɔlɔ nta madiyali-kɛ-kan la.

²⁰ Mari fonde bɔra n kɔrɔ Aruna kuma. A ko a ni a faga. Wo wati rɔ, n ya Alla madiya ale fanan ye.

²¹ N ya wola fen-kɔsɔnɛ wo bi, wola ninki-danla muninyɛ, kɔni, ka a lakɛ tɛ rɔ. Wo kɔma, n ya a rakerikeri ka a ramɛsɛya ha a mara gbangban la. N ya a gbangban bi ka a rawuya yi rɔ min kunyɛ sɔnɛ kɔnkɛ wo ma. Yi wo yigira gbangban wo la pon!

²² “Wo tumɛ wo ye Kɔrɔbɔ Tinɛ, wo ya a ma, Mari fonde bɔra wo kan ma. Wo kɔma, wo ye Ta-Layigi Tinɛ tumɛ min, wo ya a ma, Mari fonde bɔra wo kuma nyɔ. Ma ya nyɔ boloka tumɛ min ka ta kan tinɛ do rɔ, ma ya a fɔ min ma ko Ko-Latenbi-Kaburu-Soe, wo ya a ma, Mari fonde bɔra wo kuma nyɔ tun.

²³ Mari ya wo labɔ Kɛdɛsi-Baniya tumɛ min ka ta lanyiri-nyamanɛ bi-tinɛ a tiginu bolo, wo murutiyara a ma. Wo ma la ale la. Wo ma ata tɔnnu bira.

²⁴ Ka a dabira wo wati ma n bolo ha ka a sigi kaka la, wo ye murutiyɛ le kun na tun.

Musa ya Alla Madiya Isirɛla Mɔgɛnu ye Nya Min

²⁵ “N ya a yen min kɛ, Mari ye a sɛbɛ le la wo faga-koe la, n ya n maburun dugi ma Mari kɔrɔ su bi-nani tele bi-nani ka ale madiya.

²⁶ N ya a fɔ ko, ‘E, Mari, Sɛnbɛ-Bɛɛ-Tigi, n bi i matarala. I yandi, i kana ita mɔgɛ kɛnu faga. I ya anu nabɔ yɔɔnyɛ rɔ Iyipiti nyamanɛ rɔ ita fanka-makawanɛ le la.

²⁷ I miri ita wɔli-kɛlɛnu ma, Iburayima anubɛ Isiyaka anubɛ Yakoba. I yandi, Mari, i kana i bila anuna murutiyɛ anubɛ anuna wunduyogoyɛ fɛ. Anu hakɛ makoto.

²⁸ Mari, ni i ma wo ma, Iyipiti mɔgɛnu si a fɔ ko i ma ke tala ita mɔgɛ kɛnu na lanyiri-nyamanɛ wo rɔ. Wonu si to a fɔla ko bawo ata mɔgɛ wonu ma diya a ye, woletɔ a tara anu na anu faga-koe la wulɛ rɔ.

²⁹ Min sanɛ wo kuma, ita mɔgɔ-bɛrɛbɛrɛ le kɛnu na. Ile le tɔrɔta mɔgɛ kɛnu na ka anu nabɔ Iyipiti ita fanka-makawanɛ la.’ ”