Tɔn-Fɔɛ-Fila-Nyɔgɛ 5 - ALLALA KUMƐ

Tɔn-Tan Rakaran-Koe Isirɛla Mɔgɛnu Ye

¹ Musa ya Isirɛla mɔgɛnu nadɛn anu nyɔgɔn fɛ ka a fɔ anu ye ko, “Wole Isirɛla mɔgɛnu, n bi nala tɔn minnu karanna wo ye bi, wo ni wo tole masɔ wonu na. Wo si anu karan a kila-bɛrɛbɛrɛ fɛ. Wo ni la anu na serr, ka anu bira gben!

² Wo tumɛ ma ye Sinayi kɔnkɔ kɔrɔ, mata Mari Alla ya lanyiri kiri ma ye.

³ A ma lanyiri kiri ma benbanu dɔrɔn ye de! A ya a kiri male fanan ye, male min bi yan bi, kɔni.

⁴ Mari kumara wo ye gbɛ rɔ ta-mɛlan rɔ kɔnkɛ kuma nun iko mɔgɛ si kuma a ta-nyɔgɛ ye nya min.

⁵ Wo wati rɔ, n sɔnɛ wole anubɛ Mari tɛma ka a kuman-kan latenbi wole ma bawo wo ye kilanna tɛ la, woletɔ wo ma sɔn ka yɛlɛ kɔnkɛ kuma. “Mari ya a fɔ ko

⁶ ale le wota Mari Alla la min ya wo labɔ yɔɔnyɛ rɔ Iyipiti nyamanɛ rɔ.

⁷ “A ko wo kana fen-gbɛrɛkɛ bato ale kɔma muk!

⁸ “A ko fan minnu bi san-kole rɔ wo, fan minnu bi dugu-kole kuma wo, fan minnu bi yi kɔrɔ wo, wo kana wonuna muninyɛ fenfen ladan

⁹ wo si wo nyɛnkin min kɔrɔ ka a bato. Ale le wota Mari Alla la min sa nyinina a senɛ ma. Ni Mari sɔgɔ labɔra bɛsi-kɔlɛ minnu na, a ko a si wonu tɔrɔya, hali anuna dannu anubɛ anu mamanɛnu ha ka ta a sigi anu tolo-birɛnu na anubɛ anu tolo-bira-sɔɛnu. A ko minnu si anu ban a la, a si wonu tɔrɔ.

¹⁰ Kɔnɔ a ko ni min ya a keni ka ata tɔnnu bira, hali wonu bɔnsɔn matiyinu, a si ata keninteyɛ yira wonu na.

¹¹ “A ko mɔgɔ kana ale Mari tɔgɛ ratɛgɛ fufafu! Ni min ya wo ma, a si wo tigi tɔrɔ.

¹² “A ko wo ni wo hɛnkili to Sulen-Tele ko ka tele-sɛnimɛ wo bira gben iko ale wota Mari Alla ya wo nyamari nya min.

¹³ A ko wo si wola wɔlɛ bɛɛ kɛ tele wɔrɔ kɔrɔ.

^14-15 A tele wɔrɔnfila nyɔgɛ si ma Sulen-Tele la Mari Alla ye. Wo kana wɔli-wo-wɔli kɛ wulɔn-tele ma. Wola dannu wo, wola yɔɔnnu wo, wola sundannu wo, hali wola kolo-fannu, wonu fenfen kana wɔlɛ kɛ. Min ya a to, a ya a fɔ wo ye ko wo ni wo sulen tele wo ma, a ko wo ni wo miri a ma ko wole fanan bi yɔɔnyɛ rɔ nun Iyipiti. Ale le ya wo labɔ nyɔ ata kabana-ko-sɛnbɛ la. Woletɔ wobɛ wola yɔɔnnu ni wo sulen wo tele nyɛrɛ ma fanan.

¹⁶ “Wota Mari Alla ko wo ni wo fanu anubɛ wo nanu gbiliya, woletɔ a ye nala nyamanɛ min dila wo ma, wo si simayɛ sɔrɔn ka sigi hɛrɛ rɔ nyɔ rɔ.

¹⁷ “Mari ko wo kana mɔgɔ faga.

¹⁸ “Mari ko wo kana yɛlɛnyɛ kɛ.

¹⁹ “A ko wo kana kankanyɛ kɛ.

²⁰ “A ko mɔgɔ kana foninya-sereya bɔ.

²¹ “A ko a sigi-nyɔgɛta musu wo, ala bon wo, ala dugu wo, ala yɔɔn wo, ala kolo-fannu wo, mɔgɔ kana a niyi sa fenfen sufa kuma min bi a bolo.

²² “Tɔn le kɛnu na Mari ya minnu di wo ma wo tumɛ wo ladɛnnɛ Sinayi kɔnkɛ kɔrɔ. Mari ya tɔn tan kɛnu denu dɔrɔn di wo ma a kulu-mayɛlɛnɛ la banda-fin-digidigi-wɛ anubɛ ta-mɛlan ta-sisi-fin-bɛ rɔ. Wo kɔma, a ya a sɛbɛ kuru-walan fila ma ka anu don nde, Musa bolo.”

Isirɛla Mɔgɛnu Kilan-Koe

²³ Musa ya a fɔ anu ye ko, “Wo tumɛ ta-mɛlan ye kɔnkɛ kuma, wo ya kuman-kan lamɔɛn pinpi rɔ nyɔ. Wo wati nyɛrɛ rɔ, wola kun-tiginu anubɛ wola mɔgɔ-banu nara

²⁴ ka a fɔ n ye ko, ‘Mata Mari Alla ya ata sɛnbɛ anubɛ ata gbiliyɛ yira ma la. Kɔnɔ fɔlɔ nun, ma ya a lɔn ko ni Alla kumara mɔgɛ ye, a si faga. Kɔnɔ kaka, wo ara ma tɛrɛna-koe la ma bolo ka a lɔn ko ni Alla kumara mɔgɛ ye, a si to a niyi la.

²⁵ Nfen ya a to, ma si ma niyi fili a rɔ? Ta-yogoma-belebele kɛ si ma kasara. Tamayi mumɛ sa wo rɔ, ni ma ya mata Mari Alla kuman-kan lamɔɛn kɛ kɔma, ma si faga.

²⁶ Ha bi, mɔgɛ do ye nyɔ min bara Alla nimɛ kuman-kan lamɔɛn tɛ rɔ, a kɛndɛ ni to iko male?’

²⁷ Mɔgɛ wo damasi tora nde, Musa kɔma ka a fɔ n ye ko, ‘Nba, ile ni yɛlɛ kɔnkɛ kuma. Ni mata Mari Alla ya min bɛɛ fɔ i ye nyɔ, i si na wo rakaran ma ye. Ma si ma tole masɔ i la ka kumɛ wonu bira.’

²⁸ “Mari ya a fɔ nde, Musa ye ko, ‘Mɔgɛ kɛnu bara min fɔ kɛ la, tonyɛ le wo la.

²⁹ Ni a taranta, anu bi kilanna ka le tuma-wo-tuma ka nna tɔnnu bira, wo si diya n ye. Wo si a ma, anuta koe bɛɛ ni ta a kila-bɛrɛbɛrɛ fɛ, hali ka a sigi anu mamanɛnu na. Kɛ si ma habadan-koe la anu ye.’

³⁰ Mari ya a fɔ nde, Musa ye tun ko, ‘Ta a fɔ anu ye ko anu ni sɛgi anuna fani-bɔnnu na.

³¹ Kɔnɔ ile ni to n dafɛ yan. Nde nyɛrɛ si nna tɔnnu anubɛ nna sereyanu don i bolo. Ile si ta anu karan wonu na, woletɔ anu ba ta lanyiri-nyamanɛ wo rɔ n bi nala min dila anu ma, anu si nna tɔnnu anubɛ nna sereyanu natɔnbagaya.’ ”

³² Musa ya a fɔ anu ye tun ko, “N ya a fɔ wo ye ko ni wota Mari Alla ya fenfen fɔ wo ye, wo ni kɛwɔlɛ kɛ wo la. Wo kana tɔn kɛ do-wo-do masɔsɔ.

³³ Wo ni a bɛɛsi bira a kilɛ fɛ, woletɔ wo ye tala nyamanɛ min tɔ Mari ye nala min dila wo ma, wo si simayɛ sɔrɔn nyɔ. Koe bɛɛ si ta a kilɛ fɛ wo bolo.”