Tɔn-Fɔɛ-Fila-Nyɔgɛ 34 - ALLALA KUMƐ

Musa Masara-Koe anubɛ Ala Sayɛ

¹ Musa bɔra Mohabu lɛɛ rɔ ka ta Nibɔ kɔnkɔ-yɛlɛ dabira. A tara ha Pisiga kɔnkɛ kun tɛma min bi Yɛrikɔ tele-bɔɛ wara la. Mari ya lanyiri-nyamanɛ bɛɛsi yira a la. A ya a yɛ layɛlɛ Yorodan bɛ kunyɛ wara la ka Kaliyadi nyamanɛ mafɛlɛn ha Dan soe ye kan min.

² A ya Nafatali bɔnsɔntɛ mafɛlɛn. Nyamanɛ min bi tola Ifɛrɛm anubɛ Manasa ye, a ya wonu mafɛlɛn. A ya Yuda bɔnsɔn-mɔgɛnuna sigi tinɛ mafɛlɛn ha ka ta ke Mɛdetereniyan kɔgɔ-yi ma.

³ A ya a yɛ layigi ka Yuda bɔnsɔn-mɔgɛnuna dugu-doi mafɛlɛn. A ya lɛɛ wo mafɛlɛn ka a fɔlɔ Sowa soe ma ha ka ta ke Yɛrikɔ soe ma tin-kurinu bi kan min.

⁴ Mari ya a fɔ Musa ye nyɔ ko, “N ya nyamanɛ kɛ le lanyiri kiri Iburayima, Isiyaka anubɛ Yakoba ye ko n si a di anu kegeyɛnu ma. N bara sɔn ko ile ni nyamanɛ kɛ yen kɔnɔ nde, Mari ma nyɔ-ta-fɛrɛ di ile Musa ma.”

⁵ Wo kɔma, Marita wɔli-kɛlɛ Musa fagara Mohabu nyamanɛ rɔ nyɔ iko Mari ya a fɔ nya min.

⁶ Mari ya a togon fole do rɔ Mohabu nyamanɛ rɔ Bɛti-Piyɔri soe telen tɔ. Kɔnɔ ha bi, mɔgɔ-wo-mɔgɔ ma a lɔn yati, Mari ya Musa togon kan min.

⁷ Musa ya san kɛmɛ ani san mogan de bɔ wo wati rɔ. A ye fagala tumɛ min, a ragbɛlɛ, ado a yɛ kɛndɛ ken!

⁸ Tele bi-sawa, Isirɛla mɔgɛnu bi Musa dila Mohabu lɛɛ rɔ.

⁹ Nunna dan Yasowa salɛ fanɛ hɛnkili la bawo Musa ara ban a dantɛgɛla Mari ma a nyɛrɛ gbɛ rɔ. Mari ya tɔn minnu di Musa ma nun, Isirɛla mɔgɛnu ya wonu bira anu bolo filɛ la gben Yasowa bolo.

¹⁰ Ka a fɔlɔ wo wati ma, nɛbi-gbɛrɛkɛ mumɛ ma taran Isirɛla mɔgɛnu tɛma min si ma iko Nɛbi Musa bawo anubɛ Mari kumara anu nyɔgɔn na iko mɔgɔ si kuma a ta-nyɔgɛ la nya min.

¹¹ Nɛbi mumɛ sa nyɔ min si kabana-koenu nadan iko Nɛbi Musa. Mari Alla ya Musa sɔ ka kabana-ko-siyaman nadan Iyipiti mansɛ anubɛ ata mɔgɔ-banu anubɛ nyamanita-mɔgɛnu yala.

¹² Nɛbi mumɛ sa min si ko-makilannɛnu nadan Isirɛla mɔgɛ bɛɛ yala iko Musa.