Tɔn-Fɔɛ-Fila-Nyɔgɛ 33 - ALLALA KUMƐ

Musata Duwa-Laban Isirɛla Mɔgɛnu Ye

¹ Allata wɔli-kɛla Musa ya duwa-laban kɛ Isirɛla mɔgɛnu ye yanni a ni faga.

² A ya a fɔ ko, “Mari ya a nyɛrɛ yira ma la Sinayi kɔnkɛ kuma. A bɔra gbɛ rɔ ma ye iko sun-tele-tiyi Idɔm nyamanɛ rɔ, Sira kɔnkɛ ye kan min. A ya waan raka ma ma Paran kɔnkɛ dafɛ. Mari nara melika waga tan tɛma. Ta-mɛlan ye dugula wara la.

³ Marita mɔgɛnu di ale ye. A ye ata mɔgɛnu fɛ-birala. Woletɔ ma ye ma sala a tontɛ kɔrɔ ka a bato ka karan-tɔnɔnamɛ sɔrɔn ale bolo.

⁴ Karan wo, tɔn le wo la nde, Musa ara min di wole Yakoba kegeyɛnu ma, ado wo halalɛ le karan wo la min di wo ye ka tenbi wo bolo-fan bɛɛ la.

⁵ Isirɛla mɔgɛnu anubɛ anuna kun-tiginu ya anu nadɛn Sinayi kɔnkɛ kuma tumɛ min, anu sɔnta Mari la ka ata mansayɛ gbiliya.”

⁶ Musa duwara Rubɛn bɔnsɔn-mɔgɛnu ye ko, “Alamɛ Rubɛn bɔnsɔn-mɔgɛnu na kana to, hali anu ma siya.”

⁷ Musa duwara Yuda bɔnsɔn-mɔgɛnu ye ko, “N Mari, i wɔlɔ matɔlɔ mɔgɛ kɛnu di-kɛ-kan la ka anu dɛnbɛ. I yandi, a ma, anubɛ bɔnsɔn doinu ni to kan kelen tɔ tun. I yandi, Mari, anu tenbi anu yogenu kɛlɛla, i ni anu dɛnbɛ kɛlɛ rɔ. Alamɛ anu ya anu yogenu nɔ.”

⁸ Musa duwara Lifayi bɔnsɔn-mɔgɛnu fanan ye ka le ko, “Kuru filɛ min tɔgɛ Yurim anubɛ Tumin min bi saraka-masɔla-kun-tigi kɔgɔ-dala-kurɛ ma, ma si Mari sako lɔn wonu fɛ tuma-wo-tuma bawo i ya male Lifayi mɔgɛnu yabɔ i nyɛrɛ ye ila wɔlɛla ko la. I ya Lifayi mɔgɛnu nakɔrɔsi nde, Musa rɔ Kɔrɔbɔ Tinɛ rɔ. Lifayi mɔgɛnu ya yakɔrɔ-mamɔɛ sɔrɔn nde, Musala ko la Sɔnkɔ-Sɔnkɔ Tenke dafɛ.

⁹ I ya a lɔn, Lifayi mɔgɛ kɛnu bara ile Mari wara-koe sɔ anu yarɔ ka tenbi anuna mɔgɛnuna koenu na. Anu ya ita tɔnnu bira ka ita lanyiri latɔnbagaya.

¹⁰ Anu si Isirɛla mɔgɛnu karan tɔn-bira-koe ma ka anuna sarakɛnu masɔ anu ye ile Marita saraka-mintan-tinɛ kuma.

¹¹ I yandi, Mari, alamɛ Lifayi bɔnsɔn-mɔgɛnu wulita fanka rɔ. Alamɛ anuna ko-kɛnɛnu ya i hɛnɛ, Mari. Anu yogenu ba wuli anu kɛlɛla tumɛ min, alamɛ i ya anu halaki ka anu nato dogbe!”

¹² Musa ya a fɔ Bɛnyamɛ bɔnsɔn-mɔgɛnuna ko la ko, “Mari ya anu denu keni kosɛbɛ! Alla ye anu kandanna su-ni-tele, ado ata bato tinɛ ye anuta nyamanɛ tɛma.”

¹³ Musa duwara Yusufula den-kemini filɛ wonu bɔnsɔn-mɔgɛnu ye ko, “Alamɛ Mari ya banda-siyaman nana wola dugi rɔ biribiri! Alamɛ Mari ya a ma, wola kɔlɔnnu anubɛ wola tenkenu kana gbala mumɛ!

¹⁴ Alamɛ Mari ya a ma, wola ki-fannu ni sabati wola nyamanɛ rɔ. Wo ni to wola dɔn-fen-hakikɛnu sɔrɔnna anu wati-latɛgɛnɛ rɔ.

¹⁵ Alamɛ kɔn-gbɔ siyaman bɔra wola kɔnkɛnu tɔ.

¹⁶ Alamɛ wola nyamanɛ lafara fen-kinyɛnu na ka bɔ Mari bolo min kumara nde, Musa ye ta-mɛlan rɔ kɔlɔma-mɛsɛ do la. Alamɛ Yusufu bɔnsɔn-mɔgɛnu ya duwɛ kɛ sɔrɔn bawo kun-tigi le ale Yusufu la nun a na-kelen-nyɔgɛnu kun na.

¹⁷ Fanka ye Yusufu bɔnsɔn-mɔgɛnu na iko turɛ. A bɔnsɔn filɛ, Manasa anubɛ Ifɛrɛm, wonu tagbɛlɛ iko sigi-kere. Manasa bɔnsɔn kɛlɛ-den waga siyamɛnu anubɛ Ifɛrɛm kɛlɛ-den waga tan-tannu, wonu si anu yogenu kɛlɛ ka anu tasɔgɔ-sɔgɔ iko sigi-dalamɛ si mɔgɛ rasɔgɔ nya min. Hali minnu fɛ-yan anu na, anu si ta wonu gbenna ka anu nato dogbe!”

¹⁸ Musa duwara Sɛbulɔn anubɛ Isakari bɔnsɔn-mɔgɛnu ye ko, “Alamɛ yilayɛ ya Sɛbulɔn bɔnsɔn-mɔgɛnu munanfaga kɔgɔ-yi kuma. Alamɛ Isikari bɔnsɔn-mɔgɛnuna nɔnfuli tora koloyala anu bolo anu sigi tinɛnu tɔ.

¹⁹ Anu si sibolo-gbɛrɛnu kele Mari bato tinɛ kɔnkɛ kuma ka anu karan saraka-bɔ-nya la min si Alla hɛnɛ. Anu si anuna nɔnfulinu bɔ kɔgɔ-yi rɔ anubɛ kɔnkɛnu tɔ.”

²⁰ Musa ya kumɛ kɛ fɔ Kadi bɔnsɔn-mɔgɛnuna ko la ko, “Ma si Alla tanto bawo a ya Kadi bɔnsɔn-mɔgɛnuna nyamanɛ lakoloya. Anu fereyanɛ kɛlɛ-kɛ-tinɛ iko yarɛ minnu si mɔgɛ bole ka a ma anubɛ a kun-gbole.

²¹ Anu ya nyamani-hakikɛ do matara anu nyɛrɛ ye Yorodan bɛ tele-bɔɛ wara la. Anu ya kun-tigiya-nyamanɛ sɔrɔn. Wo tumɛ Isirɛla kɛlɛ-dannu nadɛnnɛ, anu ya Mari kuman-kan bira ka anuta lanyiri kanbali Alla wara la.”

²² Musa ya kɛ fɔ Dan bɔnsɔn-mɔgɛnuna ko la ko, “Anu bi gbanna ka bɔ Basan nyamanɛ rɔ iko yara-bulan ka ta kɛlɛ-kɛ-tinɛ.”

²³ Musa ya kɛ fɔ Nafatali bɔnsɔn-mɔgɛnuna ko la ko, “Marita duwɛ tora anu fɛ kosɛbɛ! A si nyamanɛ di anu ma min bi Kalili dalɛ tɔgɔfɛ.”

²⁴ Musa duwara Asɛra bɔnsɔn-mɔgɛnu ye ko, “Alamɛ Allata duwɛ birara wo ma ka tenbi wo na-kelen-nyɔgɛnu na. Alamɛ a diyara a na-kelen-nyɔgɛnu ye. Alamɛ ɔlifi-kɔlɔma siyaman taranta wola nyamanɛ rɔ.

²⁵ Wola soenu da-balan-fannu, alamɛ wonu mara nɛgɛnu na wo kanan-koe la. Fananta wo ye wo kɛndɛ la, alamɛ fanka taranta wo bolo.”

²⁶ “Alla dogbɛrɛ sa nyɔ min manɛ iko male Isirɛla mɔgɛnuta Alla, ale min bi tagamana san-kole rɔ, kɔni. Ale le ye bɔla banda-finyɛ rɔ ka wo dɛnbɛ.

²⁷ Alla le wo dɛnbɛnɛ la kɛlɛ rɔ. Wo ye wo gbɔnkunna a rɔ. A ye wo kɔrɔbila. Wo tenbi tala, a ye wo yogenu gbenna wo yarɔ alako wo ni anu faga.

²⁸ Wole Yakoba kegeyɛnu, wo si to yisi-kimɛ rɔ. Wo sigi-bole ra si bɛn wo ma lanyiri-nyamanɛ wo rɔ. Fenfen ti ban wo bolo. Wo si dɔn-fen siyaman sɔrɔn. Duri si to yigila wola ki-fannu kuma tuma-wo-tuma.

²⁹ Wole Isirɛla mɔgɛnu, duwa-dan le wole la. Sibolo-gbɛrɛkɛ sa minnu bi iko wole bawo Alla ya wole kisi. Wo kandan-fan le Mari la anubɛ wola kɛlɛ-kɛ-faan. A ye wo tankala ka nɔlɛ di wo ma. Wo yogenu si kilan wo la ka dɛgɛ min wo ye. Wo si anuna bɛsɛ kɔ tinɛnu tinya.”