Tɔn-Fɔɛ-Fila-Nyɔgɛ 32 - ALLALA KUMƐ

¹ “San-kole anubɛ dugu-kole, nde, Musa ye nala min fɔla, wo ni wo tole masɔ nta kumɛ wo la. Wo ni wo tole masɔ bɛrɛkɛ!

² Nta karan si bui iko banda-yi. A si sigi mɔgɔ yisi rɔ iko kunbi si sigi binyɛ la nya min. Nta kumɛ si na iko banda-tɔnɔnamɛ. Nta kumɛ manɛ le iko bandɛ min si ki-fan-yi sa a rɔ.

³ N si Mari Alla tɔgɛ tanto. Ata mɔgɛnu si a tanto ata kabana-koela ko la.

⁴ “Wota farɛ le Mari la min ti bɔ a gbɛ rɔ. Fɛɛ sa ala ko-ladan-nya fenfen na. Latelen-mansɛ le ale la. A si ko-latelennɛ kɛ. A ti lafisayalɛ kɛ.

⁵ Kɔnɔ telenbɛlɛ le wole la. Hali mɔgɔ ma wo kele Allata mɔgɛnu. Wo fanɛ hakɛ anubɛ yanfanteyɛ la.

⁶ Wole mɔgɔ-fufafuyinu anubɛ hɛnkilibɔnɛnu, wo ya Mari sara wola fisiriwɔlitayɛ kɛ le la, wa? Wo fa anubɛ wo Dali-Mari le ale la min ya wole ma bɔnsɔn kelen na.

⁷ “Wo ni wo miri ko-tenbini-kɔrɛnu ma. Wo ni wo fanu manyinika min mara wo wati rɔ. Wo ni kɛmɔgɛnu manyinika. Anu ni fɔlɔfɔlɔ-koenu takaran wo ye.

⁸ Alla Min Bi Fan Bɛɛ Kun Na, wo ya sibolenu sigi belenna anuta nyamanɛnu tɔ. A ya bɛɛ sigi a sigi tinɛ rɔ iko a ya a latɛgɛ nya min. A ya melika kelen-kelen sigi sibole bɛɛ kun na.

⁹ Kɔnɔ a ya Yakoba bɔnsɔn-mɔgɛnu namara a nyɛrɛ ye.

¹⁰ “Mari ya wo benbanu taran yilan-yilanna wula-da-rakolɔn le tɔ min ma kin. A ya wo fɛ-bira ka wo matanka iko a niyi.

¹¹ Mari ya Isirɛla mɔgɛnu makaran iko kokɛ tenbi ala dan karanna gban-bole la. Kokɛ si a nyagan wayan ala dan kɔrɔ. Ala dan tenbi bui-koe rɔ dugi ma, a si ta ala dan sigi a kɔɛ tɛma. Mari ya wole Isirɛla mɔgɛnu natanka bu-koe ma wo nya le.

¹² Mari kelen pe le sɔra wole, ata mɔgɛnu yarɔ. Bɛsi-wo-bɛsi ma ale dɛnbɛ wole fɛ-birala.

¹³ “A ya a ma, wo taranta wo diya kɔnkɔ-layan-bɛnu kuma lanyiri-nyamanɛ rɔ. Wo ya fen siyaman sɔrɔn wola sɛnɛnu tɔ. Wo ya liyi taran faran-woenu na. Wola ki-fannu mara-a-la hali wɔsɔkɔrɔ-duginu tɔ.

¹⁴ Wo ya nono-siyaman sɔrɔn wola ninkinu anubɛ wola baanu tɔ. Wola kolo-fannu tɔlɔta ka kɛɛnya. Wola dɛgɛ-munkenu kin kati! Wola baan-yinu tuninyanɛ.

¹⁵ “Wole Marita mɔgɛnu mara nɔnfulu-tiginu na kɔnɔ hali wo, wo murutiyara a ma. Wo ara tɔlɔ ha wo bu-dagɛnu bara sigi kɔnɔ hali wo, wo ya ale Dali-Mari boloka. Wota Fara-Kole min ya wo lakisi, wo ya wo ban wo la.

¹⁶ Wola bɛsi-kɔ-koenu bi a mala, Mari ye wo makeliyala. Wo ye Mari gboyana-koenu nadanna woletɔ a ara kɔrɔtɔ wo ma.

¹⁷ Wo ye sarakɛnu bɔla bɛsɛnu ye Alla bɛrɛ ma minnu na, hali wo benbanu ma minnu lɔn, hali wole Isirɛla mɔgɛnu ma wɔli minnu ye kɔrɔma la.

¹⁸ Wo ara nyina wota Alla ko min ya niyi di wo ma, ale Farɛ min ya wo matanka, kɔni.

¹⁹ “Mari ya wo yen nkɛkuna, a fonde bɔra wo kuma. A ya a ban wole la, wole min bi ala denyɛ la, kɔni.

²⁰ A ko a ti wo dɛnbɛ hali! Wole tolo-gberenu anubɛ wole mɔgɔ-murutiyanɛnu, a ni a yen wo ye nala min mala wo kɔma gbɛ!

²¹ Wo ara a ma, Mari fonde ara bɔ wola bɛsi-kɔ-koenu tɔ. Wo ara a ma, Mari ye wo makeliyala bawo wo ye bɛsɛnu kelela ko alla, ado Alla ma wonu na hali! Wo ye yɛlɛnna sibole minnu ma, Mari si wonu bi ka anu ma wole lamɔniya-fan la. Wo tɛgɛnɛ mɔgɛ minnu tɔ, wonuna keliyɛ si wuli wo fanannu na.

²² Marita diminyɛ si ma iko tɛ wa bin-gbalɛ bira ka mintannɛ kɛ dugi kɔrɔ ha ka ta ke lakira ma. Ata diminyɛ si ki-fannu anubɛ dugu-kole mintan gburr! A si kɔnkɛnu sule mintan.

²³ “Mari si yakɔrɔ-mamɔɛ anubɛ masiba-koenu nana wo kuma.

²⁴ Kɔnkɔ-fitinɛ anubɛ kiraya-yogomɛnu si wo faga. Mari si sogo-feremɛnu nana wo kan ma minnu si wo dɔn. A si duguma-fen-maralamɛnu natuntun wo ma minnu si wo kin.

²⁵ Wo si belenna fagala wola luyinu ma kɛlɛ bolo. Hali wo tenbi bɔn la, wo kumakɔnɛ si to kilan bolo. Kemini-mɛsɛ wo, sunkurun-mɛsɛ wo, a bɛɛ si faga. Hali dennɛnu anubɛ kun-gbɛnu ti to anu niyi la.

²⁶ A bɛnta nun, Mari ni wo lato dogbe, woletɔ mɔgɛnu ti anu miri wo ma tun.

²⁷ Kɔnɔ a ma di Mari ye wo yogenu ni anu wasi wo la ko anu denu-denu ya wo nɔ bawo ale Mari nyɛrɛ-nyɛrɛ gbɛ le wo la.

²⁸ “Kun-takolɔn le wole Isirɛla mɔgɛnu na. Hɛnkili sa wo la ni!

²⁹ Wo ma ke a lɔnna wo yogenu ya wo nɔ nya min. Wo ma a lɔn min mara wo la.

³⁰ Nfen ya a to, anu mɔgɔ kelan ya wo mɔgɔ waga kelan gbesi? Nfen ya a to, anu mɔgɔ filɛ ya wo mɔgɔ waga tan gben? Min ya a to, wonu mara bawo wota Fara-Kole Mari ya a bɔ wo fɛ.

³¹ Wo yogenu ya a lɔn ko fanka sa anuta bɛsɛnu na. Anuta farɛnu mani ma iko wota Fara-Kole Mari ye nya min.

³² Wo yogenuna wunduyogoyɛ bɔra kan-tina-yogomɛnu tɔ iko wunduyogoyɛ min bɔra Sɔdɔm anubɛ Kɔmɔra so-yogomɛnu tɔ. Anu fere iko kulu-dalamɛ.

³³ Anu mani de iko gbɛɛ min yabasannɛ duguma-fen-marɛ la.

³⁴ “Mari ya a lɔn wo yogenu ya min ma. A ya anuna ko sigi a burɔ ha anu tɔrɔ-wati ni ke tumɛ min.

³⁵ Wota Mari si wota yili sara ka anu tɔrɔ kosɛbɛ! Anu fanan bu-wati si na. Anu halaki-wati ara gbɛrɛn.

³⁶ “Mari wa a lɔn tumɛ min fanka sa wole Isirɛla mɔgɛnu na tun, a si wo kisi. A wa a yen wo niyi sani ma wola bɛsɛnu kuma tun, a si kinikini wole, a batolɛnu ma.

³⁷ Mari si wo manyinika worɔ ko, ‘Wola bɛsi-makawanɛ minnu bi wo bolo nun, wonu bi mintɔ kaka? Farɛ minnu bi wo yogenu bolo nun, wo lara minnu fanan na, wonu bi mintɔ?’

³⁸ Wo ya anu de-nyini wola saraka-kɛɛnmɛnu na. Wo ya wola nɔnbɔ-gbɔ-yi ma sarakɛ la ka anu di wola bɛsɛnu ma fanan. Nba, wonu ni anu natiriya wo dɛnbɛna gbɛ! Wonu ni na wo kisi.”

³⁹ Mari ko ale kelen pe le wota Mari Alla la. Fufafuyi le wola bɛsɛnu na. Ale le si mɔgɛ faga, ale le si mɔgɛ lakɛndɛya. Ale le ye mɔgɛ tanbanna, ale le ye mɔgɛ dandanna. Mɔgɔ ti ke ale rasɛla.

⁴⁰ A ko a ara a keli a nyɛrɛ la ka a kɔɛn layɛlɛ alako wo ni la kumɛ kɛ la.

⁴¹ Mari ko a si ata faan dɛ lasa alako telenbagayɛ ni to wole anubɛ wo yogenu tɛma. A si wo tayili sara wo yogenu na ka a yogenu tɔrɔ ale ma di minnu ye.

⁴² Mari ko yele si bɔ ata kalabɛn-sungbannu na ka tinti dugi ma. A ma di minnu ye, ata faan si wo bɛɛsi faga le. A yoge fenfen ti to a niyi la, hali mɔgɔ-tanbannɛnu anubɛ mɔgɔ-biranɛnu fanan si faga.

⁴³ Wole sibolo-gbɛrɛnu, a ko wo ni ale Marita mɔgɛ kɛnu matɔgɔ. Ni minnu ya kɛnu faga, Mari si wonu tɔrɔ. Mari si a tayili sara a yogenu na ka ata mɔgɛ wonu makoto anu hakɛ la.

⁴⁴ Musa anubɛ Yasowa ya bɛti kɛ rakaran Isirɛla mɔgɛ bɛɛ ye.

⁴⁵ Musa ban Allata kumɛ karanna mɔgɛnu ye,

⁴⁶ a ya a fɔ anu ye ko, “Wo ni a ma wo fɛrɛma, n bara tɔn kɛ damasi min di wo ma kɛ la bi, wo ni wonu bira. Wo ni anu takaran wola dannu ye a kilɛ fɛ woletɔ anu si Allata karan kɛ bira anu bolo filɛ la gben!

⁴⁷ Fufafu ma karan kɛ la de! Wo niyi-kole le kɛ la. Ni wo ya a bira, wo si simayɛ sɔrɔn lanyiri-nyamanɛ rɔ Yorodan bɛ kɔgɔma wo ye nala tala kan min.”

Kenan Nyamanɛ Mafɛlɛn-Koe Musa Bolo

⁴⁸ Tele wo nyɛrɛ rɔ, Mari ya a fɔ Musa ye ko,

⁴⁹ “Mohabu nyamanɛ kɛ rayen Yɛrikɔ soe ya-telen tɔ Abarim kɔnkɛnu bi kan min. Ta, i ni yɛlɛ Nibɔ kɔnkɛ kuma nyɔ rɔ. I ni Kenan nyamanɛ mafɛlɛn n bi nala min dila Isirɛla mɔgɛnu ma.

⁵⁰ I si so-sɛgi-kɛ nyɔ iko i kɔrɔ Aruna ya so-sɛgi-kɛ Hɔ kɔnkɛ kuma nya min.

⁵¹ Min ya a to, ile nyɛrɛ fanan ye so-sɛgi-kɛla iko Aruna bawo ile fanan ma i telen n ye Isirɛla mɔgɛnu tɛma. Wo ye Sɔnkɔ-Sɔnkɔ Tenke dafɛ tumɛ min Kɛdɛsi soe da kɔrɔ Sini wulɛ rɔ, i ya n nafɛya Isirɛla mɔgɛnu yakɔrɔ nyɔ.

⁵² N bi nala nyamanɛ min dila Isirɛla mɔgɛ kɛnu ma, i si wo mafɛlɛn wula-yan la kɔnɔ i ti i kian sɔ nyɔ.”