Tɔn-Fɔɛ-Fila-Nyɔgɛ 31 - ALLALA KUMƐ

Yasowa Makawandi-Koe Musa Bolo

¹ Musa ya a fɔ Isirɛla mɔgɛ bɛɛ ye ko,

² “N bara san kɛmɛ ani san mogan bɔ. N ti ke wola kun-tigiyɛ nɔla tun. Min sanɛ wo kuma, Mari ara a fɔ n ye ka a gbɛ feu, ko n ti Yorodan bɛ tɛgɛ tun.

³ Kɔnɔ wota Mari Alla nyɛrɛ-nyɛrɛ si sɔ wo yarɔ ka ta sibolo-gbɛrɛ wonu kɛlɛ minnu bi nyɔ kaka. Wo si ta wo sigi wo yoge wonu gbɛ rɔ nyamanɛ wo rɔ. Yasowa le ye mala wota kun-tigi la iko Mari ya a fɔ nya min nun.

⁴ Mari si sibole wonu faga iko a ya Amora mansɛnu faga nya min, Saihɔn anubɛ Ɔku, kɔni, ka anuna nyamanɛnu bi anu bolo.

⁵ Wota Mari si a ma, wo si wo yogenu nɔ. Woletɔ wo ni anu bira iko n ya a fɔ wo ye nya min.

⁶ Wo si wo yisi gbɛlɛya ka wo kerinteya. Wo kana kilan anu na bawo wo tigi Mari Alla si to wo fɛ. A ti wo baya, ado a ti wo boloka mumɛ!”

⁷ Wo kɔma, Musa ya Yasowa kele Isirɛla mɔgɛ bɛɛ yala ka a fɔ a ye ko, “I yisi gbɛlɛya ka i kerinteya bawo ile kelen pe le si ma kun-tigi la mɔgɛ kɛnu kuma. Mari ya lanyiri kiri wo benbanu ye nyamanɛ minna ko la nun, i si nyamanɛ wo tala anu tɛma ka wo sigi a rɔ.

⁸ Mari nyɛrɛ si taran i fɛ ka sɔ i yarɔ. A ti i baya, ado a ti i boloka. I yisi kana tinya kilan bolo.”

Tɔn-Karan-Koe a San Wɔrɔnfila Nyɔgɛ Ma

⁹ Musa ya Marita tɔn bɛɛ sɛbɛ ka a don kun-tiginu anubɛ saraka-masɔlɛnu bolo. Wonu denu bi Marita tɔn-kenkirɛ kun na.

¹⁰ Musa ya a fɔ anu ye ko, “San-wɔrɔ wo san-wɔrɔ, a wɔrɔnfila nyɔgɛ ma, wo si to tɔn kɛnu karanna Lele-Sɔɛ-Ladɛn kuma. San wo nyɛrɛ le yili-makelebɛlitayɛ-san la.

¹¹ Mɔgɛnu ba na ladɛn rɔ, wo si tɔn kɛnu karan anu ye Marita kan-tina-yabɔnɛ wo rɔ.

¹² Wo ni mɔgɛ bɛɛ kele kan-tina-kelen, kei wo, musi wo, dennɛnu wo, anubɛ sundan minnu siginɛ wo tɛma. Mɔgɛ bɛɛsi ni bɛn a karan rɔ woletɔ anu si wota Mari Alla gbiliya ka ata kumɛ bira.

¹³ Wo si a ma, wo kegeyɛ minnu ma Marita tɔn lɔn, anu ni wo lamɔɛn. Wo si a ma, anu ni anu degen Mari gbiliyɛ ma anu siyi-tele-bɛɛ kɔrɔ lanyiri-nyamanɛ rɔ Yorodan bɛ kɔma wo ye tala kan min.”

Sereyɛ minnu bi Mɔgɔ-Murutiyanɛnu Kan Ma

¹⁴ Mari ya a fɔ Musa ye ko, “A ti mɛ tun ile si so-sɛgi-kɛ. Yasowa kele ka na a la nde, Marita Fani-Bɔn la. N bi nala kumɛ do fɔla a ye ale si min ma.” Musa tara Yasowa kele ka na anu sɔ Marita Fani-Bɔn tenbi-bolɔn la.

¹⁵ Mari ya a nyɛrɛ yira anu na banda-fin-gbɛ rɔ min dunnɛ Marita Fani-Bɔn don-dɛ dafɛ.

¹⁶ Mari ya a fɔ Musa ye nyɔ ko, “Musa, i sa mɛla so-sɛgi-kɛla tun. I wa so-sɛgi-kɛ tumɛ min, mɔgɛ kɛnu si n boloka ka sarama-kan tinya ka don lanyiri-nyamanɛ bɛsi-kɔ-koenu tɔ anu bi tala kan min.

¹⁷ Wo wa ma tumɛ min, n fonde si bɔ anu kuma ka n kan-kɔ sɔ anu na. Anu si masiba-koenu sɔrɔn. Anu ba koe kɛnu yen mala anu na tumɛ min, anu si a lɔn worɔ ko nde min bi anuta Alla la, nde sa anu fɛ.

¹⁸ N ti sɔn anu dɛnbɛna bawo anu bara ko-yogomɛ ladan ka bɛsɛnu kɔ.”

¹⁹ Mari ya a fɔ Musa ye tun ko, “I ni bɛti kɛ sɛbɛ. I ni Isirɛla mɔgɛnu karan a la woletɔ a si ma sereyɛ la anu kan ma.

²⁰ N bara anu benbanu yili-madiya nyamani-hakikɛ min na, n si anu bi ka ta anu na nyɔ rɔ. Anu bi nyinina dɔn-fan min bɛɛsi ma, anu si wo bɛɛsi sɔrɔn nyɔ rɔ. Anu si taran anu diya nyɔ. Kɔnɔ hali wo, anu si anu kan-kɔ sɔ n na ka don bɛsi-kɔ-koenu tɔ. Anu si anu ban n na ka ma-tɛma-sarama-kan tinya.

²¹ Wo le si a ma, n si gbalo-koe lana anu kuma. Hali wo, anu si to bɛti kɛ bɔla. Wo si ma sereyɛ la anu kan ma. Hali kaka, yanni anu ni ta lanyiri-nyamanɛ rɔ, n ya a lɔn min bi anu kɔntɔ.”

²² Wo tele nyɛrɛ rɔ, Musa ya bɛti kɛ sɛbɛ ka Isirɛla mɔgɛnu karan a la.

²³ Wo kɔma, Mari ya a fɔ Nunna den Yasowa ye ko, “I yisi gbɛlɛya ka i kerinteya. Ile le ye mala kun-tigi la ka ta anu na lanyiri-nyamanɛ rɔ. N ti bɔ i fɛ muk!”

²⁴ Musa ya Marita tɔn-kitabu sɛbɛ. A ya a sɛbɛ a fɛrɛma alako a kana nyina fenfen ko.

²⁵ A ban a sɛbɛla, saraka-masɔlɛ minnu bi tɔn-kenkirɛ kun na, a ya a fɔ wonu ye ko,

²⁶ “Allata tɔn-kitabu kɛ bi ka a sa wota Mari Allata tɔn-kenkirɛ burɔ. Kitabu wo si to sanɛ nyɔ ka ma sereyɛ la wole Isirɛla mɔgɛnu kan ma.

²⁷ N ya anuna tolo-gbereyɛ anubɛ anuna murutiyɛ nya-lɔn. Anu bara murutiya Mari ma nde nyɛrɛ yala. N ba faga tumɛ min, anu si murutiya ka tenbi a fɔlɔtɛ fanan na.

²⁸ Wo ni bɔnsɔn-kun-tiginu anubɛ mɔgɔ-banu nadɛn nde nyɛrɛ yala. Nde nyɛrɛ si kɛ fɔ anu fanan ye. N tenbi a fɔla anu ye, san-kole anubɛ dugu-kole si ma sereyɛ la ma tɛma anu na.

²⁹ N ya a lɔn ko n ba faga tumɛ min, Isirɛla mɔgɛnu si ma wunduyogenu na. Anu si anu ban nta karan kɛnu na. Kɔnɔ tɔ-a-la, anu si masiba-koenu sɔrɔn bawo anu ya Alla kuman-kan masɔsɔ. Woletɔ anu bara a ma, Mari fonde ara bɔ anu kuma dɔgɔma-ma-de!”

Musata Bɛti

³⁰ Musa ya bɛti wo bɛɛsi rakaran Isirɛla mɔgɛ bɛɛ yala.