Tɔn-Fɔɛ-Fila-Nyɔgɛ 30 - ALLALA KUMƐ

Kun-Nadiyɛ anubɛ Tɔrɔyɛ

¹ “Wota Mari Alla si wo ranyɛnsɛn wo yogenu tɛma. Hali wo ye tɔrɔyɛ kɛnu tɔ, wo hɛnkili si to wota bi-koe ko duwɛ anubɛ dankɛ tɛma.

² Ni wobɛ wo kegeyɛnu sɛgira wota Mari ma wo sɔndɔmɛ bɛɛ la ka ata tɔnnu bira n bara min bɛɛsi fɔ wo ye kɛ la bi,

³ wota Mari Alla fanan si kinikini wo ma. A ya wo don bɔnsɔn minnu bolo nun, a si wo labɔ wonu tɛma. Wola koe bɛɛ si ta a kilɛ fɛ wo bolo tun.

⁴ Hali wo tara duninya-tonko-nanɛ bɛɛ rɔ, wota Mari Alla si wo kundɛn ka na wo la lanyiri-nyamanɛ rɔ.

⁵ A si a ma, wo kegeyɛnu ni anu sigi anu benbanuna tonbon-kɔrɛ rɔ. Wota Mari si a ma, wo ya wo bole don ko-wo-ko rɔ, wo si wo munanfaga ka tenbi wo benbanu na, ado wo si yiri boi, ka tenbi wo benbanu na.

⁶ Wota Mari Alla si miriya-nyimɛ don wobɛ wo kegeyɛnu yisi rɔ ka ata kuman-kan bira. Wo si a keni wo yisi bɛɛ la. Wo siginɛ si to nyɔ lanyiri-nyamanɛ rɔ.

⁷ Alla si wola dankali-yogomɛ wo yɛlɛma ka a lasɛgi wo yogenu ma minnu ya wo bira boloko-yogomɛ-kɛ.

⁸ N bara wota Mari Allata kumɛ minnu di wo ma bi, wo si to wonu birala.

⁹ Wota Mari si ata duwɛ layigi wo kuma koe bɛɛ rɔ. Wo si den-siyaman sɔrɔn, wola kolo-fannu si siyaya, wola ki-fannu si sabati wo bolo kosɛbɛ! Fɔlɔ nun, wota Mari Alla sewara ka fen-siyaman di wo benbanu ma. A sewanɛ fanan si fen-siyaman di wole fanan ma wo nya na le.

¹⁰ Kɔnɔ fɔ wo ni ata tɔn bɛɛsi bira minnu sɛbɛnɛ Allata tɔn-kitabu kɛ rɔ. Fɔ wo ni sɛgi wota Mari Alla ma wo yisi bɛɛ la.”

Wota Bi-Koe Ko-Yogomɛ anubɛ Ko-Nyimɛ Tɛma

¹¹ “N bara Marita tɔn minnu bara-koe fɔ wo ye kɛ la bi, wonu ti ma kɔndɔfili la wo ye, ado wo si a nɔ le.

¹² Tɔn wonu sa san-kole ma pon iko komi wo ye mɔgɛ manyinikala anu bi-koe la san ma wo ye, woletɔ wo si a lamɔɛn ka anu bira.

¹³ Anu sa kɔgɔ-yi kɔgɔma iko komi wo ye mɔgɛ manyinikala anu bi-koe ma wo ye, woletɔ wo si a lamɔɛn ka anu bira.

¹⁴ Kɛnu bi wo dafɛ kaka. Hali wo ma anu karan, wo si ke le ka anu fɔ. Woletɔ wo ni anu bira gben!

¹⁵ “Bi, Mari ko a ara fan kɛnu sa wo kɔrɔ. Wo ni wota bi kɛnu tɔ, ko-nyimɛ anubɛ ko-yogomɛ, simayɛ anubɛ fagalɛ.

¹⁶ N bara tɔn min di wo ma kɛ la bi, ni wo ya wota Mari Allala kuman-kan bira ka a latɔnbagaya ka Alla keni, wo ye wɔlɛ min bɛɛ kɛla worɔ, wonu si sabati wo bolo. Wo bɔnsɔnnu si siyaya. Wo ye tala sigila nyamanɛ min tɔ, wota Mari Alla si ata duwɛ layigi wo kuma nyɔ.

¹⁷ Kɔnɔ ni wo ya ata tɔnnu tinya ka wo ban a bira-koe ma, ado wo ma wo tole masɔ a la ka bila mɔgɛ donu fɛ bɛsi-kɔ-tinɛnu tɔ,

¹⁸ Mari si wole fanan halaki worɔ. N bi wo makawandila ka a gbɛlɛya gben, wo ti mɛ sigini lanyiri-nyamanɛ wo rɔ mumɛ, wo ye tala sigila kan min wo wa Yorodan bɛ tɛgɛ, kɔni.

¹⁹ Kaka, nde nyɛrɛ fanan bi fɛrɛ dila wo ma ka wota bi duwɛ anubɛ dankɛ tɛma, simayɛ anubɛ fagalɛ tɛma. San-kole anubɛ dugu-kole si ma sereyɛ la wota bi-koe kɛ rɔ. Nde, Musa ko wo ni simayɛ bi.

²⁰ Wo ni wota Mari Alla keni wo sɔndɔmɛ bɛɛ la ka ma telenbagɛnu na Alla ye ka ata kumɛnu bira. Wo le si a ma, Mari ya nyamanɛ min lanyiri kiri wo benbanu ye, Iburayima anubɛ Isiyaka anubɛ Yakoba, kɔni, wobɛ wo kegeyɛnu si simayɛ sɔrɔn ka mɛ sigini nyɔ rɔ.”