Tɔn-Fɔɛ-Fila-Nyɔgɛ 29 - ALLALA KUMƐ

¹ Kuma-kolomɛ le kɛnu na Mari ya minnu lanyiri kiri Musa ye wo tumɛ Isirɛla mɔgɛnu bi Sinayi kɔnkɛ dafɛ. Kaka, a ye nala kumɛ wo le makofuli-kɛla Mohabu nyamanɛ rɔ.

Musata Kuma-Fɔɛ Nani Nyɔgɛ—Kumɛ-Gba-Masɛgi-Koe ( Tɔn-Fɔɛ-Fila-Nyɔgɛ 29.2–30.20 )

² Musa ya Isirɛla mɔgɛnu nadɛn ka a fɔ anu ye ko, “Wo nyɛrɛ-nyɛrɛ ya a yen Mari ya min ma Iyipiti nyamani-tigi la anubɛ ala mɔgɔ-banu anubɛ anuna nyamanɛ.

³ Mari ya ko-makilannɛnu anubɛ kabana-koenu kɛ wo nyɛrɛ yala le serr!

⁴ Kɔnɔ ka a dabira wo wati ma ha ka a sigi kaka la, wo ma ban a lɔnna wɛ Mari ya min ma wo ye.

⁵ San bi-nani kɔrɔ, Mari ye wo yarɔ wula-da-rakolɔn rɔ, wola kurɛnu ta ma fara anubɛ wola sanbarɛnu.

⁶ Wo wati mumɛ bɛɛ rɔ, wo ma biredi dɔn hali ka nɔnbɔ-gbɔ-yi anubɛ gbɛɛ min. Kɔnɔ wota Mari Alla le ya wo de-nyini ka wo makoe bɛɛ nyinya alako ka a yira wo la ko wota Alla le ale la.

⁷ “Kɔnɔ mala nɛ yan Mohabu nyamanɛ kɛ rɔ, Mansa Saihɔn min bi Hɛsibɔn soe rɔ anubɛ Mansa Ɔku min bi Basan nyamanɛ kun na, ma ya wonu taran yan. Ma ye anuna nyamanɛ rɔ min kɛ, anu wulita ka ma kɛlɛ kɔnɔ ma ya anu faga.

⁸ Ma ya anuna nyamanɛ bi anu bolo ka a ratala bɔnsɔn filɛ anubɛ bɔnsɔn-talɛ tɛma, Rubɛn bɔnsɔn wo, Kadi bɔnsɔn wo, anubɛ Manasa bɔnsɔn tɔnkɔn kelan tɛma.

⁹ “Wo si tɔn bɛɛ bira lanyiri kɛ rɔ, woletɔ koe bɛɛ si ta a kilɛ fɛ wo bolo.

¹⁰ Wola kun-tiginu wo, wola mɔgɔ-banu wo, keinu

¹¹ anubɛ musinu wo, dennɛnu anubɛ sibolo-gbɛrɛkɛ-mɔgɛnu wo, wo sɔnɛ wota Mari Alla yakɔrɔ bi. Kɔnɔ sibolo-gbɛrɛ minnu siginɛ wo tɛma, wonu si sɔgɛ anubɛ yi maduni wo ye.

¹² N bara wo kele bi alako wo ni lanyiri kɛ kiri wole anubɛ wota Mari Alla tɛma. Koe minnu bi lanyiri kɛ rɔ, wo ni sɔn wonu ma.

¹³ Ni wo ya wo ma, Mari si wo bira iko ata mɔgɛnu. Ale si sɔn ka ma wota Alla la iko a mara wo benba Iburayima anubɛ Isiyaka anubɛ Yakobata Alla la nya min.

^14-15 A sa lanyiri kɛ kirila wole dɔrɔn ye bi. Wole minnu sɔnɛ yan anubɛ wo kegeyɛnu ye minnu ma sɔrɔn bɛ, a ye lanyiri kɛ kirila wole ye.

¹⁶ “Wo ni wo miri wo ye nya min nun Iyipiti nyamanɛ rɔ. Wo ni wo miri sibolo-gbɛrɛkɛ-mɔgɛnu bi nya min nun kilɛ la yanni ma ni ke yan.

¹⁷ Anu ya anuna bɛsi-fufafuyi minnu nadan kɔlɔma anubɛ kuri la, sɛnɛ anubɛ wodi-gbɛ, wo ya wonu yen.

¹⁸ Kei wo, musu wo, kebila wo, bɔnsɔn wo, wo ni a ma wo fɛrɛma, wo kana sibolo-gbɛrɛnuna bɛsɛnu kɔ ka wo kan-kɔ sɔ wota Mari Alla la. Ni min ya wo ma, wo si ma wo tɛma iko kulu-dalamɛ min bi mɔgɔ nyinina a kin-gbɛ ma.

¹⁹ “Ni mɔgɔ-sufa wo ya lanyiri-kumɛ kɛ lamɔɛn, a ni duwa-kumɛ wo labira a nyɛrɛ ye kɔnɔ a yisi rɔ, a ye a fɔla ko, ‘Sɔ de, n bi min mala, n ni wo ma n ye. N ti nanparan mumɛ sɔrɔn.’ Ni min ya a tui ka wo ma, wo tigi si nanparan lana wo bɛɛsi kuma. Mɔgɔ-nyima wo, mɔgɔ-koron wo, wo bɛɛ si faga.

²⁰ Mari ti mɔgɔ-sufa wo to nyɔ rɔ. Wo si a ma, Mari fonde si bɔ ka sisi lugbu-lugbu! Tɔrɔyɛ min bɛɛsi sɛbɛnɛ kitabu kɛ rɔ, wonu si sigi ale mɔgɛ wo kuma ha Mari si a kasara pɔɔ!

²¹ Mari si mɔgɛ wo ma tamasere la Isirɛla mɔgɛnu yala. Iko dankɛ minnu sɛbɛnɛ kitabu kɛ rɔ, Mari si wo dama kasara-dɛgbɛ sigi mɔgɛ wo la.

²² “Ni wo ma lanyiri kɛ tɔnnu bira, wo kegeyɛnu anubɛ sibolo-gbɛrɛkɛ-mɔgɛnu ba sɔ wula-yan la ka sɛgi wola nyamani-kɔrɛ mafɛlɛn tinɛ tumɛ min, anu si wola nyamanɛ kasara-nya yen Mari bolo.

²³ Wola sɛni sa tinɛnu si ma kɔgɔ-dugi la. Fenfen ti ma-a-la wo bolo. Hali binyɛ ti ma-a-la nyɔ. Wola nyamanɛ si ma iko Sɔdɔm wo, Kɔmɔra wo, Adima wo, anubɛ Sebom mara nya min. Marita fondo-bɔ-belebele kɛra min kɛ, a ya soe wonu tinya.

²⁴ Duninya mumɛ bɛɛ si nyinikalɛ sa ko, ‘Nfen ya a to, Mari ya anuna nyamanɛ kɛ tinya ka? Nfen ya a ma, Mari fonde bɔra wɛ kɛ ka?’

^25-26 Wo yabilɛ si ma ko, ‘Anu bɔɛ Iyipiti, Mari ya lanyiri kiri ata mɔgɛnu ye kɔnɔ wonu kegeyɛnu ya lanyiri wo tinya ka don bɛsi-kɔ-koenu tɔ, ado anu benbanu ma bɛsɛnu kɔ. Mari ya a fɔ anu ye nun ko anu kana bɛsɛnu kɔ hali!

²⁷ Woletɔ Mari fonde bɔra anu kuma ka kasarɛ sigi anuna dugi la. Dankɛ min bɛɛ sɛbɛnɛ buku kɛ rɔ, wo ya anuna dugi bira.

²⁸ Marita fondo-belebele bɔra anu kuma ka anu wurun ka anu nabui nyamani-gbɛrɛnu tɔ fugbu! Anu bi nyɔ ha bi.’

²⁹ “Ko-dogonnɛ donu bi nyɔ mata Mari Alla ya min bira a nyɛrɛ ye gben! Kɔnɔ a ya ata tɔnnu denu yira mabɛ ma kegeyɛnu na ma si to minnu birala habadan!”